12.1 ပဌမဘာဏဝါရ
တေန ခေါ ပန သမယေန ဝဿသတပရိနိဗ္ဗုတေ ဘဂဝတိ ဝေသာလိကာ ဝဇ္ဇိပုတ္တကာ ဘိက္ခူ ဝေသာလိယံ ဒသ ဝတ္ထူနိ ဒီပေန္တိ— ကပ္ပတိ သိင်္ဂိလောဏကပ္ပေါ, ကပ္ပတိ ဒွင်္ဂုလကပ္ပေါ, ကပ္ပတိ ဂါမန္တရကပ္ပေါ, ကပ္ပတိ အာဝါသကပ္ပေါ, ကပ္ပတိ အနုမတိကပ္ပေါ, ကပ္ပတိ အာစိဏ္ဏကပ္ပေါ, ကပ္ပတိ အမထိတကပ္ပေါ, ကပ္ပတိ ဇဠောဂိံ ပါတုံ, ကပ္ပတိ အဒသကံ နိသီဒနံ, ကပ္ပတိ ဇာတရူပရဇတန္တိ.
တေန ခေါ ပန သမယေန အာယသ္မာ ယသော ကာကဏ္ဍကပုတ္တော ဝဇ္ဇီသု စာရိကံ စရမာနော ယေန ဝေသာလီ တဒဝသရိ. တတြ သုဒံ အာယသ္မာ ယသော ကာကဏ္ဍကပုတ္တော ဝေသာလိယံ ဝိဟရတိ မဟာဝနေ ကူဋာဂါရသာလာယံ. တေန ခေါ ပန သမယေန ဝေသာလိကာ ဝဇ္ဇိပုတ္တကာ ဘိက္ခူ တဒဟုပေါသထေ ကံသပါတိံ ဥဒကေန ပူရေတွာ မဇ္ဈေ ဘိက္ခုသံဃဿ ဌပေတွာ အာဂတာဂတေ ဝေသာလိကေ ဥပါသကေ ဧဝံ ဝဒန္တိ— “ဒေထာဝုသော, သံဃဿ ကဟာပဏမ္ပိ အဍ္ဎမ္ပိ ပါဒမ္ပိ မာသကရူပမ္ပိ. ဘဝိဿတိ သံဃဿ ပရိက္ခာရေန ကရဏီယန်”တိ. ဧဝံ ဝုတ္တေ, အာယသ္မာ ယသော ကာကဏ္ဍကပုတ္တော ဝေသာလိကေ ဥပါသကေ ဧတဒဝေါစ— “မာဝုသော, အဒတ္ထ သံဃဿ ကဟာပဏမ္ပိ အဍ္ဎမ္ပိ ပါဒမ္ပိ မာသကရူပမ္ပိ. န ကပ္ပတိ သမဏာနံ သကျပုတ္တိယာနံ ဇာတရူပရဇတံ; န သာဒိယန္တိ သမဏာ သကျပုတ္တိယာ ဇာတရူပရဇတံ; န ပဋိဂ္ဂဏှန္တိ သမဏာ သကျပုတ္တိယာ ဇာတရူပရဇတံ; နိက္ခိတ္တမဏိသုဝဏ္ဏာ သမဏာ သကျပုတ္တိယာ အပေတဇာတရူပရဇတာ”တိ. ဧဝမ္ပိ ခေါ ဝေသာလိကာ ဥပါသကာ အာယသ္မတာ ယသေန ကာကဏ္ဍကပုတ္တေန ဝုစ္စမာနာ အဒံသုယေဝ သံဃဿ ကဟာပဏမ္ပိ အဍ္ဎမ္ပိ ပါဒမ္ပိ မာသကရူပမ္ပိ.
အထ ခေါ ဝေသာလိကာ ဝဇ္ဇိပုတ္တကာ ဘိက္ခူ တဿာ ရတ္တိယာ အစ္စယေန တံ ဟိရညံ ဘိက္ခဂ္ဂေန ပဋိဝီသံ ဌပေတွာ ဘာဇေသုံ. အထ ခေါ ဝေသာလိကာ ဝဇ္ဇိပုတ္တကာ ဘိက္ခူ အာယသ္မန္တံ ယသံ ကာကဏ္ဍကပုတ္တံ ဧတဒဝေါစုံ— “ဧသော တေ, အာဝုသော ယသ, ဟိရညဿ ပဋိဝီသော”တိ. “နတ္ထိ မေ, အာဝုသော, ဟိရညဿ ပဋိဝီသော, နာဟံ ဟိရညံ သာဒိယာမီ”တိ. အထ ခေါ ဝေသာလိကာ ဝဇ္ဇိပုတ္တကာ ဘိက္ခူ— “အယံ, အာဝုသော, ယသော ကာကဏ္ဍကပုတ္တော ဥပါသကေ သဒ္ဓေ ပသန္နေ အက္ကောသတိ, ပရိဘာသတိ, အပ္ပသာဒံ ကရောတိ; ဟန္ဒဿ မယံ ပဋိသာရဏီယကမ္မံ ကရောမာ”တိ တေ တဿ ပဋိသာရဏီယကမ္မံ အကံသု. အထ ခေါ အာယသ္မာ ယသော ကာကဏ္ဍကပုတ္တော ဝေသာလိကေ ဝဇ္ဇိပုတ္တကေ ဘိက္ခူ ဧတဒဝေါစ— “ဘဂဝတာ, အာဝုသော, ပညတ္တံ— ‘ပဋိသာရဏီယကမ္မကတဿ ဘိက္ခုနော အနုဒူတော ဒါတဗ္ဗော’တိ. ဒေထ မေ, အာဝုသော, အနုဒူတံ ဘိက္ခုန်”တိ.
