10.2 ဒုတိယဘာဏဝါရ
အထ ခေါ ဘဂဝါ ဝေသာလိယံ ယထာဘိရန္တံ ဝိဟရိတွာ ယေန သာဝတ္ထိ တေန စာရိကံ ပက္ကာမိ. အနုပုဗ္ဗေန စာရိကံ စရမာနော ယေန သာဝတ္ထိ တဒဝသရိ. တတြ သုဒံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန ဆဗ္ဗဂ္ဂိယာ ဘိက္ခူ ဘိက္ခုနိယော ကဒ္ဒမောဒကေန ဩသိဉ္စန္တိ— အပ္ပေဝ နာမ အမှေသု သာရဇ္ဇေယျုန္တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဘိက္ခုနာ ဘိက္ခုနိယော ကဒ္ဒမောဒကေန ဩသိဉ္စိတဗ္ဗာ. ယော ဩသိဉ္စေယျ, အာပတ္တိ ဒုက္ကဋဿ. အနုဇာနာမိ, ဘိက္ခဝေ, တဿ ဘိက္ခုနော ဒဏ္ဍကမ္မံ ကာတုန်”တိ. အထ ခေါ ဘိက္ခူနံ ဧတဒဟောသိ— “ကိံ နု ခေါ ဒဏ္ဍကမ္မံ ကာတဗ္ဗန်”တိ? ဘဂဝတော ဧတမတ္ထံ အာရောစေသုံ. “အဝန္ဒိယော သော, ဘိက္ခဝေ, ဘိက္ခု ဘိက္ခုနိသံဃေန ကာတဗ္ဗော”တိ.
တေန ခေါ ပန သမယေန ဆဗ္ဗဂ္ဂိယာ ဘိက္ခူ ကာယံ ဝိဝရိတွာ ဘိက္ခုနီနံ ဒဿေန္တိ …ပေ… ဦရုံ ဝိဝရိတွာ ဘိက္ခုနီနံ ဒဿေန္တိ, အင်္ဂဇာတံ ဝိဝရိတွာ ဘိက္ခုနီနံ ဒဿေန္တိ, ဘိက္ခုနိယော ဩဘာသေန္တိ, ဘိက္ခုနီဟိ သဒ္ဓိံ သမ္ပယောဇေန္တိ— အပ္ပေဝ နာမ အမှေသု သာရဇ္ဇေယျုန္တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဘိက္ခုနာ ကာယော ဝိဝရိတွာ ဘိက္ခုနီနံ ဒဿေတဗ္ဗော, န ဦရု ဝိဝရိတွာ ဘိက္ခုနီနံ ဒဿေတဗ္ဗော, န အင်္ဂဇာတံ ဝိဝရိတွာ ဘိက္ခုနီနံ ဒဿေတဗ္ဗံ, န ဘိက္ခုနိယော ဩဘာသိတဗ္ဗာ, န ဘိက္ခုနီဟိ သဒ္ဓိံ သမ္ပယောဇေတဗ္ဗံ. ယော သမ္ပယောဇေယျ, အာပတ္တိ ဒုက္ကဋဿ. အနုဇာနာမိ, ဘိက္ခဝေ, တဿ ဘိက္ခုနော ဒဏ္ဍကမ္မံ ကာတုန်”တိ. အထ ခေါ ဘိက္ခူနံ ဧတဒဟောသိ— “ကိံ နု ခေါ ဒဏ္ဍကမ္မံ ကာတဗ္ဗန်”တိ? ဘဂဝတော ဧတမတ္ထံ အာရောစေသုံ. “အဝန္ဒိယော သော, ဘိက္ခဝေ, ဘိက္ခု ဘိက္ခုနိသံဃေန ကာတဗ္ဗော”တိ.
တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော ဘိက္ခုံ ကဒ္ဒမောဒကေန ဩသိဉ္စန္တိ— အပ္ပေဝ နာမ အမှေသု သာရဇ္ဇေယျုန္တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဘိက္ခုနိယာ ဘိက္ခု ကဒ္ဒမောဒကေန ဩသိဉ္စိတဗ္ဗော. ယာ ဩသိဉ္စေယျ, အာပတ္တိ ဒုက္ကဋဿ. အနုဇာနာမိ, ဘိက္ခဝေ, တဿာ ဘိက္ခုနိယာ ဒဏ္ဍကမ္မံ ကာတုန်”တိ. အထ ခေါ ဘိက္ခူနံ ဧတဒဟောသိ— “ကိံ နု ခေါ ဒဏ္ဍကမ္မံ ကာတဗ္ဗန်”တိ? ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, အာဝရဏံ ကာတုန်”တိ. အာဝရဏေ ကတေ န အာဒိယန္တိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ဩဝါဒံ ဌပေတုန်”တိ.
တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော ကာယံ ဝိဝရိတွာ ဘိက္ခူနံ ဒဿေန္တိ, ထနံ ဝိဝရိတွာ ဘိက္ခူနံ ဒဿေန္တိ, ဦရုံ ဝိဝရိတွာ ဘိက္ခူနံ ဒဿေန္တိ, အင်္ဂဇာတံ ဝိဝရိတွာ ဘိက္ခူနံ ဒဿေန္တိ, ဘိက္ခူ ဩဘာသေန္တိ, ဘိက္ခူဟိ သဒ္ဓိံ သမ္ပယောဇေန္တိ— အပ္ပေဝ နာမ အမှေသု သာရဇ္ဇေယျုန္တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဘိက္ခုနိယာ ကာယော ဝိဝရိတွာ ဘိက္ခူနံ ဒဿေတဗ္ဗော …ပေ… န ထနော ဝိဝရိတွာ ဘိက္ခူနံ ဒဿေတဗ္ဗော, န ဦရု ဝိဝရိတွာ ဘိက္ခူနံ ဒဿေတဗ္ဗော, န အင်္ဂဇာတံ ဝိဝရိတွာ ဘိက္ခူနံ ဒဿေတဗ္ဗံ, န ဘိက္ခူ ဩဘာသိတဗ္ဗာ, န ဘိက္ခူဟိ သဒ္ဓိံ သမ္ပယောဇေတဗ္ဗံ. ယာ သမ္ပယောဇေယျ, အာပတ္တိ ဒုက္ကဋဿ. အနုဇာနာမိ, ဘိက္ခဝေ, တဿာ ဘိက္ခုနိယာ ဒဏ္ဍကမ္မံ ကာတုန်”တိ.
အထ ခေါ ဘိက္ခူနံ ဧတဒဟောသိ— “ကိံ နု ခေါ ဒဏ္ဍကမ္မံ ကာတဗ္ဗန်”တိ? ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, အာဝရဏံ ကာတုန်”တိ.
အာဝရဏေ ကတေ န အာဒိယန္တိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ဩဝါဒံ ဌပေတုန်”တိ.
အထ ခေါ ဘိက္ခူနံ ဧတဒဟောသိ— “ကပ္ပတိ နု ခေါ ဩဝါဒဋ္ဌပိတာယ ဘိက္ခုနိယာ သဒ္ဓိံ ဥပေါသထံ ကာတုံ, န နု ခေါ ကပ္ပတီ”တိ? ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဩဝါဒဋ္ဌပိတာယ ဘိက္ခုနိယာ သဒ္ဓိံ ဥပေါသထော ကာတဗ္ဗော, ယာဝ န တံ အဓိကရဏံ ဝူပသန္တံ ဟောတီ”တိ.
တေန ခေါ ပန သမယေန အာယသ္မာ ဥဒါယီ ဩဝါဒံ ဌပေတွာ စာရိကံ ပက္ကာမိ. ဘိက္ခုနိယော ဥဇ္ဈာယန္တိ ခိယျန္တိ ဝိပါစေန္တိ— “ကထဉှိ နာမ အယျော ဥဒါယီ ဩဝါဒံ ဌပေတွာ စာရိကံ ပက္ကမိဿတီ”တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဩဝါဒံ ဌပေတွာ စာရိကာ ပက္ကမိတဗ္ဗာ. ယော ပက္ကမေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန ဗာလာ အဗျတ္တာ ဩဝါဒံ ဌပေန္တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဗာလေန အဗျတ္တေန ဩဝါဒေါ ဌပေတဗ္ဗော. ယော ဌပေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန ဘိက္ခူ အဝတ္ထုသ္မိံ အကာရဏေ ဩဝါဒံ ဌပေန္တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, အဝတ္ထုသ္မိံ အကာရဏေ ဩဝါဒေါ ဌပေတဗ္ဗော. ယော ဌပေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန ဘိက္ခူ ဩဝါဒံ ဌပေတွာ ဝိနိစ္ဆယံ န ဒေန္တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဩဝါဒံ ဌပေတွာ ဝိနိစ္ဆယော န ဒါတဗ္ဗော. ယော န ဒဒေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန ဘိက္ခုနိယော ဩဝါဒံ န ဂစ္ဆန္တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဘိက္ခုနိယာ ဩဝါဒေါ န ဂန္တဗ္ဗော. ယာ န ဂစ္ဆေယျ, ယထာဓမ္မော ကာရေတဗ္ဗော”တိ.
တေန ခေါ ပန သမယေန သဗ္ဗော ဘိက္ခုနိသံဃော ဩဝါဒံ ဂစ္ဆတိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ— “ဇာယာယော ဣမာ ဣမေသံ, ဇာရိယော ဣမာ ဣမေသံ, ဣဒါနိ ဣမေ ဣမာဟိ သဒ္ဓိံ အဘိရမိဿန္တီ”တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, သဗ္ဗေန ဘိက္ခုနိသံဃေန ဩဝါဒေါ ဂန္တဗ္ဗော. ဂစ္ဆေယျ စေ, အာပတ္တိ ဒုက္ကဋဿ. အနုဇာနာမိ, ဘိက္ခဝေ, စတူဟိ ပဉ္စဟိ ဘိက္ခုနီဟိ ဩဝါဒံ ဂန္တုန်”တိ.
