9.1.2 ဥပဋ္ဌာနသုတ္တ
ဧကံ သမယံ အညတရော ဘိက္ခု ကောသလေသု ဝိဟရတိ အညတရသ္မိံ ဝနသဏ္ဍေ. တေန ခေါ ပန သမယေန သော ဘိက္ခု ဒိဝါဝိဟာရဂတော သုပတိ. အထ ခေါ ယာ တသ္မိံ ဝနသဏ္ဍေ အဓိဝတ္ထာ ဒေဝတာ တဿ ဘိက္ခုနော အနုကမ္ပိကာ အတ္ထကာမာ တံ ဘိက္ခုံ သံဝေဇေတုကာမာ ယေန သော ဘိက္ခု တေနုပသင်္ကမိ; ဥပသင်္ကမိတွာ တံ ဘိက္ခုံ ဂါထာဟိ အဇ္ဈဘာသိ—
“ဥဋ္ဌေဟိ ဘိက္ခု ကိံ သေသိ,
ကော အတ္ထော သုပိတေန တေ;
အာတုရဿ ဟိ ကာ နိဒ္ဒါ,
သလ္လဝိဒ္ဓဿ ရုပ္ပတော.
ယာယ သဒ္ဓါယ ပဗ္ဗဇိတော,
အဂါရသ္မာနဂါရိယံ;
တမေဝ သဒ္ဓံ ဗြူဟေဟိ,
မာ နိဒ္ဒါယ ဝသံ ဂမီ”တိ.
“အနိစ္စာ အဒ္ဓုဝါ ကာမာ,
ယေသု မန္ဒောဝ မုစ္ဆိတော;
ဗဒ္ဓေသု မုတ္တံ အသိတံ,
ကသ္မာ ပဗ္ဗဇိတံ တပေ.
ဆန္ဒရာဂဿ ဝိနယာ,
အဝိဇ္ဇာသမတိက္ကမာ;
တံ ဉာဏံ ပရမောဒါနံ,
ကသ္မာ ပဗ္ဗဇိတံ တပေ.
ဆေတွာ အဝိဇ္ဇံ ဝိဇ္ဇာယ,
အာသဝါနံ ပရိက္ခယာ;
အသောကံ အနုပါယာသံ,
ကသ္မာ ပဗ္ဗဇိတံ တပေ.
အာရဒ္ဓဝီရိယံ ပဟိတတ္တံ,
နိစ္စံ ဒဠှပရက္ကမံ;
နိဗ္ဗာနံ အဘိကင်္ခန္တံ,
ကသ္မာ ပဗ္ဗဇိတံ တပေ”တိ.