9.1.8 ကုလဃရဏီသုတ္တ
Review
228.
1412
ဧကံ သမယံ အညတရော ဘိက္ခု ကောသလေသု ဝိဟရတိ အညတရသ္မိံ ဝနသဏ္ဍေ. တေန ခေါ ပန သမယေန သော ဘိက္ခု အညတရသ္မိံ ကုလေ အတိဝေလံ အဇ္ဈောဂါဠှပ္ပတ္တော ဝိဟရတိ. အထ ခေါ ယာ တသ္မိံ ဝနသဏ္ဍေ အဓိဝတ္ထာ ဒေဝတာ တဿ ဘိက္ခုနော အနုကမ္ပိကာ အတ္ထကာမာ တံ ဘိက္ခုံ သံဝေဇေတုကာမာ ယာ တသ္မိံ ကုလေ ကုလဃရဏီ, တဿာ ဝဏ္ဏံ အဘိနိမ္မိနိတွာ ယေန သော ဘိက္ခု တေနုပသင်္ကမိ; ဥပသင်္ကမိတွာ တံ ဘိက္ခုံ ဂါထာယ အဇ္ဈဘာသိ—
1413
“နဒီတီရေသု သဏ္ဌာနေ,
သဘာသု ရထိယာသု စ;
ဇနာ သင်္ဂမ္မ မန္တေန္တိ,
မဉ္စ တဉ္စ ကိမန္တရန်”တိ.
1414
“ဗဟူဟိ သဒ္ဒါ ပစ္စူဟာ,
ခမိတဗ္ဗာ တပဿိနာ;
န တေန မင်္ကု ဟောတဗ္ဗံ,
န ဟိ တေန ကိလိဿတိ.
1415
ယော စ သဒ္ဒပရိတ္တာသီ,
ဝနေ ဝါတမိဂေါ ယထာ;
လဟုစိတ္တောတိ တံ အာဟု,
နာဿ သမ္ပဇ္ဇတေ ဝတန်”တိ.