1.37 အဟိဝါတကရောဂဝတ္ထု
တေန ခေါ ပန သမယေန အညတရံ ကုလံ အဟိဝါတကရောဂေန ကာလင်္ကတံ ဟောတိ. တဿ ပိတာပုတ္တကာ သေသာ ဟောန္တိ. တေ ဘိက္ခူသု ပဗ္ဗဇိတွာ ဧကတောဝ ပိဏ္ဍာယ စရန္တိ. အထ ခေါ သော ဒါရကော ပိတုနော ဘိက္ခာယ ဒိန္နာယ ဥပဓာဝိတွာ ဧတဒဝေါစ— “မယှမ္ပိ, တာတ, ဒေဟိ; မယှမ္ပိ, တာတ, ဒေဟီ”တိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ— “အဗြဟ္မစာရိနော ဣမေ သမဏာ သကျပုတ္တိယာ. အယမ္ပိ ဒါရကော ဘိက္ခုနိယာ ဇာတော”တိ. အဿောသုံ ခေါ ဘိက္ခူ တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ. အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဦနပန္နရသဝဿော ဒါရကော ပဗ္ဗာဇေတဗ္ဗော. ယော ပဗ္ဗာဇေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန အာယသ္မတော အာနန္ဒဿ ဥပဋ္ဌာကကုလံ သဒ္ဓံ ပသန္နံ အဟိဝါတကရောဂေန ကာလင်္ကတံ ဟောတိ, ဒွေ စ ဒါရကာ သေသာ ဟောန္တိ. တေ ပေါရာဏကေန အာစိဏ္ဏကပ္ပေန ဘိက္ခူ ပဿိတွာ ဥပဓာဝန္တိ. ဘိက္ခူ အပသာဒေန္တိ. တေ ဘိက္ခူဟိ အပသာဒိယမာနာ ရောဒန္တိ. အထ ခေါ အာယသ္မတော အာနန္ဒဿ ဧတဒဟောသိ— “ဘဂဝတာ ပညတ္တံ— ‘န ဦနပန္နရသဝဿော ဒါရကော ပဗ္ဗာဇေတဗ္ဗော’တိ. ဣမေ စ ဒါရကာ ဦနပန္နရသဝဿာ. ကေန နု ခေါ ဥပါယေန ဣမေ ဒါရကာ န ဝိနဿေယျုန်”တိ? အထ ခေါ အာယသ္မာ အာနန္ဒော ဘဂဝတော ဧတမတ္ထံ အာရောစေသိ. “ဥဿဟန္တိ ပန တေ, အာနန္ဒ, ဒါရကာ ကာကေ ဥဍ္ဍာပေတုန်”တိ? “ဥဿဟန္တိ, ဘဂဝါ”တိ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ— “အနုဇာနာမိ, ဘိက္ခဝေ, ဦနပန္နရသဝဿံ ဒါရကံ ကာကုဍ္ဍေပကံ ပဗ္ဗာဇေတုန်”တိ.