10.9 ဥပါလိသံဃသာမဂ္ဂီပုစ္ဆာ
အထ ခေါ အာယသ္မာ ဥပါလိ ယေန ဘဂဝါ တေနုပသင်္ကမိ, ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ အာယသ္မာ ဥပါလိ ဘဂဝန္တံ ဧတဒဝေါစ— “ယသ္မိံ, ဘန္တေ, ဝတ္ထုသ္မိံ ဟောတိ သံဃဿ ဘဏ္ဍနံ ကလဟော ဝိဂ္ဂဟော ဝိဝါဒေါ သံဃဘေဒေါ သံဃရာဇိ သံဃဝဝတ္ထာနံ သံဃနာနာကရဏံ, သံဃော တံ ဝတ္ထုံ အဝိနိစ္ဆိနိတွာ အမူလာ မူလံ ဂန္တွာ သံဃသာမဂ္ဂိံ ကရောတိ, ဓမ္မိကာ နု ခေါ သာ, ဘန္တေ, သံဃသာမဂ္ဂီ”တိ? “ယသ္မိံ, ဥပါလိ, ဝတ္ထုသ္မိံ ဟောတိ သံဃဿ ဘဏ္ဍနံ ကလဟော ဝိဂ္ဂဟော ဝိဝါဒေါ သံဃဘေဒေါ သံဃရာဇိ သံဃဝဝတ္ထာနံ သံဃနာနာကရဏံ, သံဃော တံ ဝတ္ထုံ အဝိနိစ္ဆိနိတွာ အမူလာ မူလံ ဂန္တွာ သံဃသာမဂ္ဂိံ ကရောတိ, အဓမ္မိကာ သာ, ဥပါလိ, သံဃသာမဂ္ဂီ”တိ.
“ယသ္မိံ ပန, ဘန္တေ, ဝတ္ထုသ္မိံ ဟောတိ သံဃဿ ဘဏ္ဍနံ ကလဟော ဝိဂ္ဂဟော ဝိဝါဒေါ သံဃဘေဒေါ သံဃရာဇိ သံဃဝဝတ္ထာနံ သံဃနာနာကရဏံ, သံဃော တံ ဝတ္ထုံ ဝိနိစ္ဆိနိတွာ မူလာ မူလံ ဂန္တွာ သံဃသာမဂ္ဂိံ ကရောတိ, ဓမ္မိကာ နု ခေါ သာ, ဘန္တေ, သံဃသာမဂ္ဂီ”တိ? “ယသ္မိံ, ဥပါလိ, ဝတ္ထုသ္မိံ ဟောတိ သံဃဿ ဘဏ္ဍနံ ကလဟော ဝိဂ္ဂဟော ဝိဝါဒေါ သံဃဘေဒေါ သံဃရာဇိ သံဃဝဝတ္ထာနံ သံဃနာနာကရဏံ, သံဃော တံ ဝတ္ထုံ ဝိနိစ္ဆိနိတွာ မူလာ မူလံ ဂန္တွာ သံဃသာမဂ္ဂိံ ကရောတိ, ဓမ္မိကာ သာ, ဥပါလိ, သံဃသာမဂ္ဂီ”တိ.
