3.2.5 သုဒ္ဓန္တပရိဝါသ
တေန ခေါ ပန သမယေန အညတရော ဘိက္ခု သမ္ဗဟုလာ သံဃာဒိသေသာ အာပတ္တိယော အာပန္နော ဟောတိ. သော အာပတ္တိပရိယန္တံ န ဇာနာတိ; ရတ္တိပရိယန္တံ န ဇာနာတိ; အာပတ္တိပရိယန္တံ နဿရတိ, ရတ္တိပရိယန္တံ နဿရတိ; အာပတ္တိပရိယန္တေ ဝေမတိကော, ရတ္တိပရိယန္တေ ဝေမတိကော. သော ဘိက္ခူနံ အာရောစေသိ— “အဟံ, အာဝုသော, သမ္ဗဟုလာ သံဃာဒိသေသာ အာပတ္တိယော အာပဇ္ဇိံ; အာပတ္တိပရိယန္တံ န ဇာနာမိ, ရတ္တိပရိယန္တံ န ဇာနာမိ; အာပတ္တိပရိယန္တံ နဿရာမိ, ရတ္တိပရိယန္တံ နဿရာမိ; အာပတ္တိပရိယန္တေ ဝေမတိကော, ရတ္တိပရိယန္တေ ဝေမတိကော. ကထံ နု ခေါ မယာ ပဋိပဇ္ဇိတဗ္ဗန်”တိ? ဘဂဝတော ဧတမတ္ထံ အာရောစေသုံ. “တေန ဟိ, ဘိက္ခဝေ, သံဃော တဿ ဘိက္ခုနော တာသံ အာပတ္တီနံ သုဒ္ဓန္တပရိဝါသံ ဒေတု. ဧဝဉ္စ ပန, ဘိက္ခဝေ, ဒါတဗ္ဗော—
တေန, ဘိက္ခဝေ, ဘိက္ခုနာ သံဃံ ဥပသင်္ကမိတွာ …ပေ… ဧဝမဿ ဝစနီယော— ‘အဟံ, ဘန္တေ, သမ္ဗဟုလာ သံဃာဒိသေသာ အာပတ္တိယော အာပဇ္ဇိံ. အာပတ္တိပရိယန္တံ န ဇာနာမိ, ရတ္တိပရိယန္တံ န ဇာနာမိ; အာပတ္တိပရိယန္တံ နဿရာမိ, ရတ္တိပရိယန္တံ နဿရာမိ; အာပတ္တိပရိယန္တေ ဝေမတိကော, ရတ္တိပရိယန္တေ ဝေမတိကော. သောဟံ, ဘန္တေ, သံဃံ တာသံ အာပတ္တီနံ သုဒ္ဓန္တပရိဝါသံ ယာစာမီ’တိ. ဒုတိယမ္ပိ ယာစိတဗ္ဗော. တတိယမ္ပိ ယာစိတဗ္ဗော. ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော—
‘သုဏာတု မေ, ဘန္တေ, သံဃော. အယံ ဣတ္ထန္နာမော ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇိ. အာပတ္တိပရိယန္တံ န ဇာနာတိ, ရတ္တိပရိယန္တံ န ဇာနာတိ; အာပတ္တိပရိယန္တံ နဿရတိ, ရတ္တိပရိယန္တံ နဿရတိ; အာပတ္တိပရိယန္တေ ဝေမတိကော, ရတ္တိပရိယန္တေ ဝေမတိကော. သော သံဃံ တာသံ အာပတ္တီနံ သုဒ္ဓန္တပရိဝါသံ ယာစတိ. ယဒိ သံဃဿ ပတ္တကလ္လံ, သံဃော ဣတ္ထန္နာမဿ ဘိက္ခုနော တာသံ အာပတ္တီနံ သုဒ္ဓန္တပရိဝါသံ ဒဒေယျ. ဧသာ ဉတ္တိ.
