9.1.1 ဝိဝေကသုတ္တ
Review
221.
1378
ဧဝံ မေ သုတံ— ဧကံ သမယံ အညတရော ဘိက္ခု ကောသလေသု ဝိဟရတိ အညတရသ္မိံ ဝနသဏ္ဍေ. တေန ခေါ ပန သမယေန သော ဘိက္ခု ဒိဝါဝိဟာရဂတော ပါပကေ အကုသလေ ဝိတက္ကေ ဝိတက္ကေတိ ဂေဟနိဿိတေ. အထ ခေါ ယာ တသ္မိံ ဝနသဏ္ဍေ အဓိဝတ္ထာ ဒေဝတာ တဿ ဘိက္ခုနော အနုကမ္ပိကာ အတ္ထကာမာ တံ ဘိက္ခုံ သံဝေဇေတုကာမာ ယေန သော ဘိက္ခု တေနုပသင်္ကမိ; ဥပသင်္ကမိတွာ တံ ဘိက္ခုံ ဂါထာဟိ အဇ္ဈဘာသိ—
1379
“ဝိဝေကကာမောသိ ဝနံ ပဝိဋ္ဌော,
အထ တေ မနော နိစ္ဆရတီ ဗဟိဒ္ဓါ;
ဇနော ဇနသ္မိံ ဝိနယဿု ဆန္ဒံ,
တတော သုခီ ဟောဟိသိ ဝီတရာဂေါ.
1380
အရတိံ ပဇဟာသိ သတော,
ဘဝါသိ သတံ တံ သာရယာမသေ;
ပါတာလရဇော ဟိ ဒုတ္တရော,
မာ တံ ကာမရဇော အဝါဟရိ.
1381
သကုဏော ယထာ ပံသုကုန္ထိတော,
ဝိဓုနံ ပါတယတိ သိတံ ရဇံ;
ဧဝံ ဘိက္ခု ပဓာနဝါ သတိမာ,
ဝိဓုနံ ပါတယတိ သိတံ ရဇန်”တိ.
1382
အထ ခေါ သော ဘိက္ခု တာယ ဒေဝတာယ သံဝေဇိတော သံဝေဂမာပါဒီတိ.