1.39 အာဟုန္ဒရိကဝတ္ထု
တေန ခေါ ပန သမယေန ဘဂဝါ တတ္ထေဝ ရာဇဂဟေ ဝဿံ ဝသိ, တတ္ထ ဟေမန္တံ, တတ္ထ ဂိမှံ. မနုဿာ ဥဇ္ဈာယန္တိ ခိယျန္တိ ဝိပါစေန္တိ— “အာဟုန္ဒရိကာ သမဏာနံ သကျပုတ္တိယာနံ ဒိသာ အန္ဓကာရာ, န ဣမေသံ ဒိသာ ပက္ခာယန္တီ”တိ. အဿောသုံ ခေါ ဘိက္ခူ တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ. အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ. အထ ခေါ ဘဂဝါ အာယသ္မန္တံ အာနန္ဒံ အာမန္တေသိ— “ဂစ္ဆာနန္ဒ, အဝါပုရဏံ အာဒါယ အနုပရိဝေဏိယံ ဘိက္ခူနံ အာရောစေဟိ— ‘ဣစ္ဆတာဝုသော ဘဂဝါ ဒက္ခိဏာဂိရိံ စာရိကံ ပက္ကမိတုံ. ယဿာယသ္မတော အတ္ထော, သော အာဂစ္ဆတူ’”တိ. “ဧဝံ, ဘန္တေ”တိ ခေါ အာယသ္မာ အာနန္ဒော ဘဂဝတော ပဋိဿုဏိတွာ အဝါပုရဏံ အာဒါယ အနုပရိဝေဏိယံ ဘိက္ခူနံ အာရောစေသိ— “ဣစ္ဆတာဝုသော, ဘဂဝါ ဒက္ခိဏာဂိရိံ စာရိကံ ပက္ကမိတုံ. ယဿာယသ္မတော အတ္ထော, သော အာဂစ္ဆတူ”တိ. ဘိက္ခူ ဧဝမာဟံသု— “ဘဂဝတာ, အာဝုသော အာနန္ဒ, ပညတ္တံ ဒသဝဿာနိ နိဿာယ ဝတ္ထုံ, ဒသဝဿေန နိဿယံ ဒါတုံ. တတ္ထ စ နော ဂန္တဗ္ဗံ ဘဝိဿတိ, နိဿယော စ ဂဟေတဗ္ဗော ဘဝိဿတိ, ဣတ္တရော စ ဝါသော ဘဝိဿတိ, ပုန စ ပစ္စာဂန္တဗ္ဗံ ဘဝိဿတိ, ပုန စ နိဿယော ဂဟေတဗ္ဗော ဘဝိဿတိ. သစေ အမှာကံ အာစရိယုပဇ္ဈာယာ ဂမိဿန္တိ, မယမ္ပိ ဂမိဿာမ; နော စေ အမှာကံ အာစရိယုပဇ္ဈာယာ ဂမိဿန္တိ, မယမ္ပိ န ဂမိဿာမ. လဟုစိတ္တကတာ နော, အာဝုသော အာနန္ဒ, ပညာယိဿတီ”တိ. အထ ခေါ ဘဂဝါ ဩဂဏေန ဘိက္ခုသံဃေန ဒက္ခိဏာဂိရိံ စာရိကံ ပက္ကာမိ.