1.33 ဣဏာယိကဝတ္ထု
Review
96.
434
တေန ခေါ ပန သမယေန အညတရော ပုရိသော ဣဏာယိကော ပလာယိတွာ ဘိက္ခူသု ပဗ္ဗဇိတော ဟောတိ. ဓနိယာ ပဿိတွာ ဧဝမာဟံသု— “အယံ သော အမှာကံ ဣဏာယိကော. ဟန္ဒ နံ နေမာ”တိ. ဧကစ္စေ ဧဝမာဟံသု— “မာယျော, ဧဝံ အဝစုတ္ထ. အနုညာတံ ရညာ မာဂဓေန သေနိယေန ဗိမ္ဗိသာရေန— ‘ယေ သမဏေသု သကျပုတ္တိယေသု ပဗ္ဗဇန္တိ, န တေ လဗ္ဘာ ကိဉ္စိ ကာတုံ; သွာက္ခာတော ဓမ္မော, စရန္တု ဗြဟ္မစရိယံ သမ္မာ ဒုက္ခဿ အန္တကိရိယာယာ’”တိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ— “အဘယူဝရာ ဣမေ သမဏာ သကျပုတ္တိယာ. နယိမေ လဗ္ဘာ ကိဉ္စိ ကာတုံ. ကထဉှိ နာမ သမဏာ သကျပုတ္တိယာ ဣဏာယိကံ ပဗ္ဗာဇေဿန္တီ”တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဣဏာယိကော ပဗ္ဗာဇေတဗ္ဗော. ယော ပဗ္ဗာဇေယျ, အာပတ္တိ ဒုက္ကဋဿာ”တိ.