9.1.9 ဝဇ္ဇိပုတ္တသုတ္တ
Review
229.
1416
ဧကံ သမယံ အညတရော ဝဇ္ဇိပုတ္တကော ဘိက္ခု ဝေသာလိယံ ဝိဟရတိ အညတရသ္မိံ ဝနသဏ္ဍေ. တေန ခေါ ပန သမယေန ဝေသာလိယံ ဝဇ္ဇိပုတ္တကော သဗ္ဗရတ္တိစာရော ဟောတိ. အထ ခေါ သော ဘိက္ခု ဝေသာလိယာ တူရိယတာဠိတဝါဒိတနိဂ္ဃေါသသဒ္ဒံ သုတွာ ပရိဒေဝမာနော တာယံ ဝေလာယံ ဣမံ ဂါထံ အဘာသိ—
1417
“ဧကကာ မယံ အရညေ ဝိဟရာမ,
အပဝိဒ္ဓံဝ ဝနသ္မိံ ဒါရုကံ;
ဧတာဒိသိကာယ ရတ္တိယာ,
ကော သု နာမမှေဟိ ပါပိယော”တိ.
1418
အထ ခေါ ယာ တသ္မိံ ဝနသဏ္ဍေ အဓိဝတ္ထာ ဒေဝတာ တဿ ဘိက္ခုနော အနုကမ္ပိကာ အတ္ထကာမာ တံ ဘိက္ခုံ သံဝေဇေတုကာမာ ယေန သော ဘိက္ခု တေနုပသင်္ကမိ; ဥပသင်္ကမိတွာ တံ ဘိက္ခုံ ဂါထာယ အဇ္ဈဘာသိ—
1419
“ဧကကောဝ တွံ အရညေ ဝိဟရသိ,
အပဝိဒ္ဓံဝ ဝနသ္မိံ ဒါရုကံ;
တဿ တေ ဗဟုကာ ပိဟယန္တိ,
နေရယိကာ ဝိယ သဂ္ဂဂါမိနန်”တိ.
1420
အထ ခေါ သော ဘိက္ခု တာယ ဒေဝတာယ သံဝေဇိတော သံဝေဂမာပါဒီတိ.