16.1 ကထိနအတ္ထတာဒိ
ကဿ ကထိနံ အနတ္ထတံ? ကဿ ကထိနံ အတ္ထတံ? ကိန္တိ ကထိနံ အနတ္ထတံ? ကိန္တိ ကထိနံ အတ္ထတံ?
ကဿ ကထိနံ အနတ္ထတန် တိ? ဒွိန္နံ ပုဂ္ဂလာနံ အနတ္ထတံ ဟောတိ ကထိနံ— အနတ္ထာရကဿ စ အနနုမောဒကဿ စ. ဣမေသံ ဒွိန္နံ ပုဂ္ဂလာနံ အနတ္ထတံ ဟောတိ ကထိနံ.
ကဿ ကထိနံ အတ္ထတန် တိ? ဒွိန္နံ ပုဂ္ဂလာနံ အတ္ထတံ ဟောတိ ကထိနံ— အတ္ထာရကဿ စ အနုမောဒကဿ စ. ဣမေသံ ဒွိန္နံ ပုဂ္ဂလာနံ အတ္ထတံ ဟောတိ ကထိနံ.
ကိန္တိ ကထိနံ အနတ္ထတန် တိ? စတုဝီသတိယာ အာကာရေဟိ အနတ္ထတံ ဟောတိ ကထိနံ, န ဥလ္လိခိတမတ္တေန အတ္ထတံ ဟောတိ ကထိနံ, န ဓောဝနမတ္တေန အတ္ထတံ ဟောတိ ကထိနံ, န စီဝရဝိစာရဏမတ္တေန အတ္ထတံ ဟောတိ ကထိနံ, န ဆေဒနမတ္တေန အတ္ထတံ ဟောတိ ကထိနံ, န ဗန္ဓနမတ္တေန အတ္ထတံ ဟောတိ ကထိနံ, န ဩဝဋ္ဋိယကရဏမတ္တေန အတ္ထတံ ဟောတိ ကထိနံ, န ကဏ္ဍုသကရဏမတ္တေန အတ္ထတံ ဟောတိ ကထိနံ, န ဒဠှီကမ္မကရဏမတ္တေန အတ္ထတံ ဟောတိ ကထိနံ, န အနုဝါတကရဏမတ္တေန အတ္ထတံ ဟောတိ ကထိနံ, န ပရိဘဏ္ဍကရဏမတ္တေန အတ္ထတံ ဟောတိ ကထိနံ, န ဩဝဒ္ဓေယျကရဏမတ္တေန အတ္ထတံ ဟောတိ ကထိနံ, န ကမ္ဗလမဒ္ဒနမတ္တေန အတ္ထတံ ဟောတိ ကထိနံ, န နိမိတ္တကတေန အတ္ထတံ ဟောတိ ကထိနံ, န ပရိကထာကတေန အတ္ထတံ ဟောတိ ကထိနံ, န ကုက္ကုကတေန အတ္ထတံ ဟောတိ ကထိနံ, န သန္နိဓိကတေန အတ္ထတံ ဟောတိ ကထိနံ, န နိဿဂ္ဂိယေန အတ္ထတံ ဟောတိ ကထိနံ, န အကပ္ပကတေန အတ္ထတံ ဟောတိ ကထိနံ, န အညတြ သင်္ဃာဋိယာ အတ္ထတံ ဟောတိ ကထိနံ, န အညတြ ဥတ္တရာသင်္ဂေန အတ္ထတံ ဟောတိ ကထိနံ, န အညတြ အန္တရဝါသကေန အတ္ထတံ ဟောတိ ကထိနံ, န အညတြ ပဉ္စကေန ဝါ အတိရေကပဉ္စကေန ဝါ တဒဟေဝ သဉ္ဆိန္နေန သမဏ္ဍလီကတေန အတ္ထတံ ဟောတိ ကထိနံ, န အညတြ ပုဂ္ဂလဿ အတ္ထာရာ အတ္ထတံ ဟောတိ ကထိနံ, သမ္မာ စေ အတ္ထတံ ဟောတိ ကထိနံ, တဉ္စေ နိဿီမဋ္ဌော အနုမောဒတိ. ဧဝမ္ပိ အနတ္ထတံ ဟောတိ ကထိနံ.
