1.9 ပဗ္ဗဇ္ဇူပသမ္ပဒါကထာ
တေန ခေါ ပန သမယေန ဘိက္ခူ နာနာဒိသာ နာနာဇနပဒါ ပဗ္ဗဇ္ဇာပေက္ခေ စ ဥပသမ္ပဒါပေက္ခေ စ အာနေန္တိ— “ဘဂဝါ နေ ပဗ္ဗာဇေဿတိ ဥပသမ္ပာဒေဿတီ”တိ. တတ္ထ ဘိက္ခူ စေဝ ကိလမန္တိ ပဗ္ဗဇ္ဇာပေက္ခာ စ ဥပသမ္ပဒါပေက္ခာ စ. အထ ခေါ ဘဂဝတော ရဟောဂတဿ ပဋိသလ္လီနဿ ဧဝံ စေတသော ပရိဝိတက္ကော ဥဒပါဒိ— “ဧတရဟိ ခေါ ဘိက္ခူ နာနာဒိသာ နာနာဇနပဒါ ပဗ္ဗဇ္ဇာပေက္ခေ စ ဥပသမ္ပဒါပေက္ခေ စ အာနေန္တိ— ‘ဘဂဝါ နေ ပဗ္ဗာဇေဿတိ ဥပသမ္ပာဒေဿတီ’တိ. တတ္ထ ဘိက္ခူ စေဝ ကိလမန္တိ ပဗ္ဗဇ္ဇာပေက္ခာ စ ဥပသမ္ပဒါပေက္ခာ စ. ယန္နူနာဟံ ဘိက္ခူနံ အနုဇာနေယျံ— တုမှေဝ ဒါနိ, ဘိက္ခဝေ, တာသု တာသု ဒိသာသု တေသု တေသု ဇနပဒေသု ပဗ္ဗာဇေထ ဥပသမ္ပာဒေထာ”တိ.
အထ ခေါ ဘဂဝါ သာယနှသမယံ ပဋိသလ္လာနာ ဝုဋ္ဌိတော ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ— “ဣဓ မယှံ, ဘိက္ခဝေ, ရဟောဂတဿ ပဋိသလ္လီနဿ ဧဝံ စေတသော ပရိဝိတက္ကော ဥဒပါဒိ— ဧတရဟိ ခေါ ဘိက္ခူ နာနာဒိသာ နာနာဇနပဒါ ပဗ္ဗဇ္ဇာပေက္ခေ စ ဥပသမ္ပဒါပေက္ခေ စ အာနေန္တိ— ‘ဘဂဝါ နေ ပဗ္ဗာဇေဿတိ ဥပသမ္ပာဒေဿတီ’တိ, တတ္ထ ဘိက္ခူ စေဝ ကိလမန္တိ ပဗ္ဗဇ္ဇာပေက္ခာ စ ဥပသမ္ပဒါပေက္ခာ စ. ယန္နူနာဟံ ဘိက္ခူနံ အနုဇာနေယျံ တုမှေဝ ဒါနိ, ဘိက္ခဝေ, တာသု တာသု ဒိသာသု တေသု တေသု ဇနပဒေသု ပဗ္ဗာဇေထ ဥပသမ္ပာဒေထာတိ, အနုဇာနာမိ, ဘိက္ခဝေ, တုမှေဝ ဒါနိ တာသု တာသု ဒိသာသု တေသု တေသု ဇနပဒေသု ပဗ္ဗာဇေထ ဥပသမ္ပာဒေထ. ဧဝဉ္စ ပန, ဘိက္ခဝေ, ပဗ္ဗာဇေတဗ္ဗော ဥပသမ္ပာဒေတဗ္ဗော—
ပဌမံ ကေသမဿုံ ဩဟာရာပေတွာ, ကာသာယာနိ ဝတ္ထာနိ အစ္ဆာဒါပေတွာ, ဧကံသံ ဥတ္တရာသင်္ဂံ ကာရာပေတွာ, ဘိက္ခူနံ ပါဒေ ဝန္ဒာပေတွာ, ဥက္ကုဋိကံ နိသီဒါပေတွာ, အဉ္ဇလိံ ပဂ္ဂဏှာပေတွာ ‘ဧဝံ ဝဒေဟီ’တိ ဝတ္တဗ္ဗော—
‘ဗုဒ္ဓံ သရဏံ ဂစ္ဆာမိ,
ဓမ္မံ သရဏံ ဂစ္ဆာမိ,
သံဃံ သရဏံ ဂစ္ဆာမိ.
ဒုတိယမ္ပိ ဗုဒ္ဓံ သရဏံ ဂစ္ဆာမိ,
ဒုတိယမ္ပိ ဓမ္မံ သရဏံ ဂစ္ဆာမိ,
ဒုတိယမ္ပိ သံဃံ သရဏံ ဂစ္ဆာမိ.
တတိယမ္ပိ ဗုဒ္ဓံ သရဏံ ဂစ္ဆာမိ,
တတိယမ္ပိ ဓမ္မံ သရဏံ ဂစ္ဆာမိ,
တတိယမ္ပိ သံဃံ သရဏံ ဂစ္ဆာမီ’တိ.
အနုဇာနာမိ, ဘိက္ခဝေ, ဣမေဟိ တီဟိ သရဏဂမနေဟိ ပဗ္ဗဇ္ဇံ ဥပသမ္ပဒန်”တိ.
တီဟိ သရဏဂမနေဟိ ဥပသမ္ပဒါကထာ နိဋ္ဌိတာ.