16.6 ပလိဗောဓပဉှာဗျာကရဏ
ပက္ကမနန္တိကော ကထိနုဒ္ဓါရော,
ဝုတ္တော အာဒိစ္စဗန္ဓုနာ;
ဧတဉ္စ တာဟံ ပုစ္ဆာမိ,
ကတမော ပလိဗောဓော ပဌမံ ဆိဇ္ဇတိ.
ပက္ကမနန္တိကော ကထိနုဒ္ဓါရော,
ဝုတ္တော အာဒိစ္စဗန္ဓုနာ;
ဧတဉ္စ တာဟံ ဝိဿဇ္ဇိဿံ,
စီဝရပလိဗောဓော ပဌမံ ဆိဇ္ဇတိ;
တဿ သဟ ဗဟိသီမဂမနာ,
အာဝါသပလိဗောဓော ဆိဇ္ဇတိ. (1)
နိဋ္ဌာနန္တိကော ကထိနုဒ္ဓါရော,
ဝုတ္တော အာဒိစ္စဗန္ဓုနာ;
ဧတဉ္စ တာဟံ ပုစ္ဆာမိ,
ကတမော ပလိဗောဓော ပဌမံ ဆိဇ္ဇတိ.
နိဋ္ဌာနန္တိကော ကထိနုဒ္ဓါရော,
ဝုတ္တော အာဒိစ္စဗန္ဓုနာ;
ဧတဉ္စ တာဟံ ဝိဿဇ္ဇိဿံ,
အာဝါသပလိဗောဓော ပဌမံ ဆိဇ္ဇတိ;
စီဝရေ နိဋ္ဌိတေ စီဝရပလိဗောဓော ဆိဇ္ဇတိ. (2)
သန္နိဋ္ဌာနန္တိကော ကထိနုဒ္ဓါရော,
ဝုတ္တော အာဒိစ္စဗန္ဓုနာ;
ဧတဉ္စ တာဟံ ပုစ္ဆာမိ,
ကတမော ပလိဗောဓော ပဌမံ ဆိဇ္ဇတိ.
သန္နိဋ္ဌာနန္တိကော ကထိနုဒ္ဓါရော,
ဝုတ္တော အာဒိစ္စဗန္ဓုနာ;
ဧတဉ္စ တာဟံ ဝိဿဇ္ဇိဿံ,
ဒွေ ပလိဗောဓာ အပုဗ္ဗံ အစရိမံ ဆိဇ္ဇန္တိ. (3)
နာသနန္တိကော ကထိနုဒ္ဓါရော,
ဝုတ္တော အာဒိစ္စဗန္ဓုနာ;
ဧတဉ္စ တာဟံ ပုစ္ဆာမိ,
ကတမော ပလိဗောဓော ပဌမံ ဆိဇ္ဇတိ.
နာသနန္တိကော ကထိနုဒ္ဓါရော,
ဝုတ္တော အာဒိစ္စဗန္ဓုနာ;
ဧတဉ္စ တာဟံ ဝိဿဇ္ဇိဿံ,
အာဝါသပလိဗောဓော ပဌမံ ဆိဇ္ဇတိ;
စီဝရေ နဋ္ဌေ စီဝရပလိဗောဓော ဆိဇ္ဇတိ. (4)
သဝနန္တိကော ကထိနုဒ္ဓါရော,
ဝုတ္တော အာဒိစ္စဗန္ဓုနာ;
ဧတဉ္စ တာဟံ ပုစ္ဆာမိ,
ကတမော ပလိဗောဓော ပဌမံ ဆိဇ္ဇတိ.
သဝနန္တိကော ကထိနုဒ္ဓါရော,
ဝုတ္တော အာဒိစ္စဗန္ဓုနာ;
ဧတဉ္စ တာဟံ ဝိဿဇ္ဇိဿံ,
စီဝရပလိဗောဓော ပဌမံ ဆိဇ္ဇတိ;
တဿ သဟ သဝနေန,
အာဝါသပလိဗောဓော ဆိဇ္ဇတိ. (5)
အာသာဝစ္ဆေဒိကော ကထိနုဒ္ဓါရော,
ဝုတ္တော အာဒိစ္စဗန္ဓုနာ;
ဧတဉ္စ တာဟံ ပုစ္ဆာမိ,
ကတမော ပလိဗောဓော ပဌမံ ဆိဇ္ဇတိ.
အာသာဝစ္ဆေဒိကော ကထိနုဒ္ဓါရော,
ဝုတ္တော အာဒိစ္စဗန္ဓုနာ;
ဧတဉ္စ တာဟံ ဝိဿဇ္ဇိဿံ,
အာဝါသပလိဗောဓော ပဌမံ ဆိဇ္ဇတိ;
စီဝရာသာယ ဥပစ္ဆိန္နာယ စီဝရပလိဗောဓော ဆိဇ္ဇတိ. (6)
သီမာတိက္ကမနန္တိကော ကထိနုဒ္ဓါရော,
ဝုတ္တော အာဒိစ္စဗန္ဓုနာ;
ဧတဉ္စ တာဟံ ပုစ္ဆာမိ,
ကတမော ပလိဗောဓော ပဌမံ ဆိဇ္ဇတိ.