နိမိတ္တကမ္မံ နာမ နိမိတ္တံ ကရောတိ— “ဣမိနာ ဒုဿေန ကထိနံ အတ္ထရိဿာမီ”တိ. ပရိကထာ နာမ ပရိကထံ ကရောတိ— “ဣမာယ ပရိကထာယ ကထိနဒုဿံ နိဗ္ဗတ္တေဿာမီ”တိ. ကုက္ကုကတံ နာမ အနာဒိယဒါနံ ဝုစ္စတိ. သန္နိဓိ နာမ ဒွေ သန္နိဓိယော— ကရဏသန္နိဓိ ဝါ နိစယသန္နိဓိ ဝါ. နိဿဂ္ဂိယံ နာမ ကယိရမာနေ အရုဏံ ဥဋ္ဌဟတိ. ဣမေဟိ စတုဝီသတိယာ အာကာရေဟိ အနတ္ထတံ ဟောတိ ကထိနံ.
ကိန္တိ ကထိနံ အတ္ထတန် တိ? သတ္တရသဟိ အာကာရေဟိ အတ္ထတံ ဟောတိ ကထိနံ. အဟတေန အတ္ထတံ ဟောတိ ကထိနံ, အဟတကပ္ပေန အတ္ထတံ ဟောတိ ကထိနံ, ပိလောတိကာယ အတ္ထတံ ဟောတိ ကထိနံ, ပံသုကူလေန အတ္ထတံ ဟောတိ ကထိနံ, ပါပဏိကေန အတ္ထတံ ဟောတိ ကထိနံ, အနိမိတ္တကတေန အတ္ထတံ ဟောတိ ကထိနံ, အပရိကထာကတေန အတ္ထတံ ဟောတိ ကထိနံ, အကုက္ကုကတေန အတ္ထတံ ဟောတိ ကထိနံ, အသန္နိဓိကတေန အတ္ထတံ ဟောတိ ကထိနံ, အနိဿဂ္ဂိယေန အတ္ထတံ ဟောတိ ကထိနံ, ကပ္ပကတေန အတ္ထတံ ဟောတိ ကထိနံ, သင်္ဃာဋိယာ အတ္ထတံ ဟောတိ ကထိနံ, ဥတ္တရာသင်္ဂေန အတ္ထတံ ဟောတိ ကထိနံ, အန္တရဝါသကေန အတ္ထတံ ဟောတိ ကထိနံ, ပဉ္စကေန ဝါ အတိရေကပဉ္စကေန ဝါ တဒဟေဝ သဉ္ဆိန္နေန သမဏ္ဍလီကတေန အတ္ထတံ ဟောတိ ကထိနံ, ပုဂ္ဂလဿ အတ္ထာရာ အတ္ထတံ ဟောတိ ကထိနံ, သမ္မာ စေ အတ္ထတံ ဟောတိ ကထိနံ, တဉ္စေ သီမဋ္ဌော အနုမောဒတိ, ဧဝမ္ပိ အတ္ထတံ ဟောတိ ကထိနံ. ဣမေဟိ သတ္တရသဟိ အာကာရေဟိ အတ္ထတံ ဟောတိ ကထိနံ.
သဟ ကထိနဿ အတ္ထာရာ ကတိ ဓမ္မာ ဇာယန္တိ? သဟ ကထိနဿ အတ္ထာရာ ပန္နရသ ဓမ္မာ ဇာယန္တိ— အဋ္ဌ မာတိကာ, ဒွေ ပလိဗောဓာ, ပဉ္စာနိသံသာ. သဟ ကထိနဿ အတ္ထာရာ ဣမေ ပန္နရသ ဓမ္မာ ဇာယန္တိ.