တေန ခေါ ပန သမယေန စတဿော ပဉ္စ ဘိက္ခုနိယော ဩဝါဒံ ဂစ္ဆန္တိ. မနုဿာ တထေဝ ဥဇ္ဈာယန္တိ ခိယျန္တိ ဝိပါစေန္တိ— “ဇာယာယော ဣမာ ဣမေသံ, ဇာရိယော ဣမာ ဣမေသံ, ဣဒါနိ ဣမေ ဣမာဟိ သဒ္ဓိံ အဘိရမိဿန္တီ”တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, စတူဟိ ပဉ္စဟိ ဘိက္ခုနီဟိ ဩဝါဒေါ ဂန္တဗ္ဗော. ဂစ္ဆေယျုဉ္စေ, အာပတ္တိ ဒုက္ကဋဿ. အနုဇာနာမိ, ဘိက္ခဝေ, ဒွေ တိဿော ဘိက္ခုနိယော ဩဝါဒံ ဂန္တုံ. ဧကံ ဘိက္ခုံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော— ‘ဘိက္ခုနိသံဃော, အယျ, ဘိက္ခုသံဃဿ ပါဒေ ဝန္ဒတိ, ဩဝါဒူပသင်္ကမနဉ္စ ယာစတိ; လဘတု ကိရ, အယျ, ဘိက္ခုနိသံဃော ဩဝါဒူပသင်္ကမနန်’တိ. တေန ဘိက္ခုနာ ပါတိမောက္ခုဒ္ဒေသကော ဥပသင်္ကမိတွာ ဧဝမဿ ဝစနီယော— ‘ဘိက္ခုနိသံဃော, ဘန္တေ, ဘိက္ခုသံဃဿ ပါဒေ ဝန္ဒတိ, ဩဝါဒူပသင်္ကမနဉ္စ ယာစတိ; လဘတု ကိရ, ဘန္တေ, ဘိက္ခုနိသံဃော ဩဝါဒူပသင်္ကမနန်’တိ. ပါတိမောက္ခုဒ္ဒေသကေန ဝတ္တဗ္ဗော— ‘အတ္ထိ ကောစိ ဘိက္ခု ဘိက္ခုနောဝါဒကော သမ္မတော’တိ? သစေ ဟောတိ ကောစိ ဘိက္ခု ဘိက္ခုနောဝါဒကော သမ္မတော, ပါတိမောက္ခုဒ္ဒေသကေန ဝတ္တဗ္ဗော— ‘ဣတ္ထန္နာမော ဘိက္ခု ဘိက္ခုနောဝါဒကော သမ္မတော, တံ ဘိက္ခုနိသံဃော ဥပသင်္ကမတူ’တိ. သစေ န ဟောတိ ကောစိ ဘိက္ခု ဘိက္ခုနောဝါဒကော သမ္မတော, ပါတိမောက္ခုဒ္ဒေသကေန ဝတ္တဗ္ဗော— ‘ကော အာယသ္မာ ဥဿဟတိ ဘိက္ခုနိယော ဩဝဒိတုန်’တိ? သစေ ကောစိ ဥဿဟတိ ဘိက္ခုနိယော ဩဝဒိတုံ, သော စ ဟောတိ အဋ္ဌဟင်္ဂေဟိ သမန္နာဂတော, သမ္မန္နိတွာ ဝတ္တဗ္ဗော— ‘ဣတ္ထန္နာမော ဘိက္ခု ဘိက္ခုနောဝါဒကော သမ္မတော, တံ ဘိက္ခုနိသံဃော ဥပသင်္ကမတူ’တိ. သစေ န ကောစိ ဥဿဟတိ ဘိက္ခုနိယော ဩဝဒိတုံ, ပါတိမောက္ခုဒ္ဒေသကေန ဝတ္တဗ္ဗော— ‘နတ္ထိ ကောစိ ဘိက္ခု ဘိက္ခုနောဝါဒကော သမ္မတော, ပါသာဒိကေန ဘိက္ခုနိသံဃော သမ္ပာဒေတူ’”တိ.
တေန ခေါ ပန သမယေန ဘိက္ခူ ဩဝါဒံ န ဂဏှန္တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဩဝါဒေါ န ဂဟေတဗ္ဗော. ယော န ဂဏှေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန အညတရော ဘိက္ခု ဗာလော ဟောတိ. တံ ဘိက္ခုနိယော ဥပသင်္ကမိတွာ ဧတဒဝေါစုံ— “ဩဝါဒံ, အယျ, ဂဏှာဟီ”တိ. “အဟဉှိ, ဘဂိနီ, ဗာလော; ကထာဟံ ဩဝါဒံ ဂဏှာမီ”တိ? “ဂဏှာဟယျ, ဩဝါဒံ; ဧဝဉှိ ဘဂဝတာ ပညတ္တံ— ဘိက္ခူဟိ ဘိက္ခုနီနံ ဩဝါဒေါ ဂဟေတဗ္ဗော”တိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ဌပေတွာ ဗာလံ, အဝသေသေဟိ ဩဝါဒံ ဂဟေတုန်”တိ.
တေန ခေါ ပန သမယေန အညတရော ဘိက္ခု ဂိလာနော ဟောတိ. တံ ဘိက္ခုနိယော ဥပသင်္ကမိတွာ ဧတဒဝေါစုံ— “ဩဝါဒံ, အယျ, ဂဏှာဟီ”တိ. “အဟဉှိ, ဘဂိနီ, ဂိလာနော; ကထာဟံ ဩဝါဒံ ဂဏှာမီ”တိ? “ဂဏှာဟယျ, ဩဝါဒံ; ဧဝဉှိ ဘဂဝတာ ပညတ္တံ— ဌပေတွာ ဗာလံ, အဝသေသေဟိ ဩဝါဒေါ ဂဟေတဗ္ဗော”တိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ဌပေတွာ ဗာလံ, ဌပေတွာ ဂိလာနံ, အဝသေသေဟိ ဩဝါဒံ ဂဟေတုန်”တိ.
