1.26 ပဉ္စာဗာဓဝတ္ထု
တေန ခေါ ပန သမယေန မဂဓေသု ပဉ္စ အာဗာဓာ ဥဿန္နာ ဟောန္တိ— ကုဋ္ဌံ, ဂဏ္ဍော, ကိလာသော, သောသော, အပမာရော. မနုဿာ ပဉ္စဟိ အာဗာဓေဟိ ဖုဋ္ဌာ ဇီဝကံ ကောမာရဘစ္စံ ဥပသင်္ကမိတွာ ဧဝံ ဝဒန္တိ— “သာဓု နော, အာစရိယ, တိကိစ္ဆာဟီ”တိ. “အဟံ ခွယျော, ဗဟုကိစ္စော ဗဟုကရဏီယော; ရာဇာ စ မေ မာဂဓော သေနိယော ဗိမ္ဗိသာရော ဥပဋ္ဌာတဗ္ဗော ဣတ္ထာဂါရဉ္စ ဗုဒ္ဓပ္ပမုခေါ စ ဘိက္ခုသံဃော; နာဟံ သက္ကောမိ တိကိစ္ဆိတုန်”တိ. “သဗ္ဗံ သာပတေယျဉ္စ တေ, အာစရိယ, ဟောတု; မယဉ္စ တေ ဒါသာ; သာဓု, နော, အာစရိယ, တိကိစ္ဆာဟီ”တိ. “အဟံ ခွယျော, ဗဟုကိစ္စော ဗဟုကရဏီယော ရာဇာ စ မေ မာဂဓော သေနိယော ဗိမ္ဗိသာရော ဥပဋ္ဌာတဗ္ဗော ဣတ္ထာဂါရဉ္စ ဗုဒ္ဓပ္ပမုခေါ စ ဘိက္ခုသံဃော; နာဟံ သက္ကောမိ တိကိစ္ဆိတုန်”တိ. အထ ခေါ တေသံ မနုဿာနံ ဧတဒဟောသိ— “ဣမေ ခေါ သမဏာ သကျပုတ္တိယာ သုခသီလာ သုခသမာစာရာ, သုဘောဇနာနိ ဘုဉ္ဇိတွာ နိဝါတေသု သယနေသု သယန္တိ. ယန္နူန မယံ သမဏေသု သကျပုတ္တိယေသု ပဗ္ဗဇေယျာမ. တတ္ထ ဘိက္ခူ စေဝ ဥပဋ္ဌဟိဿန္တိ, ဇီဝကော စ ကောမာရဘစ္စော တိကိစ္ဆိဿတီ”တိ. အထ ခေါ တေ မနုဿာ ဘိက္ခူ ဥပသင်္ကမိတွာ ပဗ္ဗဇ္ဇံ ယာစိံသု. တေ ဘိက္ခူ ပဗ္ဗာဇေသုံ, ဥပသမ္ပာဒေသုံ. တေ ဘိက္ခူ စေဝ ဥပဋ္ဌဟိံသု ဇီဝကော စ ကောမာရဘစ္စော တိကိစ္ဆိ. တေန ခေါ ပန သမယေန ဘိက္ခူ ဗဟူ ဂိလာနေ ဘိက္ခူ ဥပဋ္ဌဟန္တာ ယာစနဗဟုလာ ဝိညတ္တိဗဟုလာ ဝိဟရန္တိ— “ဂိလာနဘတ္တံ ဒေထ, ဂိလာနုပဋ္ဌာကဘတ္တံ ဒေထ, ဂိလာနဘေသဇ္ဇံ ဒေထာ”တိ. ဇီဝကောပိ ကောမာရဘစ္စော ဗဟူ ဂိလာနေ ဘိက္ခူ တိကိစ္ဆန္တော အညတရံ ရာဇကိစ္စံ ပရိဟာပေသိ.
အညတရောပိ ပုရိသော ပဉ္စဟိ အာဗာဓေဟိ ဖုဋ္ဌော ဇီဝကံ ကောမာရဘစ္စံ ဥပသင်္ကမိတွာ ဧတဒဝေါစ— “သာဓု မံ, အာစရိယ, တိကိစ္ဆာဟီ”တိ. “အဟံ ခွယျော, ဗဟုကိစ္စော, ဗဟုကရဏီယော, ရာဇာ စ မေ မာဂဓော သေနိယော ဗိမ္ဗိသာရော ဥပဋ္ဌာတဗ္ဗော ဣတ္ထာဂါရဉ္စ ဗုဒ္ဓပ္ပမုခေါ စ ဘိက္ခုသံဃော; နာဟံ သက္ကောမိ တိကိစ္ဆိတုန်”တိ. “သဗ္ဗံ သာပတေယျဉ္စ တေ, အာစရိယ, ဟောတု, အဟဉ္စ တေ ဒါသော; သာဓု မံ, အာစရိယ, တိကိစ္ဆာဟီ”တိ. “အဟံ ခွယျော, ဗဟုကိစ္စော ဗဟုကရဏီယော, ရာဇာ စ မေ မာဂဓော သေနိယော ဗိမ္ဗိသာရော ဥပဋ္ဌာတဗ္ဗော ဣတ္ထာဂါရဉ္စ ဗုဒ္ဓပ္ပမုခေါ စ ဘိက္ခုသံဃော, နာဟံ သက္ကောမိ တိကိစ္ဆိတုန်”တိ.
