3.2.2 သဗ္ဗစိရပ္ပဋိစ္ဆန္နအဂ္ဃသမောဓာန
တေန ခေါ ပန သမယေန အညတရော ဘိက္ခု သမ္ဗဟုလာ သံဃာဒိသေသာ အာပတ္တိယော အာပန္နော ဟောတိ— ဧကာ အာပတ္တိ ဧကာဟပ္ပဋိစ္ဆန္နာ, ဒွေ အာပတ္တိယော ဒွီဟပ္ပဋိစ္ဆန္နာယော, တိဿော အာပတ္တိယော တီဟပ္ပဋိစ္ဆန္နာယော, စတဿော အာပတ္တိယော စတူဟပ္ပဋိစ္ဆန္နာယော, ပဉ္စ အာပတ္တိယော ပဉ္စာဟပ္ပဋိစ္ဆန္နာယော, ဆ အာပတ္တိယော ဆာဟပ္ပဋိစ္ဆန္နာယော, သတ္တ အာပတ္တိယော သတ္တာဟပ္ပဋိစ္ဆန္နာယော, အဋ္ဌ အာပတ္တိယော အဋ္ဌာဟပ္ပဋိစ္ဆန္နာယော, နဝ အာပတ္တိယော နဝါဟပ္ပဋိစ္ဆန္နာယော, ဒသ အာပတ္တိယော ဒသာဟပ္ပဋိစ္ဆန္နာယော. သော ဘိက္ခူနံ အာရောစေသိ— “အဟံ, အာဝုသော, သမ္ဗဟုလာ သံဃာဒိသေသာ အာပတ္တိယော အာပဇ္ဇိံ, ဧကာ အာပတ္တိ ဧကာဟပ္ပဋိစ္ဆန္နာ …ပေ… ဒသ အာပတ္တိယော ဒသာဟပ္ပဋိစ္ဆန္နာယော. ကထံ နု ခေါ မယာ ပဋိပဇ္ဇိတဗ္ဗန်”တိ? ဘဂဝတော ဧတမတ္ထံ အာရောစေသုံ. “တေန ဟိ, ဘိက္ခဝေ, သံဃော တဿ ဘိက္ခုနော တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသံ ဒေတု. ဧဝဉ္စ ပန, ဘိက္ခဝေ, ဒါတဗ္ဗော—
တေန, ဘိက္ခဝေ, ဘိက္ခုနာ သံဃံ ဥပသင်္ကမိတွာ …ပေ… ဧဝမဿ ဝစနီယော— ‘အဟံ, ဘန္တေ, သမ္ဗဟုလာ သံဃာဒိသေသာ အာပတ္တိယော အာပဇ္ဇိံ, ဧကာ အာပတ္တိ ဧကာဟပ္ပဋိစ္ဆန္နာ …ပေ… ဒသ အာပတ္တိယော ဒသာဟပ္ပဋိစ္ဆန္နာယော. သောဟံ, ဘန္တေ, သံဃံ တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသံ ယာစာမီ’တိ. ဒုတိယမ္ပိ ယာစိတဗ္ဗော. တတိယမ္ပိ ယာစိတဗ္ဗော. ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော—
‘သုဏာတု မေ, ဘန္တေ, သံဃော. အယံ ဣတ္ထန္နာမော ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇိ, ဧကာ အာပတ္တိ ဧကာဟပ္ပဋိစ္ဆန္နာ …ပေ… ဒသ အာပတ္တိယော ဒသာဟပ္ပဋိစ္ဆန္နာယော. သော သံဃံ တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသံ ယာစတိ. ယဒိ သံဃဿ ပတ္တကလ္လံ သံဃော ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသံ ဒဒေယျ. ဧသာ ဉတ္တိ.
သုဏာတု မေ, ဘန္တေ, သံဃော. အယံ ဣတ္ထန္နာမော ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇိ— ဧကာ အာပတ္တိ ဧကာဟပ္ပဋိစ္ဆန္နာ …ပေ… ဒသ အာပတ္တိယော ဒသာဟပ္ပဋိစ္ဆန္နာယော. သော သံဃံ တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသံ ယာစတိ. သံဃော ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသံ ဒေတိ. ယဿာယသ္မတော ခမတိ ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသဿ ဒါနံ, သော တုဏှဿ; ယဿ နက္ခမတိ, သော ဘာသေယျ.
ဒုတိယမ္ပိ ဧတမတ္ထံ ဝဒါမိ …ပေ… တတိယမ္ပိ ဧတမတ္ထံ ဝဒါမိ …ပေ… .
ဒိန္နော သံဃေန ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသော. ခမတိ သံဃဿ, တသ္မာ တုဏှီ, ဧဝမေတံ ဓာရယာမီ’”တိ.