အထ ခေါ ဝေသာလိကာ ဝဇ္ဇိပုတ္တကာ ဘိက္ခူ ဧကံ ဘိက္ခုံ သမ္မန္နိတွာ အာယသ္မတော ယသဿ ကာကဏ္ဍကပုတ္တဿ အနုဒူတံ အဒံသု. အထ ခေါ အာယသ္မာ ယသော ကာကဏ္ဍကပုတ္တော အနုဒူတေန ဘိက္ခုနာ သဒ္ဓိံ ဝေသာလိံ ပဝိသိတွာ ဝေသာလိကေ ဥပါသကေ ဧတဒဝေါစ— “အဟံ ကိရာယသ္မန္တေ ဥပါသကေ သဒ္ဓေ ပသန္နေ အက္ကောသာမိ, ပရိဘာသာမိ, အပ္ပသာဒံ ကရောမိ; ယောဟံ အဓမ္မံ အဓမ္မောတိ ဝဒါမိ, ဓမ္မံ ဓမ္မောတိ ဝဒါမိ, အဝိနယံ အဝိနယောတိ ဝဒါမိ, ဝိနယံ ဝိနယောတိ ဝဒါမိ.
ဧကမိဒံ, အာဝုသော, သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တတြ ခေါ, အာဝုသော, ဘဂဝါ ဘိက္ခူ အာမန္တေသိ— ‘စတ္တာရောမေ, ဘိက္ခဝေ, စန္ဒိမသူရိယာနံ ဥပက္ကိလေသာ, ယေဟိ ဥပက္ကိလေသေဟိ ဥပက္ကိလိဋ္ဌာ စန္ဒိမသူရိယာ န တပန္တိ, န ဘာသန္တိ, န ဝိရောစန္တိ. ကတမေ စတ္တာရော? အဗ္ဘံ, ဘိက္ခဝေ, စန္ဒိမသူရိယာနံ ဥပက္ကိလေသော, ယေန ဥပက္ကိလေသေန ဥပက္ကိလိဋ္ဌာ စန္ဒိမသူရိယာ န တပန္တိ, န ဘာသန္တိ န ဝိရောစန္တိ. မဟိကာ, ဘိက္ခဝေ, စန္ဒိမသူရိယာနံ ဥပက္ကိလေသော, ယေန ဥပက္ကိလေသေန ဥပက္ကိလိဋ္ဌာ စန္ဒိမသူရိယာ န တပန္တိ, န ဘာသန္တိ, န ဝိရောစန္တိ, ဓူမရဇော, ဘိက္ခဝေ, စန္ဒိမသူရိယာနံ ဥပက္ကိလေသော, ယေန ဥပက္ကိလေသေန ဥပက္ကိလိဋ္ဌာ စန္ဒိမသူရိယာ န တပန္တိ, န ဘာသန္တိ, န ဝိရောစန္တိ. ရာဟု, ဘိက္ခဝေ, အသုရိန္ဒော စန္ဒိမသူရိယာနံ ဥပက္ကိလေသော, ယေန ဥပက္ကိလေသေန ဥပက္ကိလိဋ္ဌာ စန္ဒိမသူရိယာ န တပန္တိ, န ဘာသန္တိ, န ဝိရောစန္တိ. ဣမေ ခေါ, ဘိက္ခဝေ, စတ္တာရော စန္ဒိမသူရိယာနံ ဥပက္ကိလေသာ, ယေဟိ ဥပက္ကိလေသေဟိ ဥပက္ကိလိဋ္ဌာ စန္ဒိမသူရိယာ န တပန္တိ, န ဘာသန္တိ, န ဝိရောစန္တိ. ဧဝမေဝ ခေါ, ဘိက္ခဝေ, စတ္တာရောမေ သမဏဗြာဟ္မဏာနံ ဥပက္ကိလေသာ, ယေဟိ ဥပက္ကိလေသေဟိ ဥပက္ကိလိဋ္ဌာ ဧကေ သမဏဗြာဟ္မဏာ န တပန္တိ, န ဘာသန္တိ, န ဝိရောစန္တိ. ကတမေ စတ္တာရော? သန္တိ, ဘိက္ခဝေ, ဧကေ သမဏဗြာဟ္မဏာ သုရံ ပိဝန္တိ, မေရယံ ပိဝန္တိ, သုရာမေရယပါနာ အပ္ပဋိဝိရတာ— အယံ, ဘိက္ခဝေ, ပဌမော သမဏဗြာဟ္မဏာနံ ဥပက္ကိလေသော, ယေန ဥပက္ကိလေသေန ဥပက္ကိလိဋ္ဌာ ဧကေ သမဏဗြာဟ္မဏာ န တပန္တိ, န ဘာသန္တိ, န ဝိရောစန္တိ. ပုန စပရံ, ဘိက္ခဝေ, ဧကေ သမဏဗြာဟ္မဏာ မေထုနံ ဓမ္မံ ပဋိသေဝန္တိ, မေထုနဓမ္မာ အပ္ပဋိဝိရတာ— အယံ, ဘိက္ခဝေ, ဒုတိယော သမဏဗြာဟ္မဏာနံ ဥပက္ကိလေသော, ယေန ဥပက္ကိလေသေန ဥပက္ကိလိဋ္ဌာ ဧကေ သမဏဗြာဟ္မဏာ န တပန္တိ, န ဘာသန္တိ, န ဝိရောစန္တိ. ပုန စပရံ, ဘိက္ခဝေ, ဧကေ သမဏဗြာဟ္မဏာ ဇာတရူပရဇတံ သာဒိယန္တိ, ဇာတရူပရဇတပ္ပဋိဂ္ဂဟဏာ အပ္ပဋိဝိရတာ— အယံ, ဘိက္ခဝေ, တတိယော သမဏဗြာဟ္မဏာနံ ဥပက္ကိလေသော, ယေန ဥပက္ကိလေသေန ဥပက္ကိလိဋ္ဌာ ဧကေ သမဏဗြာဟ္မဏာ န တပန္တိ, န ဘာသန္တိ, န ဝိရောစန္တိ. ပုန စပရံ, ဘိက္ခဝေ, ဧကေ သမဏဗြာဟ္မဏာ မိစ္ဆာဇီဝေန ဇီဝိတံ ကပ္ပေန္တိ; မိစ္ဆာဇီဝါ အပ္ပဋိဝိရတာ— အယံ, ဘိက္ခဝေ, စတုတ္ထော သမဏဗြာဟ္မဏာနံ ဥပက္ကိလေသော, ယေန ဥပက္ကိလေသေန ဥပက္ကိလိဋ္ဌာ ဧကေ သမဏဗြာဟ္မဏာ န တပန္တိ, န ဘာသန္တိ, န ဝိရောစန္တိ. ဣမေ ခေါ, ဘိက္ခဝေ, စတ္တာရော သမဏဗြာဟ္မဏာနံ ဥပက္ကိလေသာ, ယေဟိ ဥပက္ကိလေသေဟိ ဥပက္ကိလိဋ္ဌာ ဧကေ သမဏဗြာဟ္မဏာ န တပန္တိ, န ဘာသန္တိ, န ဝိရောစန္တိ’. ဣဒမဝေါစာဝုသော, ဘဂဝါ. ဣဒံ ဝတွာန သုဂတော အထာပရံ ဧတဒဝေါစ သတ္ထာ—
‘ရာဂဒေါသပရိက္လိဋ္ဌာ,
ဧကေ သမဏဗြာဟ္မဏာ;
အဝိဇ္ဇာနိဝုဋာ ပေါသာ,
ပိယရူပါဘိနန္ဒိနော.
သုရံ ပိဝန္တိ မေရယံ,
ပဋိသေဝန္တိ မေထုနံ;
ရဇတံ ဇာတရူပဉ္စ,
သာဒိယန္တိ အဝိဒ္ဒသူ.
မိစ္ဆာဇီဝေန ဇီဝန္တိ,
ဧကေ သမဏဗြာဟ္မဏာ;
ဧတေ ဥပက္ကိလေသာ ဝုတ္တာ,
ဗုဒ္ဓေနာဒိစ္စဗန္ဓုနာ.
ယေဟိ ဥပက္ကိလေသေဟိ ဥပက္ကိလိဋ္ဌာ,
ဧကေ သမဏဗြာဟ္မဏာ;
န တပန္တိ န ဘာသန္တိ,
အသုဒ္ဓါ သရဇာ မဂါ.
အန္ဓကာရေန ဩနဒ္ဓါ,
တဏှာဒါသာ သနေတ္တိကာ;
ဝဍ္ဎေန္တိ ကဋသိံ ဃောရံ,
အာဒိယန္တိ ပုနဗ္ဘဝန်’တိ.
ဧဝံဝါဒီ ကိရာဟံ အာယသ္မန္တေ ဥပါသကေ သဒ္ဓေ ပသန္နေ အက္ကောသာမိ, ပရိဘာသာမိ, အပ္ပသာဒံ ကရောမိ; ယောဟံ အဓမ္မံ အဓမ္မောတိ ဝဒါမိ, ဓမ္မံ ဓမ္မောတိ ဝဒါမိ, အဝိနယံ အဝိနယောတိ ဝဒါမိ, ဝိနယံ ဝိနယောတိ ဝဒါမိ.
ဧကမိဒံ, အာဝုသော, သမယံ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ. တေန ခေါ ပန သမယေန ရာဇန္တေပုရေ ရာဇပရိသာယံ သန္နိသိန္နာနံ သန္နိပတိတာနံ အယမန္တရကထာ ဥဒပါဒိ— ‘ကပ္ပတိ သမဏာနံ သကျပုတ္တိယာနံ ဇာတရူပရဇတံ; သာဒိယန္တိ သမဏာ သကျပုတ္တိယာ ဇာတရူပရဇတံ; ပဋိဂ္ဂဏှန္တိ သမဏာ သကျပုတ္တိယာ ဇာတရူပရဇတန်’တိ. တေန ခေါ ပနာဝုသော, သမယေန မဏိစူဠကော ဂါမဏီ တဿံ ပရိသာယံ နိသိန္နော ဟောတိ. အထ ခေါ, အာဝုသော, မဏိစူဠကော ဂါမဏီ တံ ပရိသံ ဧတဒဝေါစ— ‘မာ, အယျာ, ဧဝံ အဝစုတ္ထ. န ကပ္ပတိ သမဏာနံ သကျပုတ္တိယာနံ ဇာတရူပရဇတံ; န သာဒိယန္တိ သမဏာ သကျပုတ္တိယာ ဇာတရူပရဇတံ; န ပဋိဂ္ဂဏှန္တိ သမဏာ သကျပုတ္တိယာ ဇာတရူပရဇတံ; နိက္ခိတ္တမဏိသုဝဏ္ဏာ သမဏာ သကျပုတ္တိယာ အပေတဇာတရူပရဇတာ’တိ. အသက္ခိ ခေါ, အာဝုသော, မဏိစူဠကော ဂါမဏီ တံ ပရိသံ သညာပေတုံ.
