1.58 အလဇ္ဇီနိဿယဝတ္ထု
Review
120.
504
တေန ခေါ ပန သမယေန ဆဗ္ဗဂ္ဂိယာ ဘိက္ခူ အလဇ္ဇီနံ နိဿယံ ဒေန္တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, အလဇ္ဇီနံ နိဿယော ဒါတဗ္ဗော. ယော ဒဒေယျ, အာပတ္တိ ဒုက္ကဋဿာ”တိ.
505
တေန ခေါ ပန သမယေန ဘိက္ခူ အလဇ္ဇီနံ နိဿာယ ဝသန္တိ. တေပိ နစိရဿေဝ အလဇ္ဇိနော ဟောန္တိ ပါပကာ. ဘိက္ခူ ဘဂဝတော ဧတမတ္ထံ အာရောစေသုံ. “န, ဘိက္ခဝေ, အလဇ္ဇီနံ နိဿာယ ဝတ္ထဗ္ဗံ. ယော ဝသေယျ, အာပတ္တိ ဒုက္ကဋဿာ”တိ.
506
အထ ခေါ ဘိက္ခူနံ ဧတဒဟောသိ— “ဘဂဝတာ ပညတ္တံ— ‘န အလဇ္ဇီနံ နိဿယော ဒါတဗ္ဗော, န အလဇ္ဇီနံ နိဿာယ ဝတ္ထဗ္ဗန်’တိ. ကထံ နု ခေါ မယံ ဇာနေယျာမ လဇ္ဇိံ ဝါ အလဇ္ဇိံ ဝါ”တိ? ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, စတူဟပဉ္စာဟံ အာဂမေတုံ ယာဝ ဘိက္ခုသဘာဂတံ ဇာနာမီ”တိ.