9.1.14 ဂန္ဓတ္ထေနသုတ္တ
ဧကံ သမယံ အညတရော ဘိက္ခု ကောသလေသု ဝိဟရတိ အညတရသ္မိံ ဝနသဏ္ဍေ. တေန ခေါ ပန သမယေန သော ဘိက္ခု ပစ္ဆာဘတ္တံ ပိဏ္ဍပါတပဋိက္ကန္တော ပေါက္ခရဏိံ ဩဂါဟေတွာ ပဒုမံ ဥပသိင်္ဃတိ. အထ ခေါ ယာ တသ္မိံ ဝနသဏ္ဍေ အဓိဝတ္ထာ ဒေဝတာ တဿ ဘိက္ခုနော အနုကမ္ပိကာ အတ္ထကာမာ တံ ဘိက္ခုံ သံဝေဇေတုကာမာ ယေန သော ဘိက္ခု တေနုပသင်္ကမိ; ဥပသင်္ကမိတွာ တံ ဘိက္ခုံ ဂါထာယ အဇ္ဈဘာသိ—
“ယမေတံ ဝါရိဇံ ပုပ္ဖံ,
အဒိန္နံ ဥပသိင်္ဃသိ;
ဧကင်္ဂမေတံ ထေယျာနံ,
ဂန္ဓတ္ထေနောသိ မာရိသာ”တိ.
“န ဟရာမိ န ဘဉ္ဇာမိ,
အာရာ သိင်္ဃာမိ ဝါရိဇံ;
အထ ကေန နု ဝဏ္ဏေန,
ဂန္ဓတ္ထေနောတိ ဝုစ္စတိ.
ယွာယံ ဘိသာနိ ခနတိ,
ပုဏ္ဍရီကာနိ ဘဉ္ဇတိ;
ဧဝံ အာကိဏ္ဏကမ္မန္တော,
ကသ္မာ ဧသော န ဝုစ္စတီ”တိ.
“အာကိဏ္ဏလုဒ္ဒေါ ပုရိသော,
ဓာတိစေလံဝ မက္ခိတော;
တသ္မိံ မေ ဝစနံ နတ္ထိ,
တွဉ္စာရဟာမိ ဝတ္တဝေ.
အနင်္ဂဏဿ ပေါသဿ,
နိစ္စံ သုစိဂဝေသိနော;
ဝါလဂ္ဂမတ္တံ ပါပဿ,
အဗ္ဘာမတ္တံဝ ခါယတီ”တိ.
“အဒ္ဓါ မံ ယက္ခ ဇာနာသိ,
အထော မေ အနုကမ္ပသိ;
ပုနပိ ယက္ခ ဝဇ္ဇာသိ,
ယဒါ ပဿသိ ဧဒိသန်”တိ.
“နေဝ တံ ဥပဇီဝါမ,
နပိ တေ ဘတကာမှသေ;
တွမေဝ ဘိက္ခု ဇာနေယျ,
ယေန ဂစ္ဆေယျ သုဂ္ဂတိန်”တိ.
အထ ခေါ သော ဘိက္ခု တာယ ဒေဝတာယ သံဝေဇိတော သံဝေဂမာပါဒီတိ.
ဝနဝဂ္ဂေါ ပဌမော.
တဿုဒ္ဒါနံ
ဝိဝေကံ ဥပဋ္ဌာနဉ္စ,
ကဿပဂေါတ္တေန သမ္ဗဟုလာ;
အာနန္ဒော အနုရုဒ္ဓေါ စ,
နာဂဒတ္တဉ္စ ကုလဃရဏီ.
ဝဇ္ဇိပုတ္တော စ ဝေသာလီ,
သဇ္ဈာယေန အယောနိသော;
မဇ္ဈနှိကာလမှိ ပါကတိန္ဒြိယ-
ပဒုမပုပ္ဖေန စုဒ္ဒသ ဘဝေတိ.
ဝနသံယုတ္တံ သမတ္တံ.