တေန ခေါ ပန သမယေန အညတရော ဘိက္ခု ဂမိကော ဟောတိ. တံ ဘိက္ခုနိယော ဥပသင်္ကမိတွာ ဧတဒဝေါစုံ— “ဩဝါဒံ, အယျ, ဂဏှာဟီ”တိ. “အဟဉှိ, ဘဂိနီ, ဂမိကော; ကထာဟံ ဩဝါဒံ ဂဏှာမီ”တိ? “ဂဏှာဟယျ, ဩဝါဒံ; ဧဝဉှိ ဘဂဝတာ ပညတ္တံ— ဌပေတွာ ဗာလံ, ဌပေတွာ ဂိလာနံ, အဝသေသေဟိ ဩဝါဒေါ ဂဟေတဗ္ဗော”တိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ဌပေတွာ ဗာလံ, ဌပေတွာ ဂိလာနံ, ဌပေတွာ ဂမိကံ, အဝသေသေဟိ ဩဝါဒံ ဂဟေတုန်”တိ.
တေန ခေါ ပန သမယေန အညတရော ဘိက္ခု အရညေ ဝိဟရတိ. တံ ဘိက္ခုနိယော ဥပသင်္ကမိတွာ ဧတဒဝေါစုံ— “ဩဝါဒံ, အယျ, ဂဏှာဟီ”တိ. “အဟဉှိ, ဘဂိနီ, အရညေ ဝိဟရာမိ; ကထာဟံ ဩဝါဒံ ဂဏှာမီ”တိ? “ဂဏှာဟယျ, ဩဝါဒံ; ဧဝဉှိ ဘဂဝတာ ပညတ္တံ— ဌပေတွာ ဗာလံ, ဌပေတွာ ဂိလာနံ, ဌပေတွာ ဂမိကံ, အဝသေသေဟိ ဩဝါဒေါ ဂဟေတဗ္ဗော”တိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, အာရညိကေန ဘိက္ခုနာ ဩဝါဒံ ဂဟေတုံ, သင်္ကေတဉ္စ ကာတုံ— အတြ ပတိဟရိဿာမီ”တိ.
တေန ခေါ ပန သမယေန ဘိက္ခူ ဩဝါဒံ ဂဟေတွာ န အာရောစေန္တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဩဝါဒေါ န အာရောစေတဗ္ဗော. ယော န အာရောစေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန ဘိက္ခူ ဩဝါဒံ ဂဟေတွာ န ပစ္စာဟရန္တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဩဝါဒေါ န ပစ္စာဟရိတဗ္ဗော. ယော န ပစ္စာဟရေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန ဘိက္ခုနိယော သင်္ကေတံ န ဂစ္ဆန္တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဘိက္ခုနိယာ သင်္ကေတံ န ဂန္တဗ္ဗံ. ယာ န ဂစ္ဆေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန ဘိက္ခုနိယော ဒီဃာနိ ကာယဗန္ဓနာနိ ဓာရေန္တိ, တေဟေဝ ဖာသုကာ နာမေန္တိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ …ပေ… သေယျထာပိ ဂိဟိနီ ကာမဘောဂိနိယော”တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဘိက္ခုနိယာ ဒီဃံ ကာယဗန္ဓနံ ဓာရေတဗ္ဗံ. ယာ ဓာရေယျ, အာပတ္တိ ဒုက္ကဋဿ. အနုဇာနာမိ, ဘိက္ခဝေ, ဘိက္ခုနိယာ ဧကပရိယာကတံ ကာယဗန္ဓနံ, န စ တေန ဖာသုကာ နာမေတဗ္ဗာ. ယာ နာမေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန ဘိက္ခုနိယော ဝိလီဝေန ပဋ္ဋေန ဖာသုကာ နာမေန္တိ …ပေ… စမ္မပဋ္ဋေန ဖာသုကာ နာမေန္တိ. ဒုဿပဋ္ဋေန ဖာသုကာ နာမေန္တိ. ဒုဿဝေဏိယာ ဖာသုကာ နာမေန္တိ. ဒုဿဝဋ္ဋိယာ ဖာသုကာ နာမေန္တိ. စောဠပဋ္ဋေန ဖာသုကာ နာမေန္တိ. စောဠဝေဏိယာ ဖာသုကာ နာမေန္တိ. စောဠဝဋ္ဋိယာ ဖာသုကာ နာမေန္တိ. သုတ္တဝေဏိယာ ဖာသုကာ နာမေန္တိ. သုတ္တဝဋ္ဋိယာ ဖာသုကာ နာမေန္တိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ …ပေ… သေယျထာပိ ဂိဟိနီ ကာမဘောဂိနိယော”တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဘိက္ခုနိယာ ဝိလီဝေန ပဋ္ဋေန ဖာသုကာ နာမေတဗ္ဗာ …ပေ… န သုတ္တဝဋ္ဋိယာ ဖာသုကာ နာမေတဗ္ဗာ. ယာ နာမေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန ဘိက္ခုနိယော အဋ္ဌိလ္လေန ဇဃနံ ဃံသာပေန္တိ …ပေ… ဂေါဟနုကေန ဇဃနံ ကောဋ္ဋာပေန္တိ, ဟတ္ထံ ကောဋ္ဋာပေန္တိ, ဟတ္ထကောစ္ဆံ ကောဋ္ဋာပေန္တိ, ပါဒံ ကောဋ္ဋာပေန္တိ, ပါဒကောစ္ဆံ ကောဋ္ဋာပေန္တိ, ဦရုံ ကောဋ္ဋာပေန္တိ, မုခံ ကောဋ္ဋာပေန္တိ, ဒန္တမံသံ ကောဋ္ဋာပေန္တိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ …ပေ… သေယျထာပိ ဂိဟိနီ ကာမဘောဂိနိယော”တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဘိက္ခုနိယာ အဋ္ဌိလ္လေန ဇဃနံ ဃံသာပေတဗ္ဗံ …ပေ… န ဒန္တမံသံ ကောဋ္ဋာပေတဗ္ဗံ. ယာ ကောဋ္ဋာပေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော မုခံ အာလိမ္ပန္တိ …ပေ… မုခံ ဥမ္မဒ္ဒေန္တိ, မုခံ စုဏ္ဏေန္တိ, မနောသိလိကာယ မုခံ လဉ္ဆေန္တိ, အင်္ဂရာဂံ ကရောန္တိ, မုခရာဂံ ကရောန္တိ, အင်္ဂရာဂမုခရာဂံ ကရောန္တိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ …ပေ… သေယျထာပိ ဂိဟိနီ ကာမဘောဂိနိယော”တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဘိက္ခုနိယာ မုခံ အာလိမ္ပိတဗ္ဗံ …ပေ… န မုခံ ဥမ္မဒ္ဒိတဗ္ဗံ, န မုခံ စုဏ္ဏေတဗ္ဗံ, န မနောသိလိကာယ မုခံ လဉ္ဆေတဗ္ဗံ, န အင်္ဂရာဂေါ ကာတဗ္ဗော, န မုခရာဂေါ ကာတဗ္ဗော, န အင်္ဂရာဂမုခရာဂေါ ကာတဗ္ဗော. ယာ ကရေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော အဝင်္ဂံ ကရောန္တိ …ပေ… ဝိသေသကံ ကရောန္တိ, ဩလောကနကေန ဩလောကေန္တိ, သာလောကေ တိဋ္ဌန္တိ; နစ္စံ ကာရာပေန္တိ, ဝေသိံ ဝုဋ္ဌာပေန္တိ, ပါနာဂါရံ ဌပေန္တိ, သူနံ ဌပေန္တိ, အာပဏံ ပသာရေန္တိ, ဝဍ္ဎိံ ပယောဇေန္တိ, ဝဏိဇ္ဇံ ပယောဇေန္တိ, ဒါသံ ဥပဋ္ဌာပေန္တိ, ဒါသိံ ဥပဋ္ဌာပေန္တိ, ကမ္မကာရံ ဥပဋ္ဌာပေန္တိ, ကမ္မကာရိံ ဥပဋ္ဌာပေန္တိ, တိရစ္ဆာနဂတံ ဥပဋ္ဌာပေန္တိ, ဟရီတကပက္ကိကံ ပကိဏန္တိ, နမတကံ ဓာရေန္တိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ …ပေ… သေယျထာပိ ဂိဟိနီ ကာမဘောဂိနိယော”တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဘိက္ခုနိယာ အဝင်္ဂံ ကာတဗ္ဗံ …ပေ… န ဝိသေသကံ ကာတဗ္ဗံ, န ဩလောကနကေန ဩလောကေတဗ္ဗံ, န သာလောကေ ဌာတဗ္ဗံ, န နစ္စံ ကာရာပေတဗ္ဗံ, န ဝေသီ ဝုဋ္ဌာပေတဗ္ဗာ, န ပါနာဂါရံ ဌပေတဗ္ဗံ, န သူနာ ဌပေတဗ္ဗာ, န အာပဏော ပသာရေတဗ္ဗော, န ဝဍ္ဎိ ပယောဇေတဗ္ဗာ, န ဝဏိဇ္ဇာ ပယောဇေတဗ္ဗာ, န ဒါသော ဥပဋ္ဌာပေတဗ္ဗော, န ဒါသီ ဥပဋ္ဌာပေတဗ္ဗာ, န ကမ္မကာရော ဥပဋ္ဌာပေတဗ္ဗော, န ကမ္မကာရီ ဥပဋ္ဌာပေတဗ္ဗာ, န တိရစ္ဆာနဂတော ဥပဋ္ဌာပေတဗ္ဗော, န ဟရီတကပက္ကိကံ ပကိဏိတဗ္ဗံ, န နမတကံ ဓာရေတဗ္ဗံ. ယာ ဓာရေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော သဗ္ဗနီလကာနိ စီဝရာနိ ဓာရေန္တိ …ပေ… သဗ္ဗပီတကာနိ စီဝရာနိ ဓာရေန္တိ, သဗ္ဗလောဟိတကာနိ စီဝရာနိ ဓာရေန္တိ, သဗ္ဗမဉ္ဇိဋ္ဌိကာနိ စီဝရာနိ ဓာရေန္တိ, သဗ္ဗကဏှာနိ စီဝရာနိ ဓာရေန္တိ, သဗ္ဗမဟာရင်္ဂရတ္တာနိ စီဝရာနိ ဓာရေန္တိ, သဗ္ဗမဟာနာမရတ္တာနိ စီဝရာနိ ဓာရေန္တိ, အစ္ဆိန္နဒသာနိ စီဝရာနိ ဓာရေန္တိ, ဒီဃဒသာနိ စီဝရာနိ ဓာရေန္တိ, ပုပ္ဖဒသာနိ စီဝရာနိ ဓာရေန္တိ, ဖလဒသာနိ စီဝရာနိ ဓာရေန္တိ, ကဉ္စုကံ ဓာရေန္တိ, တိရီဋကံ ဓာရေန္တိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ …ပေ… သေယျထာပိ ဂိဟိနီ ကာမဘောဂိနိယော”တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဘိက္ခုနိယာ သဗ္ဗနီလကာနိ စီဝရာနိ ဓာရေတဗ္ဗာနိ …ပေ… န တိရီဋကံ ဓာရေတဗ္ဗံ. ယာ ဓာရေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန အညတရာ ဘိက္ခုနီ ကာလံ ကရောန္တီ ဧဝမာဟ— “မမစ္စယေန မယှံ ပရိက္ခာရော သံဃဿ ဟောတူ”တိ. တတ္ထ ဘိက္ခူ စ ဘိက္ခုနိယော စ ဝိဝဒန္တိ— “အမှာကံ ဟောတိ, အမှာကံ ဟောတီ”တိ. ဘဂဝတော ဧတမတ္ထံ အာရောစေသုံ. “ဘိက္ခုနီ စေ, ဘိက္ခဝေ, ကာလံ ကရောန္တီ ဧဝံ ဝဒေယျ— ‘မမစ္စယေန မယှံ ပရိက္ခာရော သံဃဿ ဟောတူ’တိ, အနိဿရော တတ္ထ ဘိက္ခုသံဃော, ဘိက္ခုနိသံဃဿေဝေတံ. သိက္ခမာနာ စေ, ဘိက္ခဝေ …ပေ… သာမဏေရီ စေ, ဘိက္ခဝေ, ကာလံ ကရောန္တီ ဧဝံ ဝဒေယျ— ‘မမစ္စယေန မယှံ ပရိက္ခာရော သံဃဿ ဟောတူ’တိ, အနိဿရော တတ္ထ ဘိက္ခုသံဃော, ဘိက္ခုနိသံဃဿေဝေတံ. ဘိက္ခု စေ, ဘိက္ခဝေ, ကာလံ ကရောန္တော ဧဝံ ဝဒေယျ— ‘မမစ္စယေန မယှံ ပရိက္ခာရော သံဃဿ ဟောတူ’တိ, အနိဿရော တတ္ထ ဘိက္ခုနိသံဃော, ဘိက္ခုသံဃဿေဝေတံ. သာမဏေရော စေ, ဘိက္ခဝေ …ပေ… ဥပါသကော စေ, ဘိက္ခဝေ …ပေ… ဥပါသိကာ စေ, ဘိက္ခဝေ …ပေ… အညော စေ, ဘိက္ခဝေ, ကောစိ ကာလံ ကရောန္တော ဧဝံ ဝဒေယျ— ‘မမစ္စယေန မယှံ ပရိက္ခာရော သံဃဿ ဟောတူ’တိ, အနိဿရော တတ္ထ ဘိက္ခုနိသံဃော, ဘိက္ခုသံဃဿေဝေတန်”တိ.
တေန ခေါ ပန သမယေန အညတရာ ဣတ္ထီ ပုရာဏမလ္လီ ဘိက္ခုနီသု ပဗ္ဗဇိတာ ဟောတိ. သာ ရထိကာယ ဒုဗ္ဗလကံ ဘိက္ခုံ ပဿိတွာ အံသကူဋေန ပဟာရံ ဒတွာ ပါတေသိ. ဘိက္ခူ ဥဇ္ဈာယန္တိ ခိယျန္တိ ဝိပါစေန္တိ— “ကထဉှိ နာမ, ဘိက္ခုနီ, ဘိက္ခုဿ ပဟာရံ ဒဿတီ”တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဘိက္ခုနိယာ ဘိက္ခုဿ ပဟာရော ဒါတဗ္ဗော. ယာ ဒဒေယျ, အာပတ္တိ ဒုက္ကဋဿ. အနုဇာနာမိ, ဘိက္ခဝေ, ဘိက္ခုနိယာ ဘိက္ခုံ ပဿိတွာ ဒူရတောဝ ဩက္ကမိတွာ မဂ္ဂံ ဒါတုန်”တိ.
တေန ခေါ ပန သမယေန အညတရာ ဣတ္ထီ ပဝုတ္ထပတိကာ ဇာရေန ဂဗ္ဘိနီ ဟောတိ. သာ ဂဗ္ဘံ ပါတေတွာ ကုလူပိကံ ဘိက္ခုနိံ ဧတဒဝေါစ— “ဟန္ဒယျေ, ဣမံ ဂဗ္ဘံ ပတ္တေန နီဟရာ”တိ. အထ ခေါ သာ ဘိက္ခုနီ တံ ဂဗ္ဘံ ပတ္တေ ပက္ခိပိတွာ သင်္ဃာဋိယာ ပဋိစ္ဆာဒေတွာ အဂမာသိ. တေန ခေါ ပန သမယေန အညတရေန ပိဏ္ဍစာရိကေန ဘိက္ခုနာ သမာဒါနံ ကတံ ဟောတိ— “ယာဟံ ပဌမံ ဘိက္ခံ လဘိဿာမိ, န တံ အဒတွာ ဘိက္ခုဿ ဝါ ဘိက္ခုနိယာ ဝါ ပရိဘုဉ္ဇိဿာမီ”တိ. အထ ခေါ သော ဘိက္ခု တံ ဘိက္ခုနိံ ပဿိတွာ ဧတဒဝေါစ— “ဟန္ဒ, ဘဂိနိ, ဘိက္ခံ ပဋိဂ္ဂဏှာ”တိ. “အလံ, အယျာ”တိ.