သီမာတိက္ကမနန္တိကော ကထိနုဒ္ဓါရော,
ဝုတ္တော အာဒိစ္စဗန္ဓုနာ;
ဧတဉ္စ တာဟံ ဝိဿဇ္ဇိဿံ,
စီဝရပလိဗောဓော ပဌမံ ဆိဇ္ဇတိ;
တဿ ဗဟိသီမေ အာဝါသပလိဗောဓော ဆိဇ္ဇတိ. (7)
သဟုဗ္ဘာရော ကထိနုဒ္ဓါရော,
ဝုတ္တော အာဒိစ္စဗန္ဓုနာ;
ဧတဉ္စ တာဟံ ပုစ္ဆာမိ,
ကတမော ပလိဗောဓော ပဌမံ ဆိဇ္ဇတိ.
သဟုဗ္ဘာရော ကထိနုဒ္ဓါရော,
ဝုတ္တော အာဒိစ္စဗန္ဓုနာ;
ဧတဉ္စ တာဟံ ဝိဿဇ္ဇိဿံ,
ဒွေ ပလိဗောဓာ အပုဗ္ဗံ အစရိမံ ဆိဇ္ဇန္တီတိ. (8)
ကတိ ကထိနုဒ္ဓါရာ သံဃာဓီနာ? ကတိ ကထိနုဒ္ဓါရာ ပုဂ္ဂလာဓီနာ? ကတိ ကထိနုဒ္ဓါရာ နေဝ သံဃာဓီနာ န ပုဂ္ဂလာဓီနာ? ဧကော ကထိနုဒ္ဓါရော သံဃာဓီနော— အန္တရုဗ္ဘာရော. စတ္တာရော ကထိနုဒ္ဓါရာ ပုဂ္ဂလာဓီနာ— ပက္ကမနန္တိကော, နိဋ္ဌာနန္တိကော, သန္နိဋ္ဌာနန္တိကော, သီမာတိက္ကမနန္တိကော. စတ္တာရော ကထိနုဒ္ဓါရာ နေဝ သံဃာဓီနာ န ပုဂ္ဂလာဓီနာ— နာသနန္တိကော, သဝနန္တိကော, အာသာဝစ္ဆေဒိကော, သဟုဗ္ဘာရော. ကတိ ကထိနုဒ္ဓါရာ အန္တောသီမာယ ဥဒ္ဓရိယျန္တိ? ကတိ ကထိနုဒ္ဓါရာ ဗဟိသီမာယ ဥဒ္ဓရိယျန္တိ? ကတိ ကထိနုဒ္ဓါရာ သိယာ အန္တောသီမာယ ဥဒ္ဓရိယျန္တိ သိယာ ဗဟိသီမာယ ဥဒ္ဓရိယျန္တိ? ဒွေ ကထိနုဒ္ဓါရာ အန္တောသီမာယ ဥဒ္ဓရိယျန္တိ— အန္တရုဗ္ဘာရော, သဟုဗ္ဘာရော. တယော ကထိနုဒ္ဓါရာ ဗဟိသီမာယ ဥဒ္ဓရိယျန္တိ— ပက္ကမနန္တိကော, သဝနန္တိကော, သီမာတိက္ကမနန္တိကော. စတ္တာရော ကထိနုဒ္ဓါရာ သိယာ အန္တောသီမာယ ဥဒ္ဓရိယျန္တိ သိယာ ဗဟိသီမာယ ဥဒ္ဓရိယျန္တိ— နိဋ္ဌာနန္တိကော, သန္နိဋ္ဌာနန္တိကော, နာသနန္တိကော, အာသာဝစ္ဆေဒိကော.
ကတိ ကထိနုဒ္ဓါရာ ဧကုပ္ပါဒါ ဧကနိရောဓာ? ကတိ ကထိနုဒ္ဓါရာ ဧကုပ္ပါဒါ နာနာနိရောဓာ? ဒွေ ကထိနုဒ္ဓါရာ ဧကုပ္ပါဒါ ဧကနိရောဓာ— အန္တရုဗ္ဘာရော, သဟုဗ္ဘာရော. အဝသေသာ ကထိနုဒ္ဓါရာ ဧကုပ္ပါဒါ နာနာနိရောဓာတိ.
ကထိနဘေဒေါ နိဋ္ဌိတော.
တဿုဒ္ဒါနံ
ကဿ ကိန္တိ ပန္နရသ,
ဓမ္မာ နိဒါနဟေတု စ;
ပစ္စယသင်္ဂဟမူလာ,
အာဒိ စ အတ္ထာရပုဂ္ဂလာ.
တိဏ္ဏံ တယော ဇာနိတဗ္ဗံ,
အတ္ထာရံ ဥဒ္ဒေသေန စ;
ပလိဗောဓာဓိနာ သီမာယ,
ဥပ္ပါဒနိရောဓေန စာတိ._