10.1.12 သဟာယကသုတ္တ
သာဝတ္ထိယံ ဝိဟရတိ. အထ ခေါ ဒွေ ဘိက္ခူ သဟာယကာ အာယသ္မတော မဟာကပ္ပိနဿ သဒ္ဓိဝိဟာရိနော ယေန ဘဂဝါ တေနုပသင်္ကမိံသု. အဒ္ဒသာ ခေါ ဘဂဝါ တေ ဘိက္ခူ ဒူရတောဝ အာဂစ္ဆန္တေ. ဒိသွာန ဘိက္ခူ အာမန္တေသိ— “ပဿထ နော တုမှေ, ဘိက္ခဝေ, ဧတေ ဘိက္ခူ သဟာယကေ အာဂစ္ဆန္တေ ကပ္ပိနဿ သဒ္ဓိဝိဟာရိနော”တိ? “ဧဝံ, ဘန္တေ”. “ဧတေ ခေါ တေ ဘိက္ခူ မဟိဒ္ဓိကာ မဟာနုဘာဝါ. န စ သာ သမာပတ္တိ သုလဘရူပါ, ယာ တေဟိ ဘိက္ခူဟိ အသမာပန္နပုဗ္ဗာ. ယဿ စတ္ထာယ ကုလပုတ္တာ သမ္မဒေဝ အဂါရသ္မာ အနဂါရိယံ ပဗ္ဗဇန္တိ တဒနုတ္တရံ ဗြဟ္မစရိယပရိယောသာနံ ဒိဋ္ဌေဝ ဓမ္မေ သယံ အဘိညာ သစ္ဆိကတွာ ဥပသမ္ပဇ္ဇ ဝိဟရန္တီ”တိ.
ဣဒမဝေါစ ဘဂဝါ. ဣဒံ ဝတွာန သုဂတော အထာပရံ ဧတဒဝေါစ သတ္ထာ—
“သဟာယာဝတိမေ ဘိက္ခူ,
စိရရတ္တံ သမေတိကာ;
သမေတိ နေသံ သဒ္ဓမ္မော,
ဓမ္မေ ဗုဒ္ဓပ္ပဝေဒိတေ.
သုဝိနီတာ ကပ္ပိနေန,
ဓမ္မေ အရိယပ္ပဝေဒိတေ;
ဓာရေန္တိ အန္တိမံ ဒေဟံ,
ဇေတွာ မာရံ သဝါဟိနိန်”တိ.
ဒွါဒသမံ.
ဘိက္ခုဝဂ္ဂေါ ပဌမော.
တဿုဒ္ဒါနံ
ကောလိတော ဥပတိဿော စ,
ဃဋော စာပိ ပဝုစ္စတိ;
နဝေါ သုဇာတော ဘဒ္ဒိ စ,
ဝိသာခေါ နန္ဒော တိဿော စ;
ထေရနာမော စ ကပ္ပိနော,
သဟာယေန စ ဒွါဒသာတိ.
ဘိက္ခုသံယုတ္တံ သမတ္တံ.
နိဒါနဝဂ္ဂေါ ဒုတိယော.
တဿုဒ္ဒါနံ
နိဒါနာဘိသမယဓာတု,
အနမတဂ္ဂေန ကဿပံ;
သက္ကာရရာဟုလလက္ခဏော,
ဩပမ္မဘိက္ခုနာ ဝဂ္ဂေါ.
ဒုတိယော တေန ပဝုစ္စတီတိ.
နိဒါနဝဂ္ဂသံယုတ္တပါဠိ နိဋ္ဌိတာ.