5.1.1 သာမဏ္ဍကသုတ္တ
ဧကံ သမယံ အာယသ္မာ သာရိပုတ္တော ဝဇ္ဇီသု ဝိဟရတိ ဥက္ကစေလာယံ ဂင်္ဂါယ နဒိယာ တီရေ. အထ ခေါ သာမဏ္ဍကော ပရိဗ္ဗာဇကော ယေနာယသ္မာ သာရိပုတ္တော တေနုပသင်္ကမိ; ဥပသင်္ကမိတွာ အာယသ္မတာ သာရိပုတ္တေန သဒ္ဓိံ သမ္မောဒိ. သမ္မောဒနီယံ ကထံ သာရဏီယံ ဝီတိသာရေတွာ ဧကမန္တံ နိသီဒိ. ဧကမန္တံ နိသိန္နော ခေါ သာမဏ္ဍကော ပရိဗ္ဗာဇကော အာယသ္မန္တံ သာရိပုတ္တံ ဧတဒဝေါစ—
“‘နိဗ္ဗာနံ, နိဗ္ဗာနန်’တိ, အာဝုသော သာရိပုတ္တ, ဝုစ္စတိ. ကတမံ နု ခေါ, အာဝုသော, နိဗ္ဗာနန်”တိ? “ယော ခေါ, အာဝုသော, ရာဂက္ခယော ဒေါသက္ခယော မောဟက္ခယော— ဣဒံ ဝုစ္စတိ နိဗ္ဗာနန်”တိ. “အတ္ထိ ပနာဝုသော, မဂ္ဂေါ အတ္ထိ ပဋိပဒါ, ဧတဿ နိဗ္ဗာနဿ သစ္ဆိကိရိယာယာ”တိ? “အတ္ထိ ခေါ, အာဝုသော, မဂ္ဂေါ အတ္ထိ ပဋိပဒါ, ဧတဿ နိဗ္ဗာနဿ သစ္ဆိကိရိယာယာ”တိ.
“ကတမော ပနာဝုသော, မဂ္ဂေါ ကတမာ ပဋိပဒါ ဧတဿ နိဗ္ဗာနဿ သစ္ဆိကိရိယာယာ”တိ? “အယမေဝ ခေါ, အာဝုသော, အရိယော အဋ္ဌင်္ဂိကော မဂ္ဂေါ, ဧတဿ နိဗ္ဗာနဿ သစ္ဆိကိရိယာယ, သေယျထိဒံ— သမ္မာဒိဋ္ဌိ …ပေ… သမ္မာသမာဓိ. အယံ ခေါ, အာဝုသော, မဂ္ဂေါ အယံ ပဋိပဒါ, ဧတဿ နိဗ္ဗာနဿ သစ္ဆိကိရိယာယာ”တိ. “ဘဒ္ဒကော, အာဝုသော, မဂ္ဂေါ ဘဒ္ဒိကာ ပဋိပဒါ, ဧတဿ နိဗ္ဗာနဿ သစ္ဆိကိရိယာယ. အလဉ္စ ပနာဝုသော သာရိပုတ္တ, အပ္ပမာဒါယာ”တိ.
ပဌမံ.
(ယထာ ဇမ္ဗုခါဒကသံယုတ္တံ, တထာ ဝိတ္ထာရေတဗ္ဗံ.)