16.5 ပုဂ္ဂလဿေဝကထိနတ္ထာရ
သံဃော ကထိနံ အတ္ထရတိ, ဂဏော ကထိနံ အတ္ထရတိ, ပုဂ္ဂလော ကထိနံ အတ္ထရတီတိ? န သံဃော ကထိနံ အတ္ထရတိ, န ဂဏော ကထိနံ အတ္ထရတိ, ပုဂ္ဂလော ကထိနံ အတ္ထရတီတိ. ဟဉ္စိ န သံဃော ကထိနံ အတ္ထရတိ, န ဂဏော ကထိနံ အတ္ထရတိ, ပုဂ္ဂလော ကထိနံ အတ္ထရတိ. သံဃဿ အနတ္ထတံ ဟောတိ ကထိနံ, ဂဏဿ အနတ္ထတံ ဟောတိ ကထိနံ, ပုဂ္ဂလဿ အတ္ထတံ ဟောတိ ကထိနံ. သံဃော ပါတိမောက္ခံ ဥဒ္ဒိသတိ ဂဏော ပါတိမောက္ခံ ဥဒ္ဒိသတိ ပုဂ္ဂလော ပါတိမောက္ခံ ဥဒ္ဒိသတီတိ? န သံဃော ပါတိမောက္ခံ ဥဒ္ဒိသတိ, န ဂဏော ပါတိမောက္ခံ ဥဒ္ဒိသတိ, ပုဂ္ဂလော ပါတိမောက္ခံ ဥဒ္ဒိသတီတိ. ဟဉ္စိ န သံဃော ပါတိမောက္ခံ ဥဒ္ဒိသတိ, န ဂဏော ပါတိမောက္ခံ ဥဒ္ဒိသတိ, ပုဂ္ဂလော ပါတိမောက္ခံ ဥဒ္ဒိသတိ. သံဃဿ အနုဒ္ဒိဋ္ဌံ ဟောတိ ပါတိမောက္ခံ, ဂဏဿ အနုဒ္ဒိဋ္ဌံ ဟောတိ ပါတိမောက္ခံ, ပုဂ္ဂလဿ ဥဒ္ဒိဋ္ဌံ ဟောတိ ပါတိမောက္ခံ. သံဃဿ သာမဂ္ဂိယာ ဂဏဿ သာမဂ္ဂိယာ ပုဂ္ဂလဿ ဥဒ္ဒေသာ သံဃဿ ဥဒ္ဒိဋ္ဌံ ဟောတိ ပါတိမောက္ခံ, ဂဏဿ ဥဒ္ဒိဋ္ဌံ ဟောတိ ပါတိမောက္ခံ, ပုဂ္ဂလဿ ဥဒ္ဒိဋ္ဌံ ဟောတိ ပါတိမောက္ခံ. ဧဝမေဝ န သံဃော ကထိနံ အတ္ထရတိ, န ဂဏော ကထိနံ အတ္ထရတိ, ပုဂ္ဂလော ကထိနံ အတ္ထရတိ. သံဃဿ အနုမောဒနာယ ဂဏဿ အနုမောဒနာယ ပုဂ္ဂလဿ အတ္ထာရာ သံဃဿ အတ္ထတံ ဟောတိ ကထိနံ, ဂဏဿ အတ္ထတံ ဟောတိ ကထိနံ, ပုဂ္ဂလဿ အတ္ထတံ ဟောတိ ကထိနန္တိ.