ဒုတိယမ္ပိ ခေါ …ပေ… တတိယမ္ပိ ခေါ သော ဘိက္ခု တံ ဘိက္ခုနိံ ဧတဒဝေါစ— “ဟန္ဒ, ဘဂိနိ, ဘိက္ခံ ပဋိဂ္ဂဏှာ”တိ. “အလံ, အယျာ”တိ. “မယာ ခေါ, ဘဂိနိ, သမာဒါနံ ကတံ— ‘ယာဟံ ပဌမံ ဘိက္ခံ လဘိဿာမိ, န တံ အဒတွာ ဘိက္ခုဿ ဝါ ဘိက္ခုနိယာ ဝါ ပရိဘုဉ္ဇိဿာမီ’တိ. ဟန္ဒ, ဘဂိနိ, ဘိက္ခံ ပဋိဂ္ဂဏှာ”တိ. အထ ခေါ သာ ဘိက္ခုနီ တေန ဘိက္ခုနာ နိပ္ပီဠိယမာနာ နီဟရိတွာ ပတ္တံ ဒဿေသိ— “ပဿ, အယျ, ပတ္တေ ဂဗ္ဘံ; မာ စ ကဿစိ အာရောစေသီ”တိ. အထ ခေါ သော ဘိက္ခု ဥဇ္ဈာယတိ ခိယျတိ ဝိပါစေတိ— “ကထဉှိ နာမ ဘိက္ခုနီ ပတ္တေန ဂဗ္ဘံ နီဟရိဿတီ”တိ. အထ ခေါ သော ဘိက္ခု ဘိက္ခူနံ ဧတမတ္ထံ အာရောစေသိ. ယေ တေ ဘိက္ခူ အပ္ပိစ္ဆာ …ပေ… တေ ဥဇ္ဈာယန္တိ ခိယျန္တိ ဝိပါစေန္တိ— “ကထဉှိ နာမ ဘိက္ခုနီ ပတ္တေန ဂဗ္ဘံ နီဟရိဿတီ”တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဘိက္ခုနိယာ ပတ္တေန ဂဗ္ဘော နီဟရိတဗ္ဗော. ယာ နီဟရေယျ, အာပတ္တိ ဒုက္ကဋဿ. အနုဇာနာမိ, ဘိက္ခဝေ, ဘိက္ခုနိယာ ဘိက္ခုံ ပဿိတွာ နီဟရိတွာ ပတ္တံ ဒဿေတုန်”တိ.
တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော ဘိက္ခုံ ပဿိတွာ ပရိဝတ္တေတွာ ပတ္တမူလံ ဒဿေန္တိ. ဘိက္ခူ ဥဇ္ဈာယန္တိ ခိယျန္တိ ဝိပါစေန္တိ— “ကထဉှိ နာမ ဆဗ္ဗဂ္ဂိယာ ဘိက္ခုနိယော ဘိက္ခုံ ပဿိတွာ ပရိဝတ္တေတွာ ပတ္တမူလံ ဒဿေဿန္တီ”တိ. အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဘိက္ခုနိယာ ဘိက္ခုံ ပဿိတွာ ပရိဝတ္တေတွာ ပတ္တမူလံ ဒဿေတဗ္ဗံ. ယာ ဒဿေယျ, အာပတ္တိ ဒုက္ကဋဿ. အနုဇာနာမိ, ဘိက္ခဝေ, ဘိက္ခုနိယာ ဘိက္ခုံ ပဿိတွာ ဥက္ကုဇ္ဇိတွာ ပတ္တံ ဒဿေတုံ. ယဉ္စ ပတ္တေ အာမိသံ ဟောတိ, တေန စ ဘိက္ခု နိမန္တေတဗ္ဗော”တိ.
တေန ခေါ ပန သမယေန သာဝတ္ထိယံ ရထိကာယ ပုရိသဗျဉ္ဇနံ ဆဍ္ဍိတံ ဟောတိ. တံ ဘိက္ခုနိယော သက္ကစ္စံ ဥပနိဇ္ဈာယိံသု. မနုဿာ ဥက္ကုဋ္ဌိံ အကံသု. တာ ဘိက္ခုနိယော မင်္ကူ အဟေသုံ. အထ ခေါ တာ ဘိက္ခုနိယော ဥပဿယံ ဂန္တွာ ဘိက္ခုနီနံ ဧတမတ္ထံ အာရောစေသုံ. ယာ တာ ဘိက္ခုနိယော အပ္ပိစ္ဆာ …ပေ… တာ ဥဇ္ဈာယန္တိ ခိယျန္တိ ဝိပါစေန္တိ— “ကထဉှိ နာမ ဘိက္ခုနိယော ပုရိသဗျဉ္ဇနံ ဥပနိဇ္ဈာယိဿန္တီ”တိ. အထ ခေါ တာ ဘိက္ခုနိယော ဘိက္ခူနံ ဧတမတ္ထံ အာရောစေသုံ. ဘိက္ခူ ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဘိက္ခုနိယာ ပုရိသဗျဉ္ဇနံ ဥပနိဇ္ဈာယိတဗ္ဗံ. ယာ ဥပနိဇ္ဈာယေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန မနုဿာ ဘိက္ခူနံ အာမိသံ ဒေန္တိ. ဘိက္ခူ ဘိက္ခုနီနံ ဒေန္တိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ— “ကထဉှိ နာမ ဘဒန္တာ အတ္တနော ပရိဘောဂတ္ထာယ ဒိန္နံ အညေသံ ဒဿန္တိ. မယမ္ပိ န ဇာနာမ ဒါနံ ဒါတုန်”တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, အတ္တနော ပရိဘောဂတ္ထာယ ဒိန္နံ အညေသံ ဒါတဗ္ဗံ. ယော ဒဒေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန ဘိက္ခူနံ အာမိသံ ဥဿန္နံ ဟောတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, သံဃဿ ဒါတုန်”တိ. ဗာဠှတရံ ဥဿန္နံ ဟောတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ပုဂ္ဂလိကမ္ပိ ဒါတုန်”တိ.
တေန ခေါ ပန သမယေန ဘိက္ခူနံ သန္နိဓိကတံ အာမိသံ ဥဿန္နံ ဟောတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ဘိက္ခူနံ သန္နိဓိံ ဘိက္ခုနီဟိ ပဋိဂ္ဂါဟာပေတွာ ပရိဘုဉ္ဇိတုန်”တိ.
တေန ခေါ ပန သမယေန မနုဿာ ဘိက္ခုနီနံ အာမိသံ ဒေန္တိ. ဘိက္ခုနိယော ဘိက္ခူနံ ဒေန္တိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ— “ကထဉှိ နာမ ဘိက္ခုနိယော အတ္တနော ပရိဘောဂတ္ထာယ ဒိန္နံ အညေသံ ဒဿန္တိ. မယမ္ပိ န ဇာနာမ ဒါနံ ဒါတုန်”တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဘိက္ခုနိယာ အတ္တနော ပရိဘောဂတ္ထာယ ဒိန္နံ အညေသံ ဒါတဗ္ဗံ. ယာ ဒဒေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန ဘိက္ခုနီနံ အာမိသံ ဥဿန္နံ ဟောတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, သံဃဿ ဒါတုန်”တိ. ဗာဠှတရံ ဥဿန္နံ ဟောတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ပုဂ္ဂလိကမ္ပိ ဒါတုန်”တိ.
တေန ခေါ ပန သမယေန ဘိက္ခုနီနံ သန္နိဓိကတံ အာမိသံ ဥဿန္နံ ဟောတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ဘိက္ခုနီနံ သန္နိဓိံ ဘိက္ခူဟိ ပဋိဂ္ဂါဟာပေတွာ ပရိဘုဉ္ဇိတုန်”တိ.
တေန ခေါ ပန သမယေန ဘိက္ခူနံ သေနာသနံ ဥဿန္နံ ဟောတိ, ဘိက္ခုနီနံ န ဟောတိ. ဘိက္ခုနိယော ဘိက္ခူနံ သန္တိကေ ဒူတံ ပါဟေသုံ— “သာဓု, ဘန္တေ, အယျာ အမှာကံ သေနာသနံ ဒေန္တု တာဝကာလိကန်”တိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ဘိက္ခုနီနံ သေနာသနံ ဒါတုံ တာဝကာလိကန်”တိ.
တေန ခေါ ပန သမယေန ဥတုနိယော ဘိက္ခုနိယော ဩနဒ္ဓမဉ္စံ ဩနဒ္ဓပီဌံ အဘိနိသီဒန္တိပိ အဘိနိပဇ္ဇန္တိပိ. သေနာသနံ လောဟိတေန မက္ခိယျတိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဘိက္ခုနိယာ ဩနဒ္ဓမဉ္စံ ဩနဒ္ဓပီဌံ အဘိနိသီဒိတဗ္ဗံ အဘိနိပဇ္ဇိတဗ္ဗံ. ယာ အဘိနိသီဒေယျ ဝါ အဘိနိပဇ္ဇေယျ ဝါ အာပတ္တိ ဒုက္ကဋဿ. အနုဇာနာမိ, ဘိက္ခဝေ, အာဝသထစီဝရန်”တိ. အာဝသထစီဝရံ လောဟိတေန မက္ခိယျတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, အာဏိစောဠကန်”တိ. စောဠကံ နိပတတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, သုတ္တကေန ဗန္ဓိတွာ ဦရုယာ ဗန္ဓိတုန်”တိ. သုတ္တံ ဆိဇ္ဇတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, သံဝေလ္လိယံ, ကဋိသုတ္တကန်”တိ.
တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော သဗ္ဗကာလံ ကဋိသုတ္တကံ ဓာရေန္တိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ— “သေယျထာပိ ဂိဟိနီ ကာမဘောဂိနိယော”တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဘိက္ခုနိယာ သဗ္ဗကာလံ ကဋိသုတ္တကံ ဓာရေတဗ္ဗံ. ယာ ဓာရေယျ, အာပတ္တိ ဒုက္ကဋဿ. အနုဇာနာမိ, ဘိက္ခဝေ, ဥတုနိယာ ကဋိသုတ္တကန်”တိ.
ဒုတိယဘာဏဝါရော နိဋ္ဌိတော.