6.1.6 ဝိညာဏဉ္စာယတနပဉှာသုတ္တ
“‘ဝိညာဏဉ္စာယတနံ, ဝိညာဏဉ္စာယတနန်’တိ ဝုစ္စတိ. ကတမံ နု ခေါ ဝိညာဏဉ္စာယတနန္တိ? တဿ မယှံ, အာဝုသော, ဧတဒဟောသိ— ‘ဣဓ ဘိက္ခု သဗ္ဗသော အာကာသာနဉ္စာယတနံ သမတိက္ကမ္မ အနန္တံ ဝိညာဏန္တိ ဝိညာဏဉ္စာယတနံ ဥပသမ္ပဇ္ဇ ဝိဟရတိ. ဣဒံ ဝုစ္စတိ ဝိညာဏဉ္စာယတနန်’တိ. သော ခွါဟံ, အာဝုသော, သဗ္ဗသော အာကာသာနဉ္စာယတနံ သမတိက္ကမ္မ အနန္တံ ဝိညာဏန္တိ ဝိညာဏဉ္စာယတနံ ဥပသမ္ပဇ္ဇ ဝိဟရာမိ. တဿ မယှံ, အာဝုသော, ဣမိနာ ဝိဟာရေန ဝိဟရတော အာကာသာနဉ္စာယတနသဟဂတာ သညာမနသိကာရာ သမုဒါစရန္တိ.
အထ ခေါ မံ, အာဝုသော, ဘဂဝါ ဣဒ္ဓိယာ ဥပသင်္ကမိတွာ ဧတဒဝေါစ— ‘မောဂ္ဂလ္လာန, မောဂ္ဂလ္လာန. မာ, ဗြာဟ္မဏ, ဝိညာဏဉ္စာယတနံ ပမာဒေါ, ဝိညာဏဉ္စာယတနေ စိတ္တံ သဏ္ဌပေဟိ, ဝိညာဏဉ္စာယတနေ စိတ္တံ ဧကောဒိံ ကရောဟိ, ဝိညာဏဉ္စာယတနေ စိတ္တံ သမာဒဟာ’တိ. သော ခွါဟံ, အာဝုသော, အပရေန သမယေန သဗ္ဗသော အာကာသာနဉ္စာယတနံ သမတိက္ကမ္မ အနန္တံ ဝိညာဏန္တိ ဝိညာဏဉ္စာယတနံ ဥပသမ္ပဇ္ဇ ဝိဟာသိံ. ယဉှိ တံ, အာဝုသော, သမ္မာ ဝဒမာနော ဝဒေယျ …ပေ… မဟာဘိညတံ ပတ္တော”တိ.
ဆဋ္ဌံ.