အထ ခေါ တဿ ပုရိသဿ ဧတဒဟောသိ— “ဣမေ ခေါ သမဏာ သကျပုတ္တိယာ သုခသီလာ သုခသမာစာရာ, သုဘောဇနာနိ ဘုဉ္ဇိတွာ နိဝါတေသု သယနေသု သယန္တိ. ယန္နူနာဟံ သမဏေသု သကျပုတ္တိယေသု ပဗ္ဗဇေယျံ. တတ္ထ ဘိက္ခူ စေဝ ဥပဋ္ဌဟိဿန္တိ, ဇီဝကော စ ကောမာရဘစ္စော တိကိစ္ဆိဿတိ. သောမှိ အရောဂေါ ဝိဗ္ဘမိဿာမီ”တိ. အထ ခေါ သော ပုရိသော ဘိက္ခု ဥပသင်္ကမိတွာ ပဗ္ဗဇ္ဇံ ယာစိ. တံ ဘိက္ခူ ပဗ္ဗာဇေသုံ, ဥပသမ္ပာဒေသုံ. တံ ဘိက္ခူ စေဝ ဥပဋ္ဌဟိံသု, ဇီဝကော စ ကောမာရဘစ္စော တိကိစ္ဆိ. သော အရောဂေါ ဝိဗ္ဘမိ.
အဒ္ဒသာ ခေါ ဇီဝကော ကောမာရဘစ္စော တံ ပုရိသံ ဝိဗ္ဘန္တံ, ဒိသွာန တံ ပုရိသံ ဧတဒဝေါစ— “နနု တွံ, အယျော, ဘိက္ခူသု ပဗ္ဗဇိတော အဟောသီ”တိ? “ဧဝံ, အာစရိယာ”တိ. “ကိဿ ပန တွံ, အယျော, ဧဝရူပမကာသီ”တိ? အထ ခေါ သော ပုရိသော ဇီဝကဿ ကောမာရဘစ္စဿ ဧတမတ္ထံ အာရောစေသိ. ဇီဝကော ကောမာရဘစ္စော ဥဇ္ဈာယတိ ခိယျတိ ဝိပါစေတိ— “ကထဉှိ နာမ ဘဒန္တာ ပဉ္စဟိ အာဗာဓေဟိ ဖုဋ္ဌံ ပဗ္ဗာဇေဿန္တီ”တိ. အထ ခေါ ဇီဝကော ကောမာရဘစ္စော ယေန ဘဂဝါ တေနုပသင်္ကမိ, ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ ဇီဝကော ကောမာရဘစ္စော ဘဂဝန္တံ ဧတဒဝေါစ— “သာဓု, ဘန္တေ, အယျာ ပဉ္စဟိ အာဗာဓေဟိ ဖုဋ္ဌံ န ပဗ္ဗာဇေယျုန်”တိ. အထ ခေါ ဘဂဝါ ဇီဝကံ ကောမာရဘစ္စံ ဓမ္မိယာ ကထာယ သန္ဒဿေသိ သမာဒပေသိ သမုတ္တေဇေသိ သမ္ပဟံသေသိ. အထ ခေါ ဇီဝကော ကောမာရဘစ္စော ဘဂဝတာ ဓမ္မိယာ ကထာယ သန္ဒဿိတော သမာဒပိတော သမုတ္တေဇိတော သမ္ပဟံသိတော ဥဋ္ဌာယာသနာ ဘဂဝန္တံ အဘိဝါဒေတွာ ပဒက္ခိဏံ ကတွာ ပက္ကာမိ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ— “န, ဘိက္ခဝေ, ပဉ္စဟိ အာဗာဓေဟိ ဖုဋ္ဌော ပဗ္ဗာဇေတဗ္ဗော. ယော ပဗ္ဗာဇေယျ, အာပတ္တိ ဒုက္ကဋဿာ”တိ.