အထ ခေါ, အာဝုသော, မဏိစူဠကော ဂါမဏီ တံ ပရိသံ သညာပေတွာ ယေန ဘဂဝါ တေနုပသင်္ကမိ, ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ, အာဝုသော, မဏိစူဠကော ဂါမဏီ ဘဂဝန္တံ ဧတဒဝေါစ— ‘ဣဓ, ဘန္တေ, ရာဇန္တေပုရေ ရာဇပရိသာယံ သန္နိသိန္နာနံ သန္နိပတိတာနံ အယမန္တရကထာ ဥဒပါဒိ— ကပ္ပတိ သမဏာနံ သကျပုတ္တိယာနံ ဇာတရူပရဇတံ; သာဒိယန္တိ သမဏာ သကျပုတ္တိယာ ဇာတရူပရဇတံ; ပဋိဂ္ဂဏှန္တိ သမဏာ သကျပုတ္တိယာ ဇာတရူပရဇတန္တိ. ဧဝံ ဝုတ္တေ, အဟံ, ဘန္တေ, တံ ပရိသံ ဧတဒဝေါစံ— မာ, အယျာ, ဧဝံ အဝစုတ္ထ. န ကပ္ပတိ သမဏာနံ သကျပုတ္တိယာနံ ဇာတရူပရဇတံ; န သာဒိယန္တိ သမဏာ သကျပုတ္တိယာ ဇာတရူပရဇတံ; န ပဋိဂ္ဂဏှန္တိ သမဏာ သကျပုတ္တိယာ ဇာတရူပရဇတံ; နိက္ခိတ္တမဏိသုဝဏ္ဏာ သမဏာ သကျပုတ္တိယာ အပေတဇာတရူပရဇတာတိ. အသက္ခိံ ခေါ အဟံ, ဘန္တေ, တံ ပရိသံ သညာပေတုံ. ကစ္စာဟံ, ဘန္တေ, ဧဝံ ဗျာကရမာနော ဝုတ္တဝါဒီ စေဝ ဘဂဝတော ဟောမိ, န စ ဘဂဝန္တံ အဘူတေန အဗ္ဘာစိက္ခာမိ, ဓမ္မဿ စာနုဓမ္မံ ဗျာကရောမိ, န စ ကောစိ သဟဓမ္မိကော ဝါဒါနုဝါဒေါ ဂါရယှံ ဌာနံ အာဂစ္ဆတီ’တိ? ‘တဂ္ဃ တွံ, ဂါမဏိ, ဧဝံ ဗျာကရမာနော ဝုတ္တဝါဒီ စေဝ မေ ဟောသိ; န စ မံ အဘူတေန အဗ္ဘာစိက္ခသိ, ဓမ္မဿ စာနုဓမ္မံ ဗျာကရောသိ, န စ ကောစိ သဟဓမ္မိကော ဝါဒါနုဝါဒေါ ဂါရယှံ ဌာနံ အာဂစ္ဆတိ. န ဟိ, ဂါမဏိ, ကပ္ပတိ သမဏာနံ သကျပုတ္တိယာနံ ဇာတရူပရဇတံ; န သာဒိယန္တိ သမဏာ သကျပုတ္တိယာ ဇာတရူပရဇတံ; န ပဋိဂ္ဂဏှန္တိ သမဏာ သကျပုတ္တိယာ ဇာတရူပရဇတံ; နိက္ခိတ္တမဏိသုဝဏ္ဏာ သမဏာ သကျပုတ္တိယာ အပေတဇာတရူပရဇတာ. ယဿ ခေါ, ဂါမဏိ, ဇာတရူပရဇတံ ကပ္ပတိ, ပဉ္စပိ တဿ ကာမဂုဏာ ကပ္ပန္တိ. ယဿ ပဉ္စ ကာမဂုဏာ ကပ္ပန္တိ ဧကံသေနေတံ, ဂါမဏိ, ဓာရေယျာသိ— အဿမဏဓမ္မော အသကျပုတ္တိယဓမ္မောတိ. အပိ စာဟံ, ဂါမဏိ, ဧဝံ ဝဒါမိ တိဏံ တိဏတ္ထိကေန ပရိယေသိတဗ္ဗံ; ဒါရု ဒါရုတ္ထိကေန ပရိယေသိတဗ္ဗံ; သကဋံ သကဋတ္ထိကေန ပရိယေသိတဗ္ဗံ; ပုရိသော ပုရိသတ္ထိကေန ပရိယေသိတဗ္ဗော. န တွေဝါဟံ, ဂါမဏိ, ကေနစိ ပရိယာယေန ဇာတရူပရဇတံ သာဒိတဗ္ဗံ ပရိယေသိတဗ္ဗန္တိ ဝဒါမီ’တိ.
ဧဝံဝါဒီ ကိရာဟံ အာယသ္မန္တေ ဥပါသကေ သဒ္ဓေ ပသန္နေ အက္ကောသာမိ, ပရိဘာသာမိ, အပ္ပသာဒံ ကရောမိ; ယောဟံ အဓမ္မံ အဓမ္မောတိ ဝဒါမိ, ဓမ္မံ ဓမ္မောတိ ဝဒါမိ, အဝိနယံ အဝိနယောတိ ဝဒါမိ, ဝိနယံ ဝိနယောတိ ဝဒါမိ.
