3.2.1 အဂ္ဃသမောဓာနပရိဝါသ
တေန ခေါ ပန သမယေန အညတရော ဘိက္ခု သမ္ဗဟုလာ သံဃာဒိသေသာ အာပတ္တိယော အာပန္နော ဟောတိ— ဧကာ အာပတ္တိ ဧကာဟပ္ပဋိစ္ဆန္နာ, ဧကာ အာပတ္တိ ဒွီဟပ္ပဋိစ္ဆန္နာ, ဧကာ အာပတ္တိ တီဟပ္ပဋိစ္ဆန္နာ, ဧကာ အာပတ္တိ စတူဟပ္ပဋိစ္ဆန္နာ, ဧကာ အာပတ္တိ ပဉ္စာဟပ္ပဋိစ္ဆန္နာ, ဧကာ အာပတ္တိ ဆာဟပ္ပဋိစ္ဆန္နာ, ဧကာ အာပတ္တိ သတ္တာဟပ္ပဋိစ္ဆန္နာ, ဧကာ အာပတ္တိ အဋ္ဌာဟပ္ပဋိစ္ဆန္နာ, ဧကာ အာပတ္တိ နဝါဟပ္ပဋိစ္ဆန္နာ, ဧကာ အာပတ္တိ ဒသာဟပ္ပဋိစ္ဆန္နာ. သော ဘိက္ခူနံ အာရောစေသိ— “အဟံ, အာဝုသော, သမ္ဗဟုလာ သံဃာဒိသေသာ အာပတ္တိယော အာပဇ္ဇိံ— ဧကာ အာပတ္တိ ဧကာဟပ္ပဋိစ္ဆန္နာ …ပေ… ဧကာ အာပတ္တိ ဒသာဟပ္ပဋိစ္ဆန္နာ. ကထံ နု ခေါ မယာ ပဋိပဇ္ဇိတဗ္ဗန်”တိ? ဘဂဝတော ဧတမတ္ထံ အာရောစေသုံ. “တေန ဟိ, ဘိက္ခဝေ, သံဃော တဿ ဘိက္ခုနော တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ တဿာ အဂ္ဃေန သမောဓာနပရိဝါသံ ဒေတု. ဧဝဉ္စ ပန, ဘိက္ခဝေ, ဒါတဗ္ဗော—
တေန, ဘိက္ခဝေ, ဘိက္ခုနာ သံဃံ ဥပသင်္ကမိတွာ …ပေ… ဧဝမဿ ဝစနီယော— ‘အဟံ, ဘန္တေ, သမ္ဗဟုလာ သံဃာဒိသေသာ အာပတ္တိယော အာပဇ္ဇိံ— ဧကာ အာပတ္တိ ဧကာဟပ္ပဋိစ္ဆန္နာ …ပေ… ဧကာ အာပတ္တိ ဒသာဟပ္ပဋိစ္ဆန္နာ. သောဟံ, ဘန္တေ, သံဃံ တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ တဿာ အဂ္ဃေန သမောဓာနပရိဝါသံ ယာစာမီ’တိ. ဒုတိယမ္ပိ ယာစိတဗ္ဗော. တတိယမ္ပိ ယာစိတဗ္ဗော. ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော—
‘သုဏာတု မေ, ဘန္တေ, သံဃော. အယံ ဣတ္ထန္နာမော ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇိ— ဧကာ အာပတ္တိ ဧကာဟပ္ပဋိစ္ဆန္နာ …ပေ… ဧကာ အာပတ္တိ ဒသာဟပ္ပဋိစ္ဆန္နာ. သော သံဃံ တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ တဿာ အဂ္ဃေန သမောဓာနပရိဝါသံ ယာစတိ. ယဒိ သံဃဿ ပတ္တကလ္လံ, သံဃော ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ တဿာ အဂ္ဃေန သမောဓာနပရိဝါသံ ဒဒေယျ. ဧသာ ဉတ္တိ.
သုဏာတု မေ, ဘန္တေ, သံဃော. အယံ ဣတ္ထန္နာမော ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇိ— ဧကာ အာပတ္တိ ဧကာဟပ္ပဋိစ္ဆန္နာ …ပေ… ဧကာ အာပတ္တိ ဒသာဟပ္ပဋိစ္ဆန္နာ. သော သံဃံ တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ တဿာ အဂ္ဃေန သမောဓာနပရိဝါသံ ယာစတိ. သံဃော ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ တဿာ အဂ္ဃေန သမောဓာနပရိဝါသံ ဒေတိ. ယဿာယသ္မတော ခမတိ ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ; တဿာ အဂ္ဃေန သမောဓာနပရိဝါသဿ ဒါနံ, သော တုဏှဿ; ယဿ နက္ခမတိ, သော ဘာသေယျ.
ဒုတိယမ္ပိ ဧတမတ္ထံ ဝဒါမိ …ပေ… တတိယမ္ပိ ဧတမတ္ထံ ဝဒါမိ …ပေ… .
ဒိန္နော သံဃေန ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ တဿာ အဂ္ဃေန သမောဓာနပရိဝါသော. ခမတိ သံဃဿ, တသ္မာ တုဏှီ, ဧဝမေတံ ဓာရယာမီ’”တိ.