1.21 ဗာလအဗျတ္တဝတ္ထု
တေန ခေါ ပန သမယေန ဘိက္ခူ, ဒသဝဿမှာ ဒသဝဿမှာတိ, ဗာလာ အဗျတ္တာ နိဿယံ ဒေန္တိ. ဒိဿန္တိ အာစရိယာ ဗာလာ, အန္တေဝါသိကာ ပဏ္ဍိတာ. ဒိဿန္တိ အာစရိယာ အဗျတ္တာ, အန္တေဝါသိကာ ဗျတ္တာ. ဒိဿန္တိ အာစရိယာ အပ္ပဿုတာ, အန္တေဝါသိကာ ဗဟုဿုတာ. ဒိဿန္တိ အာစရိယာ ဒုပ္ပညာ, အန္တေဝါသိကာ ပညဝန္တော. ယေ တေ ဘိက္ခူ အပ္ပိစ္ဆာ …ပေ… တေ ဥဇ္ဈာယန္တိ ခိယျန္တိ ဝိပါစေန္တိ— “ကထဉှိ နာမ ဘိက္ခူ— ဒသဝဿမှာ ဒသဝဿမှာတိ— ဗာလာ အဗျတ္တာ နိဿယံ ဒဿန္တိ. ဒိဿန္တိ အာစရိယာ ဗာလာ အန္တေဝါသိကာ ပဏ္ဍိတာ, ဒိဿန္တိ အာစရိယာ အဗျတ္တာ အန္တေဝါသိကာ ဗျတ္တာ, ဒိဿန္တိ အာစရိယာ အပ္ပဿုတာ အန္တေဝါသိကာ ဗဟုဿုတာ, ဒိဿန္တိ အာစရိယာ ဒုပ္ပညာ အန္တေဝါသိကာ ပညဝန္တော”တိ. အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ …ပေ… “သစ္စံ ကိရ, ဘိက္ခဝေ, ဘိက္ခူ— ဒသဝဿမှာ ဒသဝဿမှာတိ— ဗာလာ အဗျတ္တာ နိဿယံ ဒေန္တိ …ပေ… “သစ္စံ, ဘဂဝါ”တိ. ဝိဂရဟိ ဗုဒ္ဓေါ ဘဂဝါ …ပေ… ဝိဂရဟိတွာ …ပေ… ဓမ္မိံ ကထံ ကတွာ ဘိက္ခူ အာမန္တေသိ— “န, ဘိက္ခဝေ, ဗာလေန အဗျတ္တေန နိဿယော ဒါတဗ္ဗော. ယော ဒဒေယျ, အာပတ္တိ ဒုက္ကဋဿ. အနုဇာနာမိ, ဘိက္ခဝေ, ဗျတ္တေန ဘိက္ခုနာ ပဋိဗလေန ဒသဝဿေန ဝါ အတိရေကဒသဝဿေန ဝါ နိဿယံ ဒါတုန်”တိ.
ဗာလအဗျတ္တဝတ္ထု နိဋ္ဌိတံ.