ဧကမိဒံ, အာဝုသော, သမယံ ဘဂဝါ ရာဇဂဟေ အာယသ္မန္တံ ဥပနန္ဒံ သကျပုတ္တံ အာရဗ္ဘ ဇာတရူပရဇတံ ပဋိက္ခိပိ, သိက္ခာပဒဉ္စ ပညပေသိ. ဧဝံဝါဒီ ကိရာဟံ အာယသ္မန္တေ ဥပါသကေ သဒ္ဓေ ပသန္နေ အက္ကောသာမိ, ပရိဘာသာမိ, အပ္ပသာဒံ ကရောမိ; ယောဟံ အဓမ္မံ အဓမ္မောတိ ဝဒါမိ, ဓမ္မံ ဓမ္မောတိ ဝဒါမိ, အဝိနယံ အဝိနယောတိ ဝဒါမိ, ဝိနယံ ဝိနယောတိ ဝဒါမီ”တိ.
ဧဝံ ဝုတ္တေ, ဝေသာလိကာ ဥပါသကာ အာယသ္မန္တံ ယသံ ကာကဏ္ဍကပုတ္တံ ဧတဒဝေါစုံ— “ဧကောဝ, ဘန္တေ, အယျော ယသော ကာကဏ္ဍကပုတ္တော သမဏော သကျပုတ္တိယော. သဗ္ဗေဝိမေ အဿမဏာ အသကျပုတ္တိယာ. ဝသတု, ဘန္တေ, အယျော ယသော ကာကဏ္ဍကပုတ္တော ဝေသာလိယံ. မယံ အယျဿ ယသဿ ကာကဏ္ဍကပုတ္တဿ ဥဿုက္ကံ ကရိဿာမ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခာရာနန်”တိ. အထ ခေါ အာယသ္မာ ယသော ကာကဏ္ဍကပုတ္တော ဝေသာလိကေ ဥပါသကေ သညာပေတွာ အနုဒူတေန ဘိက္ခုနာ သဒ္ဓိံ အာရာမံ အဂမာသိ.
အထ ခေါ ဝေသာလိကာ ဝဇ္ဇိပုတ္တကာ ဘိက္ခူ အနုဒူတံ ဘိက္ခုံ ပုစ္ဆိံသု— “ခမာပိတာဝုသော, ယသေန ကာကဏ္ဍကပုတ္တေန ဝေသာလိကာ ဥပါသကာ”တိ? “ဥပါသကေဟိ ပါပိကံ နော, အာဝုသော, ကတံ. ဧကောဝ ယသော ကာကဏ္ဍကပုတ္တော သမဏော သကျပုတ္တိယော ကတော. သဗ္ဗေဝ မယံ အဿမဏာ အသကျပုတ္တိယာ ကတာ”တိ. အထ ခေါ ဝေသာလိကာ ဝဇ္ဇိပုတ္တကာ ဘိက္ခူ— “အယံ, အာဝုသော, ယသော ကာကဏ္ဍကပုတ္တော အမှေဟိ အသမ္မတော ဂိဟီနံ ပကာသေသိ; ဟန္ဒဿ မယံ ဥက္ခေပနီယကမ္မံ ကရောမာ”တိ. တေ တဿ ဥက္ခေပနီယကမ္မံ ကတ္တုကာမာ သန္နိပတိံသု. အထ ခေါ အာယသ္မာ ယသော ကာကဏ္ဍကပုတ္တော ဝေဟာသံ အဗ္ဘုဂ္ဂန္တွာ ကောသမ္ဗိယံ ပစ္စုဋ္ဌာသိ.
အထ ခေါ အာယသ္မာ ယသော ကာကဏ္ဍကပုတ္တော ပါဝေယျကာနဉ္စ အဝန္တိဒက္ခိဏာပထကာနဉ္စ ဘိက္ခူနံ သန္တိကေ ဒူတံ ပါဟေသိ— “အာဂစ္ဆန္တု အာယသ္မန္တာ; ဣမံ အဓိကရဏံ အာဒိယိဿာမ. ပုရေ အဓမ္မော ဒိပ္ပတိ, ဓမ္မော ပဋိဗာဟိယျတိ; အဝိနယော ဒိပ္ပတိ, ဝိနယော ပဋိဗာဟိယျတိ; ပုရေ အဓမ္မဝါဒိနော ဗလဝန္တော ဟောန္တိ, ဓမ္မဝါဒိနော ဒုဗ္ဗလာ ဟောန္တိ; အဝိနယဝါဒိနော ဗလဝန္တော ဟောန္တိ, ဝိနယဝါဒိနော ဒုဗ္ဗလာ ဟောန္တီ”တိ.