သုဏာတု မေ, ဘန္တေ, သံဃော. အယံ ဣတ္ထန္နာမော ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇိ. အာပတ္တိပရိယန္တံ န ဇာနာတိ, ရတ္တိပရိယန္တံ န ဇာနာတိ; အာပတ္တိပရိယန္တံ နဿရတိ, ရတ္တိပရိယန္တံ နဿရတိ; အာပတ္တိပရိယန္တေ ဝေမတိကော, ရတ္တိပရိယန္တေ ဝေမတိကော. သော သံဃံ တာသံ အာပတ္တီနံ သုဒ္ဓန္တပရိဝါသံ ယာစတိ. သံဃော ဣတ္ထန္နာမဿ ဘိက္ခုနော တာသံ အာပတ္တီနံ သုဒ္ဓန္တပရိဝါသံ ဒေတိ. ယဿာယသ္မတော ခမတိ ဣတ္ထန္နာမဿ ဘိက္ခုနော တာသံ အာပတ္တီနံ သုဒ္ဓန္တပရိဝါသဿ ဒါနံ, သော တုဏှဿ; ယဿ နက္ခမတိ, သော ဘာသေယျ.
ဒုတိယမ္ပိ ဧတမတ္ထံ ဝဒါမိ …ပေ… တတိယမ္ပိ ဧတမတ္ထံ ဝဒါမိ …ပေ… .
ဒိန္နော သံဃေန ဣတ္ထန္နာမဿ ဘိက္ခုနော တာသံ အာပတ္တီနံ သုဒ္ဓန္တပရိဝါသော. ခမတိ သံဃဿ, တသ္မာ တုဏှီ, ဧဝမေတံ ဓာရယာမီ’တိ.
ဧဝံ ခေါ, ဘိက္ခဝေ, သုဒ္ဓန္တပရိဝါသော ဒါတဗ္ဗော; ဧဝံ ပရိဝါသော ဒါတဗ္ဗော. ကထဉ္စ, ဘိက္ခဝေ, သုဒ္ဓန္တပရိဝါသော ဒါတဗ္ဗော? အာပတ္တိပရိယန္တံ န ဇာနာတိ, ရတ္တိပရိယန္တံ န ဇာနာတိ; အာပတ္တိပရိယန္တံ နဿရတိ, ရတ္တိပရိယန္တံ နဿရတိ; အာပတ္တိပရိယန္တေ ဝေမတိကော, ရတ္တိပရိယန္တေ ဝေမတိကော— သုဒ္ဓန္တပရိဝါသော ဒါတဗ္ဗော.
အာပတ္တိပရိယန္တံ ဇာနာတိ, ရတ္တိပရိယန္တံ န ဇာနာတိ; အာပတ္တိပရိယန္တံ သရတိ, ရတ္တိပရိယန္တံ နဿရတိ; အာပတ္တိပရိယန္တေ နိဗ္ဗေမတိကော, ရတ္တိပရိယန္တေ ဝေမတိကော— သုဒ္ဓန္တပရိဝါသော ဒါတဗ္ဗော.
အာပတ္တိပရိယန္တံ ဧကစ္စံ ဇာနာတိ, ဧကစ္စံ န ဇာနာတိ, ရတ္တိပရိယန္တံ န ဇာနာတိ; အာပတ္တိပရိယန္တံ ဧကစ္စံ သရတိ, ဧကစ္စံ နဿရတိ, ရတ္တိပရိယန္တံ နဿရတိ; အာပတ္တိပရိယန္တေ ဧကစ္စေ ဝေမတိကော, ဧကစ္စေ နိဗ္ဗေမတိကော, ရတ္တိပရိယန္တေ ဝေမတိကော— သုဒ္ဓန္တပရိဝါသော ဒါတဗ္ဗော.
အာပတ္တိပရိယန္တံ န ဇာနာတိ, ရတ္တိပရိယန္တံ ဧကစ္စံ ဇာနာတိ, ဧကစ္စံ န ဇာနာတိ; အာပတ္တိပရိယန္တံ နဿရတိ, ရတ္တိပရိယန္တံ ဧကစ္စံ သရတိ, ဧကစ္စံ နဿရတိ; အာပတ္တိပရိယန္တေ ဝေမတိကော, ရတ္တိပရိယန္တေ ဧကစ္စေ ဝေမတိကော, ဧကစ္စေ နိဗ္ဗေမတိကော— သုဒ္ဓန္တပရိဝါသော ဒါတဗ္ဗော.
