1.64 စတ္တာရောနိဿယ
Review
128.
533
“တာဝဒေဝ ဆာယာ မေတဗ္ဗာ, ဥတုပ္ပမာဏံ အာစိက္ခိတဗ္ဗံ, ဒိဝသဘာဂေါ အာစိက္ခိတဗ္ဗော, သင်္ဂီတိ အာစိက္ခိတဗ္ဗာ, စတ္တာရော နိဿယာ အာစိက္ခိတဗ္ဗာ—
534
ပိဏ္ဍိယာလောပဘောဇနံ နိဿာယ ပဗ္ဗဇ္ဇာ. တတ္ထ တေ ယာဝဇီဝံ ဥဿာဟော ကရဏီယော. အတိရေကလာဘော— သံဃဘတ္တံ, ဥဒ္ဒေသဘတ္တံ, နိမန္တနံ, သလာကဘတ္တံ, ပက္ခိကံ, ဥပေါသထိကံ, ပါဋိပဒိကံ. (1)
535
ပံသုကူလစီဝရံ နိဿာယ ပဗ္ဗဇ္ဇာ. တတ္ထ တေ ယာဝဇီဝံ ဥဿာဟော ကရဏီယော. အတိရေကလာဘော— ခေါမံ, ကပ္ပါသိကံ, ကောသေယျံ, ကမ္ဗလံ, သာဏံ, ဘင်္ဂံ. (2)
536
ရုက္ခမူလသေနာသနံ နိဿာယ ပဗ္ဗဇ္ဇာ. တတ္ထ တေ ယာဝဇီဝံ ဥဿာဟော ကရဏီယော. အတိရေကလာဘော— ဝိဟာရော, အဍ္ဎယောဂေါ, ပါသာဒေါ, ဟမ္မိယံ, ဂုဟာ. (3)
537
ပူတိမုတ္တဘေသဇ္ဇံ နိဿာယ ပဗ္ဗဇ္ဇာ. တတ္ထ တေ ယာဝဇီဝံ ဥဿာဟော ကရဏီယော. အတိရေကလာဘော— သပ္ပိ, နဝနီတံ, တေလံ, မဓု, ဖာဏိတန်”တိ. (4)
538
စတ္တာရော နိဿယာ နိဋ္ဌိတာ.