6.1.5 ဣဋ္ဌကာစယာဒိအနုဇာနန
တေန ခေါ ပန သမယေန ဝိဟာရာ နီစဝတ္ထုကာ ဟောန္တိ, ဥဒကေန ဩတ္ထရိယျန္တိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ဥစ္စဝတ္ထုကံ ကာတုန်”တိ. စယော ပရိပတတိ …ပေ… “အနုဇာနာမိ, ဘိက္ခဝေ, စိနိတုံ တယော စယေ— ဣဋ္ဌကာစယံ, သိလာစယံ, ဒါရုစယန်”တိ. အာရောဟန္တာ ဝိဟညန္တိ …ပေ… “အနုဇာနာမိ, ဘိက္ခဝေ, တယော သောပါနေ— ဣဋ္ဌကာသောပါနံ, သိလာသောပါနံ, ဒါရုသောပါနန်”တိ. အာရောဟန္တာ ပရိပတန္တိ …ပေ… “အနုဇာနာမိ, ဘိက္ခဝေ, အာလမ္ဗနဗာဟန်”တိ.
တေန ခေါ ပန သမယေန ဝိဟာရာ အာဠကမန္ဒာ ဟောန္တိ. ဘိက္ခူ ဟိရိယန္တိ နိပဇ္ဇိတုံ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, တိရောကရဏိန်”တိ. တိရောကရဏိံ ဥက္ခိပိတွာ ဩလောကေန္တိ …ပေ… “အနုဇာနာမိ, ဘိက္ခဝေ, အဍ္ဎကုဋ္ဋကန်”တိ. အဍ္ဎကုဋ္ဋကာ ဥပရိတော ဩလောကေန္တိ …ပေ… “အနုဇာနာမိ, ဘိက္ခဝေ, တယော ဂဗ္ဘေ— သိဝိကာဂဗ္ဘံ, နာဠိကာဂဗ္ဘံ, ဟမ္မိယဂဗ္ဘန်”တိ.
တေန ခေါ ပန သမယေန ဘိက္ခူ ခုဒ္ဒကေ ဝိဟာရေ မဇ္ဈေ ဂဗ္ဘံ ကရောန္တိ. ဥပစာရော န ဟောတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ခုဒ္ဒကေ ဝိဟာရေ ဧကမန္တံ ဂဗ္ဘံ ကာတုံ, မဟလ္လကေ မဇ္ဈေ”တိ.
တေန ခေါ ပန သမယေန ဝိဟာရဿ ကုဋ္ဋပါဒေါ ဇီရတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ကုလင်္ကပါဒကန်”တိ. ဝိဟာရဿ ကုဋ္ဋော ဩဝဿတိ …ပေ… “အနုဇာနာမိ, ဘိက္ခဝေ, ပရိတ္တာဏကိဋိကံ ဥဒ္ဒသုဓန်”တိ.
တေန ခေါ ပန သမယေန အညတရဿ ဘိက္ခုနော တိဏစ္ဆဒနာ အဟိ ခန္ဓေ ပတတိ. သော ဘီတော ဝိဿရမကာသိ. ဘိက္ခူ ဥပဓာဝိတွာ တံ ဘိက္ခုံ ဧတဒဝေါစုံ— “ကိဿ တွံ, အာဝုသော, ဝိဿရမကာသီ”တိ? အထ ခေါ သော ဘိက္ခူနံ ဧတမတ္ထံ အာရောစေသိ. ဘိက္ခူ ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ဝိတာနန်”တိ.
တေန ခေါ ပန သမယေန ဘိက္ခူ မဉ္စပါဒေပိ ပီဌပါဒေပိ ထဝိကာယော လဂ္ဂေန္တိ. ဥန္ဒူရေဟိပိ ဥပစိကာဟိပိ ခဇ္ဇန္တိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ဘိတ္တိခိလံ နာဂဒန္တကန်”တိ.
တေန ခေါ ပန သမယေန ဘိက္ခူ မဉ္စေပိ ပီဌေပိ စီဝရံ နိက္ခိပန္တိ. စီဝရံ ပရိဘိဇ္ဇိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ဝိဟာရေ စီဝရဝံသံ စီဝရရဇ္ဇုန်”တိ.
တေန ခေါ ပန သမယေန ဝိဟာရာ အနာဠိန္ဒကာ ဟောန္တိ အပ္ပဋိဿရဏာ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, အာဠိန္ဒံ ပဃနံ ပကုဋ္ဋံ ဩသာရကန်”တိ. အာဠိန္ဒာ ပါကဋာ ဟောန္တိ. ဘိက္ခူ ဟိရိယန္တိ နိပဇ္ဇိတုံ …ပေ… “အနုဇာနာမိ, ဘိက္ခဝေ, သံသရဏကိဋိကံ ဥဂ္ဃါဋနကိဋိကန်”တိ.