16.4 ကထိနာဒိဇာနိတဗ္ဗဝိဘာဂ
ကထိနံ ဇာနိတဗ္ဗံ, ကထိနတ္ထာရော ဇာနိတဗ္ဗော, ကထိနဿ အတ္ထာရမာသော ဇာနိတဗ္ဗော, ကထိနဿ အတ္ထာရဝိပတ္တိ ဇာနိတဗ္ဗာ, ကထိနဿ အတ္ထာရသမ္ပတ္တိ ဇာနိတဗ္ဗာ, နိမိတ္တကမ္မံ ဇာနိတဗ္ဗံ, ပရိကထာ ဇာနိတဗ္ဗာ, ကုက္ကုကတံ ဇာနိတဗ္ဗံ, သန္နိဓိ ဇာနိတဗ္ဗာ, နိဿဂ္ဂိယံ ဇာနိတဗ္ဗံ.
ကထိနံ ဇာနိတဗ္ဗန် တိ တေသညေဝ ဓမ္မာနံ သင်္ဂဟော သမဝါယော နာမံ နာမကမ္မံ နာမဓေယျံ နိရုတ္တိ ဗျဉ္ဇနံ အဘိလာပေါ ယဒိဒံ ကထိနန္တိ.
ကထိနဿ အတ္ထာရမာသော ဇာနိတဗ္ဗော တိ ဝဿာနဿ ပစ္ဆိမော မာသော ဇာနိတဗ္ဗော.
ကထိနဿ အတ္ထာရဝိပတ္တိ ဇာနိတဗ္ဗာ တိ စတုဝီသတိယာ အာကာရေဟိ ကထိနဿ အတ္ထာရဝိပတ္တိ ဇာနိတဗ္ဗာ.
ကထိနဿ အတ္ထာရသမ္ပတ္တိ ဇာနိတဗ္ဗာ တိ သတ္တရသဟိ အာကာရေဟိ ကထိနဿ အတ္ထာရသမ္ပတ္တိ ဇာနိတဗ္ဗာ.
နိမိတ္တကမ္မံ ဇာနိတဗ္ဗန် တိ နိမိတ္တံ ကရောတိ ဣမိနာ ဒုဿေန ကထိနံ အတ္ထရိဿာမီတိ.
ပရိကထာ ဇာနိတဗ္ဗာ တိ ပရိကထံ ကရောတိ ဣမာယ ပရိကထာယ ကထိနဒုဿံ နိဗ္ဗတ္တေဿာမီတိ.
ကုက္ကုကတံ ဇာနိတဗ္ဗန် တိ အနာဒိယဒါနံ ဇာနိတဗ္ဗံ.
သန္နိဓိ ဇာနိတဗ္ဗာ တိ ဒွေ သန္နိဓိယော ဇာနိတဗ္ဗာ— ကရဏသန္နိဓိ ဝါ နိစယသန္နိဓိ ဝါ.
နိဿဂ္ဂိယံ ဇာနိတဗ္ဗန် တိ ကရိယမာနေ အရုဏံ ဥဋ္ဌဟတိ.
ကထိနတ္ထာရော ဇာနိတဗ္ဗော တိ သစေ သံဃဿ ကထိနဒုဿံ ဥပ္ပန္နံ ဟောတိ, သံဃေန ကထံ ပဋိပဇ္ဇိတဗ္ဗံ, အတ္ထာရကေန ကထံ ပဋိပဇ္ဇိတဗ္ဗံ, အနုမောဒကေန ကထံ ပဋိပဇ္ဇိတဗ္ဗံ.
