1.10 ဒုတိယမာရကထာ
Review
35.
147
အထ ခေါ ဘဂဝါ ဝဿံဝုဋ္ဌော ဘိက္ခူ အာမန္တေသိ— “မယှံ ခေါ, ဘိက္ခဝေ, ယောနိသော မနသိကာရာ ယောနိသော သမ္မပ္ပဓာနာ အနုတ္တရာ ဝိမုတ္တိ အနုပ္ပတ္တာ, အနုတ္တရာ ဝိမုတ္တိ သစ္ဆိကတာ. တုမှေပိ, ဘိက္ခဝေ, ယောနိသော မနသိကာရာ ယောနိသော သမ္မပ္ပဓာနာ အနုတ္တရံ ဝိမုတ္တိံ အနုပါပုဏာထ, အနုတ္တရံ ဝိမုတ္တိံ သစ္ဆိကရောထာ”တိ. အထ ခေါ မာရော ပါပိမာ ယေန ဘဂဝါ တေနုပသင်္ကမိ, ဥပသင်္ကမိတွာ ဘဂဝန္တံ ဂါထာယ အဇ္ဈဘာသိ—
148
“ဗဒ္ဓေါသိ မာရပါသေဟိ,
ယေ ဒိဗ္ဗာ ယေ စ မာနုသာ;
မဟာဗန္ဓနဗဒ္ဓေါသိ,
န မေ သမဏ မောက္ခသီ”တိ.
149
“မုတ္တာဟံ မာရပါသေဟိ,
ယေ ဒိဗ္ဗာ ယေ စ မာနုသာ;
မဟာဗန္ဓနမုတ္တောမှိ,
နိဟတော တွမသိ အန္တကာ”တိ.
150
အထ ခေါ မာရော ပါပိမာ— “ဇာနာတိ မံ ဘဂဝါ, ဇာနာတိ မံ သုဂတော”တိ ဒုက္ခီ ဒုမ္မနော တတ္ထေဝန္တရဓာယိ.
151
ဒုတိယမာရကထာ နိဋ္ဌိတာ.