တေန ခေါ ပန သမယေန အာယသ္မာ သမ္ဘူတော သာဏဝါသီ အဟောဂင်္ဂေ ပဗ္ဗတေ ပဋိဝသတိ. အထ ခေါ အာယသ္မာ ယသော ကာကဏ္ဍကပုတ္တော ယေန အဟောဂင်္ဂေါ ပဗ္ဗတော, ယေနာယသ္မာ သမ္ဘူတော သာဏဝါသီ တေနုပသင်္ကမိ, ဥပသင်္ကမိတွာ အာယသ္မန္တံ သမ္ဘူတံ သာဏဝါသိံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ အာယသ္မာ ယသော ကာကဏ္ဍကပုတ္တော အာယသ္မန္တံ သမ္ဘူတံ သာဏဝါသိံ ဧတဒဝေါစ— “ဣမေ, ဘန္တေ, ဝေသာလိကာ ဝဇ္ဇိပုတ္တကာ ဘိက္ခူ ဝေသာလိယံ ဒသ ဝတ္ထူနိ ဒီပေန္တိ— ကပ္ပတိ သိင်္ဂိလောဏကပ္ပေါ, ကပ္ပတိ ဒွင်္ဂုလကပ္ပေါ, ကပ္ပတိ ဂါမန္တရကပ္ပေါ, ကပ္ပတိ အာဝါသကပ္ပေါ, ကပ္ပတိ အနုမတိကပ္ပေါ, ကပ္ပတိ အာစိဏ္ဏကပ္ပေါ, ကပ္ပတိ အမထိတကပ္ပေါ, ကပ္ပတိ ဇဠောဂိံ ပါတုံ, ကပ္ပတိ အဒသကံ နိသီဒနံ, ကပ္ပတိ ဇာတရူပရဇတန္တိ. ဟန္ဒ မယံ, ဘန္တေ, ဣမံ အဓိကရဏံ အာဒိယိဿာမ. ပုရေ အဓမ္မော ဒိပ္ပတိ, ဓမ္မော ပဋိဗာဟိယျတိ; အဝိနယော ဒိပ္ပတိ, ဝိနယော ပဋိဗာဟိယျတိ; ပုရေ အဓမ္မဝါဒိနော ဗလဝန္တော ဟောန္တိ, ဓမ္မဝါဒိနော ဒုဗ္ဗလာ ဟောန္တိ; အဝိနယဝါဒိနော ဗလဝန္တော ဟောန္တိ, ဝိနယဝါဒိနော ဒုဗ္ဗလာ ဟောန္တီ”တိ. “ဧဝမာဝုသော”တိ ခေါ အာယသ္မာ သမ္ဘူတော သာဏဝါသီ အာယသ္မတော ယသဿ ကာကဏ္ဍကပုတ္တဿ ပစ္စဿောသိ. အထ ခေါ သဋ္ဌိမတ္တာ ပါဝေယျကာ ဘိက္ခူ— သဗ္ဗေ အာရညိကာ, သဗ္ဗေ ပိဏ္ဍပါတိကာ, သဗ္ဗေ ပံသုကူလိကာ, သဗ္ဗေ တေစီဝရိကာ, သဗ္ဗေဝ အရဟန္တော— အဟောဂင်္ဂေ ပဗ္ဗတေ သန္နိပတိံသု. အဋ္ဌာသီတိမတ္တာ အဝန္တိဒက္ခိဏာပထကာ ဘိက္ခူ— အပ္ပေကစ္စေ အာရညိကာ, အပ္ပေကစ္စေ ပိဏ္ဍပါတိကာ, အပ္ပေကစ္စေ ပံသုကူလိကာ, အပ္ပေကစ္စေ တေစီဝရိကာ, သဗ္ဗေဝ အရဟန္တော— အဟောဂင်္ဂေ ပဗ္ဗတေ သန္နိပတိံသု. အထ ခေါ ထေရာနံ ဘိက္ခူနံ မန္တယမာနာနံ ဧတဒဟောသိ— “ဣဒံ ခေါ အဓိကရဏံ ကက္ခဠဉ္စ, ဝါဠဉ္စ; ကံ နု ခေါ မယံ ပက္ခံ လဘေယျာမ, ယေန မယံ ဣမသ္မိံ အဓိကရဏေ ဗလဝန္တတရာ အဿာမာ”တိ.
တေန ခေါ ပန သမယေန အာယသ္မာ ရေဝတော သောရေယျေ ပဋိဝသတိ— ဗဟုဿုတော အာဂတာဂမော ဓမ္မဓရော ဝိနယဓရော မာတိကာဓရော ပဏ္ဍိတော ဝိယတ္တော မေဓာဝီ လဇ္ဇီ ကုက္ကုစ္စကော သိက္ခာကာမော. အထ ခေါ ထေရာနံ ဘိက္ခူနံ ဧတဒဟောသိ— “အယံ ခေါ အာယသ္မာ ရေဝတော သောရေယျေ ပဋိဝသတိ— ဗဟုဿုတော အာဂတာဂမော ဓမ္မဓရော ဝိနယဓရော မာတိကာဓရော ပဏ္ဍိတော ဝိယတ္တော မေဓာဝီ လဇ္ဇီ ကုက္ကုစ္စကော သိက္ခာကာမော. သစေ မယံ အာယသ္မန္တံ ရေဝတံ ပက္ခံ လဘိဿာမ, ဧဝံ မယံ ဣမသ္မိံ အဓိကရဏေ ဗလဝန္တတရာ အဿာမာ”တိ. အဿောသိ ခေါ အာယသ္မာ ရေဝတော— ဒိဗ္ဗာယ သောတဓာတုယာ ဝိသုဒ္ဓါယ အတိက္ကန္တမာနုသိကာယ— ထေရာနံ ဘိက္ခူနံ မန္တယမာနာနံ. သုတွာနဿ ဧတဒဟောသိ— “ဣဒံ ခေါ အဓိကရဏံ ကက္ခဠဉ္စ ဝါဠဉ္စ. န ခေါ မေတံ ပတိရူပံ ယောဟံ ဧဝရူပေ အဓိကရဏေ ဩသက္ကေယျံ. ဣဒါနိ စ ပန တေ ဘိက္ခူ အာဂစ္ဆိဿန္တိ. သောဟံ တေဟိ အာကိဏ္ဏော န ဖာသု ဂမိဿာမိ. ယန္နူနာဟံ ပဋိကစ္စေဝ ဂစ္ဆေယျန်”တိ. အထ ခေါ အာယသ္မာ ရေဝတော သောရေယျာ သင်္ကဿံ အဂမာသိ.