သံဃေန ဉတ္တိဒုတိယေန ကမ္မေန ကထိနတ္ထာရကဿ ဘိက္ခုနော ဒါတဗ္ဗံ, တေန ကထိနတ္ထာရကေန ဘိက္ခုနာ တဒဟေဝ ဓောဝိတွာ ဝိမဇ္ဇိတွာ ဝိစာရေတွာ ဆိန္ဒိတွာ သိဗ္ဗေတွာ ရဇိတွာ ကပ္ပံ ကတွာ ကထိနံ အတ္ထရိတဗ္ဗံ. သစေ သင်္ဃာဋိယာ ကထိနံ အတ္ထရိတုကာမော ဟောတိ, ပေါရာဏိကာ သင်္ဃာဋိ ပစ္စုဒ္ဓရိတဗ္ဗာ, နဝါ သင်္ဃာဋိ အဓိဋ္ဌာတဗ္ဗာ. ဣမာယ သင်္ဃာဋိယာ ကထိနံ အတ္ထရာမီတိ ဝါစာ ဘိန္ဒိတဗ္ဗာ. သစေ ဥတ္တရာသင်္ဂေန ကထိနံ အတ္ထရိတုကာမော ဟောတိ, ပေါရာဏကော ဥတ္တရာသင်္ဂေါ ပစ္စုဒ္ဓရိတဗ္ဗော, နဝေါ ဥတ္တရာသင်္ဂေါ အဓိဋ္ဌာတဗ္ဗော. ဣမိနာ ဥတ္တရာသင်္ဂေန ကထိနံ အတ္ထရာမီတိ ဝါစာ ဘိန္ဒိတဗ္ဗာ. သစေ အန္တရဝါသကေန ကထိနံ အတ္ထရိတုကာမော ဟောတိ, ပေါရာဏကော အန္တရဝါသကော ပစ္စုဒ္ဓရိတဗ္ဗော, နဝေါ အန္တရဝါသကော အဓိဋ္ဌာတဗ္ဗော. ဣမိနာ အန္တရဝါသကေန ကထိနံ အတ္ထရာမီတိ ဝါစာ ဘိန္ဒိတဗ္ဗာ. တေန ကထိနတ္ထာရကေန ဘိက္ခုနာ သံဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော— “အတ္ထတံ, ဘန္တေ, သံဃဿ ကထိနံ, ဓမ္မိကော ကထိနတ္ထာရော, အနုမောဒထာ”တိ. တေဟိ အနုမောဒကေဟိ ဘိက္ခူဟိ ဧကံသံ ဥတ္တရာသင်္ဂံ ကရိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော— “အတ္ထတံ, အာဝုသော, သံဃဿ ကထိနံ, ဓမ္မိကော ကထိနတ္ထာရော, အနုမောဒါမာ”တိ. တေန ကထိနတ္ထာရကေန ဘိက္ခုနာ သမ္ဗဟုလေ ဘိက္ခူ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ အဉ္ဇလိံ ပဂ္ဂဟေတွာ ဧဝမဿု ဝစနီယာ— “အတ္ထတံ, ဘန္တေ, သံဃဿ ကထိနံ, ဓမ္မိကော ကထိနတ္ထာရော, အနုမောဒထာ”တိ. တေဟိ အနုမောဒကေဟိ ဘိက္ခူဟိ ဧကံသံ ဥတ္တရာသင်္ဂံ ကရိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော— “အတ္ထတံ, အာဝုသော, သံဃဿ ကထိနံ, ဓမ္မိကော ကထိနတ္ထာရော အနုမောဒါမာ”တိ. တေန ကထိနတ္ထာရကေန ဘိက္ခုနာ ဧကံ ဘိက္ခုံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော— “အတ္ထတံ, အာဝုသော, သံဃဿ ကထိနံ, ဓမ္မိကော ကထိနတ္ထာရော, အနုမောဒါဟီ”တိ. တေန အနုမောဒကေန ဘိက္ခုနာ ဧကံသံ ဥတ္တရာသင်္ဂံ ကရိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော— “အတ္ထတံ, အာဝုသော, သံဃဿ ကထိနံ, ဓမ္မိကော ကထိနတ္ထာရော, အနုမောဒါမီ”တိ.