အာပတ္တိပရိယန္တံ ဇာနာတိ, ရတ္တိပရိယန္တံ ဧကစ္စံ ဇာနာတိ, ဧကစ္စံ န ဇာနာတိ; အာပတ္တိပရိယန္တံ သရတိ, ရတ္တိပရိယန္တံ ဧကစ္စံ သရတိ, ဧကစ္စံ နဿရတိ; အာပတ္တိပရိယန္တေ နိဗ္ဗေမတိကော, ရတ္တိပရိယန္တေ ဧကစ္စေ ဝေမတိကော, ဧကစ္စေ နိဗ္ဗေမတိကော— သုဒ္ဓန္တပရိဝါသော ဒါတဗ္ဗော.
အာပတ္တိပရိယန္တံ ဧကစ္စံ ဇာနာတိ, ဧကစ္စံ န ဇာနာတိ; ရတ္တိပရိယန္တံ ဧကစ္စံ ဇာနာတိ, ဧကစ္စံ န ဇာနာတိ; အာပတ္တိပရိယန္တံ ဧကစ္စံ သရတိ, ဧကစ္စံ နဿရတိ; ရတ္တိပရိယန္တံ ဧကစ္စံ သရတိ, ဧကစ္စံ နဿရတိ; အာပတ္တိပရိယန္တေ ဧကစ္စေ ဝေမတိကော, ဧကစ္စေ နိဗ္ဗေမတိကော; ရတ္တိပရိယန္တေ ဧကစ္စေ ဝေမတိကော, ဧကစ္စေ နိဗ္ဗေမတိကော— သုဒ္ဓန္တပရိဝါသော ဒါတဗ္ဗော. ဧဝံ ခေါ, ဘိက္ခဝေ, သုဒ္ဓန္တပရိဝါသော ဒါတဗ္ဗော.
ကထဉ္စ, ဘိက္ခဝေ, ပရိဝါသော ဒါတဗ္ဗော? အာပတ္တိပရိယန္တံ ဇာနာတိ, ရတ္တိပရိယန္တံ ဇာနာတိ; အာပတ္တိပရိယန္တံ သရတိ, ရတ္တိပရိယန္တံ သရတိ; အာပတ္တိပရိယန္တေ နိဗ္ဗေမတိကော, ရတ္တိပရိယန္တေ နိဗ္ဗေမတိကော— ပရိဝါသော ဒါတဗ္ဗော.
အာပတ္တိပရိယန္တံ န ဇာနာတိ, ရတ္တိပရိယန္တံ ဇာနာတိ; အာပတ္တိပရိယန္တံ နဿရတိ, ရတ္တိပရိယန္တံ သရတိ, အာပတ္တိပရိယန္တေ ဝေမတိကော, ရတ္တိပရိယန္တေ နိဗ္ဗေမတိကော— ပရိဝါသော ဒါတဗ္ဗော.
အာပတ္တိပရိယန္တံ ဧကစ္စံ ဇာနာတိ, ဧကစ္စံ န ဇာနာတိ, ရတ္တိပရိယန္တံ ဇာနာတိ; အာပတ္တိပရိယန္တံ ဧကစ္စံ သရတိ, ဧကစ္စံ နဿရတိ, ရတ္တိပရိယန္တံ သရတိ; အာပတ္တိပရိယန္တေ ဧကစ္စေ ဝေမတိကော, ဧကစ္စေ နိဗ္ဗေမတိကော, ရတ္တိပရိယန္တေ နိဗ္ဗေမတိကော— ပရိဝါသော ဒါတဗ္ဗော. ဧဝံ ခေါ, ဘိက္ခဝေ, ပရိဝါသော ဒါတဗ္ဗော”.
ပရိဝါသော နိဋ္ဌိတော.