အထ ခေါ ထေရာ ဘိက္ခူ သောရေယျံ ဂန္တွာ ပုစ္ဆိံသု— “ကဟံ အာယသ္မာ ရေဝတော”တိ? တေ ဧဝမာဟံသု— “ဧသာယသ္မာ ရေဝတော သင်္ကဿံ ဂတော”တိ. အထ ခေါ အာယသ္မာ ရေဝတော သင်္ကဿာ ကဏ္ဏကုဇ္ဇံ အဂမာသိ. အထ ခေါ ထေရာ ဘိက္ခူ သင်္ကဿံ ဂန္တွာ ပုစ္ဆိံသု— “ကဟံ အာယသ္မာ ရေဝတော”တိ? တေ ဧဝမာဟံသု— “ဧသာယသ္မာ ရေဝတော ကဏ္ဏကုဇ္ဇံ ဂတော”တိ. အထ ခေါ အာယသ္မာ ရေဝတော ကဏ္ဏကုဇ္ဇာ ဥဒုမ္ဗရံ အဂမာသိ. အထ ခေါ ထေရာ ဘိက္ခူ ကဏ္ဏကုဇ္ဇံ ဂန္တွာ ပုစ္ဆိံသု— “ကဟံ အာယသ္မာ ရေဝတော”တိ? တေ ဧဝမာဟံသု— “ဧသာယသ္မာ ရေဝတော ဥဒုမ္ဗရံ ဂတော”တိ. အထ ခေါ အာယသ္မာ ရေဝတော ဥဒုမ္ဗရာ အဂ္ဂဠပုရံ အဂမာသိ. အထ ခေါ ထေရာ ဘိက္ခူ ဥဒုမ္ဗရံ ဂန္တွာ ပုစ္ဆိံသု— “ကဟံ အာယသ္မာ ရေဝတော”တိ? တေ ဧဝမာဟံသု— “ဧသာယသ္မာ ရေဝတော အဂ္ဂဠပုရံ ဂတော”တိ. အထ ခေါ အာယသ္မာ ရေဝတော အဂ္ဂဠပုရာ သဟဇာတိံ အဂမာသိ. အထ ခေါ ထေရာ ဘိက္ခူ အဂ္ဂဠပုရံ ဂန္တွာ ပုစ္ဆိံသု— “ကဟံ အာယသ္မာ ရေဝတော”တိ? တေ ဧဝမာဟံသု— “ဧသာယသ္မာ ရေဝတော သဟဇာတိံ ဂတော”တိ. အထ ခေါ ထေရာ ဘိက္ခူ အာယသ္မန္တံ ရေဝတံ သဟဇာတိယံ သမ္ဘာဝေသုံ.
အထ ခေါ အာယသ္မာ သမ္ဘူတော သာဏဝါသီ အာယသ္မန္တံ ယသံ ကာကဏ္ဍကပုတ္တံ ဧတဒဝေါစ— “အယံ, အာဝုသော, အာယသ္မာ ရေဝတော ဗဟုဿုတော အာဂတာဂမော ဓမ္မဓရော ဝိနယဓရော မာတိကာဓရော ပဏ္ဍိတော ဝိယတ္တော မေဓာဝီ လဇ္ဇီ ကုက္ကုစ္စကော သိက္ခာကာမော. သစေ မယံ အာယသ္မန္တံ ရေဝတံ ပဉှံ ပုစ္ဆိဿာမ, ပဋိဗလော အာယသ္မာ ရေဝတော ဧကေနေဝ ပဉှေန သကလမ္ပိ ရတ္တိံ ဝီတိနာမေတုံ. ဣဒါနိ စ ပနာယသ္မာ ရေဝတော အန္တေဝါသိကံ သရဘာဏကံ ဘိက္ခုံ အဇ္ဈေသိဿတိ. သော တွံ တဿ ဘိက္ခုနော သရဘညပရိယောသာနေ အာယသ္မန္တံ ရေဝတံ ဥပသင်္ကမိတွာ ဣမာနိ ဒသ ဝတ္ထူနိ ပုစ္ဆေယျာသီ”တိ. “ဧဝံ, ဘန္တေ”တိ ခေါ အာယသ္မာ ယသော ကာကဏ္ဍကပုတ္တော အာယသ္မတော သမ္ဘူတဿ သာဏဝါသိဿ ပစ္စဿောသိ. အထ ခေါ အာယသ္မာ ရေဝတော အန္တေဝါသိကံ သရဘာဏကံ ဘိက္ခုံ အဇ္ဈေသိ. အထ ခေါ အာယသ္မာ ယသော ကာကဏ္ဍကပုတ္တော တဿ ဘိက္ခုနော သရဘညပရိယောသာနေ ယေနာယသ္မာ ရေဝတော တေနုပသင်္ကမိ, ဥပသင်္ကမိတွာ အာယသ္မန္တံ ရေဝတံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ အာယသ္မာ ယသော ကာကဏ္ဍကပုတ္တော အာယသ္မန္တံ ရေဝတံ ဧတဒဝေါစ— “ကပ္ပတိ, ဘန္တေ, သိင်္ဂိလောဏကပ္ပေါ”တိ? “ကော သော, အာဝုသော, သိင်္ဂိလောဏကပ္ပေါ”တိ? “ကပ္ပတိ, ဘန္တေ, သိင်္ဂိနာ လောဏံ ပရိဟရိတုံ— ယတ္ထ အလောဏကံ ဘဝိဿတိ တတ္ထ ပရိဘုဉ္ဇိဿာမီ”တိ? “နာဝုသော, ကပ္ပတီ”တိ. “ကပ္ပတိ, ဘန္တေ, ဒွင်္ဂုလကပ္ပေါ”တိ? “ကော သော, အာဝုသော, ဒွင်္ဂုလကပ္ပေါ”တိ? “ကပ္ပတိ, ဘန္တေ, ဒွင်္ဂုလာယ ဆာယာယ ဝီတိဝတ္တာယ, ဝိကာလေ ဘောဇနံ ဘုဉ္ဇိတုန်”တိ? “နာဝုသော, ကပ္ပတီ”တိ. “ကပ္ပတိ, ဘန္တေ, ဂါမန္တရကပ္ပေါ”တိ? “ကော သော, အာဝုသော, ဂါမန္တရကပ္ပေါ”တိ? “ကပ္ပတိ, ဘန္တေ— ဣဒါနိ ဂါမန္တရံ ဂမိဿာမီတိ— ဘုတ္တာဝိနာ ပဝါရိတေန အနတိရိတ္တံ ဘောဇနံ ဘုဉ္ဇိတုန်”တိ? “နာဝုသော, ကပ္ပတီ”တိ. “ကပ္ပတိ, ဘန္တေ, အာဝါသကပ္ပေါ”တိ? “ကော သော, အာဝုသော, အာဝါသကပ္ပေါ”တိ? “ကပ္ပတိ, ဘန္တေ, သမ္ဗဟုလာ အာဝါသာ သမာနသီမာ နာနုပေါသထံ ကာတုန်”တိ? “နာဝုသော, ကပ္ပတီ”တိ. “ကပ္ပတိ, ဘန္တေ, အနုမတိကပ္ပေါ”တိ? “ကော သော, အာဝုသော, အနုမတိကပ္ပေါ”တိ? “ကပ္ပတိ, ဘန္တေ, ဝဂ္ဂေန သံဃေန ကမ္မံ ကာတုံ— အာဂတေ ဘိက္ခူ အနုမာနေဿာမာ”တိ? “နာဝုသော, ကပ္ပတီ”တိ. “ကပ္ပတိ, ဘန္တေ, အာစိဏ္ဏကပ္ပေါ”တိ? “ကော သော, အာဝုသော, အာစိဏ္ဏကပ္ပေါ”တိ? “ကပ္ပတိ, ဘန္တေ, ဣဒံ မေ ဥပဇ္ဈာယေန အဇ္ဈာစိဏ္ဏံ, ဣဒံ မေ အာစရိယေန အဇ္ဈာစိဏ္ဏံ, တံ အဇ္ဈာစရိတုန်”တိ? “အာစိဏ္ဏကပ္ပေါ ခေါ, အာဝုသော, ဧကစ္စော ကပ္ပတိ, ဧကစ္စော န ကပ္ပတီ”တိ. “ကပ္ပတိ, ဘန္တေ, အမထိတကပ္ပေါ”တိ? “ကော သော, အာဝုသော, အမထိတကပ္ပေါ”တိ? “ကပ္ပတိ, ဘန္တေ, ယံ တံ ခီရံ ခီရဘာဝံ ဝိဇဟိတံ, အသမ္ပတ္တံ ဒဓိဘာဝံ, တံ ဘုတ္တာဝိနာ ပဝါရိတေန အနတိရိတ္တံ ပါတုန်”တိ? “နာဝုသော, ကပ္ပတီ”တိ? “ကပ္ပတိ, ဘန္တေ, ဇဠောဂိံ ပါတုန်”တိ? “ကာ သာ, အာဝုသော, ဇဠောဂီ”တိ? “ကပ္ပတိ, ဘန္တေ, ယာ သာ သုရာ အာသုတာ, အသမ္ပတ္တာ မဇ္ဇဘာဝံ, သာ ပါတုန်”တိ? “နာဝုသော, ကပ္ပတီ”တိ. “ကပ္ပတိ, ဘန္တေ, အဒသကံ နိသီဒနန်”တိ? “နာဝုသော, ကပ္ပတီ”တိ. “ကပ္ပတိ, ဘန္တေ, ဇာတရူပရဇတန်”တိ? “နာဝုသော, ကပ္ပတီ”တိ. “ဣမေ, ဘန္တေ, ဝေသာလိကာ ဝဇ္ဇိပုတ္တကာ ဘိက္ခူ ဝေသာလိယံ ဣမာနိ ဒသ ဝတ္ထူနိ ဒီပေန္တိ. ဟန္ဒ မယံ, ဘန္တေ, ဣမံ အဓိကရဏံ အာဒိယိဿာမ. ပုရေ အဓမ္မော ဒိပ္ပတိ, ဓမ္မော ပဋိဗာဟိယျတိ; အဝိနယော ဒိပ္ပတိ, ဝိနယော ပဋိဗာဟိယျတိ; ပုရေ အဓမ္မဝါဒိနော ဗလဝန္တော ဟောန္တိ, ဓမ္မဝါဒိနော ဒုဗ္ဗလာ ဟောန္တိ; အဝိနယဝါဒိနော ဗလဝန္တော ဟောန္တိ, ဝိနယဝါဒိနော ဒုဗ္ဗလာ ဟောန္တီ”တိ. “ဧဝမာဝုသော”တိ ခေါ အာယသ္မာ ရေဝတော အာယသ္မတော ယသဿ ကာကဏ္ဍကပုတ္တဿ ပစ္စဿောသိ.
ပဌမဘာဏဝါရော နိဋ္ဌိတော.