“ကတိ နု ခေါ, ဘန္တေ, သံဃသာမဂ္ဂိယော”တိ? “ဒွေမာ, ဥပါလိ, သံဃသာမဂ္ဂိယော— အတ္ထုပါလိ, သံဃသာမဂ္ဂီ အတ္ထာပေတာ ဗျဉ္ဇနုပေတာ; အတ္ထုပါလိ, သံဃသာမဂ္ဂီ အတ္ထုပေတာ စ ဗျဉ္ဇနုပေတာ စ. ကတမာ စ, ဥပါလိ, သံဃသာမဂ္ဂီ အတ္ထာပေတာ ဗျဉ္ဇနုပေတာ? ယသ္မိံ, ဥပါလိ, ဝတ္ထုသ္မိံ ဟောတိ သံဃဿ ဘဏ္ဍနံ ကလဟော ဝိဂ္ဂဟော ဝိဝါဒေါ သံဃဘေဒေါ သံဃရာဇိ သံဃဝဝတ္ထာနံ သံဃနာနာကရဏံ, သံဃော တံ ဝတ္ထုံ အဝိနိစ္ဆိနိတွာ အမူလာ မူလံ ဂန္တွာ သံဃသာမဂ္ဂိံ ကရောတိ, အယံ ဝုစ္စတိ, ဥပါလိ, သံဃသာမဂ္ဂီ အတ္ထာပေတာ ဗျဉ္ဇနုပေတာ. ကတမာ စ, ဥပါလိ, သံဃသာမဂ္ဂီ အတ္ထုပေတာ စ ဗျဉ္ဇနုပေတာ စ? ယသ္မိံ, ဥပါလိ, ဝတ္ထုသ္မိံ ဟောတိ သံဃဿ ဘဏ္ဍနံ ကလဟော ဝိဂ္ဂဟော ဝိဝါဒေါ သံဃဘေဒေါ သံဃရာဇိ သံဃဝဝတ္ထာနံ သံဃနာနာကရဏံ, သံဃော တံ ဝတ္ထုံ ဝိနိစ္ဆိနိတွာ မူလာ မူလံ ဂန္တွာ သံဃသာမဂ္ဂိံ ကရောတိ, အယံ ဝုစ္စတိ, ဥပါလိ, သံဃသာမဂ္ဂီ အတ္ထုပေတာ စ ဗျဉ္ဇနုပေတာ စ. ဣမာ ခေါ, ဥပါလိ, ဒွေ သံဃသာမဂ္ဂိယော”တိ.
အထ ခေါ အာယသ္မာ ဥပါလိ ဥဋ္ဌာယာသနာ ဧကံသံ ဥတ္တရာသင်္ဂံ ကရိတွာ ယေန ဘဂဝါ တေနဉ္ဇလိံ ပဏာမေတွာ ဘဂဝန္တံ ဂါထာယ အဇ္ဈဘာသိ—
“သံဃဿ ကိစ္စေသု စ မန္တနာသု စ,
အတ္ထေသု ဇာတေသု ဝိနိစ္ဆယေသု စ;
ကထံပကာရောဓ နရော မဟတ္ထိကော,
ဘိက္ခု ကထံ ဟောတိဓ ပဂ္ဂဟာရဟော”တိ.
“အနာနုဝဇ္ဇော ပဌမေန သီလတော,
အဝေက္ခိတာစာရော သုသံဝုတိန္ဒြိယော;
ပစ္စတ္ထိကာ နူပဝဒန္တိ ဓမ္မတော,
န ဟိဿ တံ ဟောတိ ဝဒေယျု ယေန နံ.
သော တာဒိသော သီလဝိသုဒ္ဓိယာ ဌိတော,
ဝိသာရဒေါ ဟောတိ ဝိသယှ ဘာသတိ;
နစ္ဆမ္ဘတိ ပရိသဂတော န ဝေဓတိ,
အတ္ထံ န ဟာပေတိ အနုယျုတံ ဘဏံ.
တထေဝ ပဉှံ ပရိသာသု ပုစ္ဆိတော,
န စေဝ ပဇ္ဈာယတိ န မင်္ကု ဟောတိ;
သော ကာလာဂတံ ဗျာကရဏာရဟံ ဝစော,
ရဉ္ဇေတိ ဝိညူပရိသံ ဝိစက္ခဏော.
သဂါရဝေါ ဝုဍ္ဎတရေသု ဘိက္ခုသု,
အာစေရကမှိ စ သကေ ဝိသာရဒေါ;
အလံ ပမေတုံ ပဂုဏော ကထေတဝေ,
ပစ္စတ္ထိကာနဉ္စ ဝိရဒ္ဓိကောဝိဒေါ.
ပစ္စတ္ထိကာ ယေန ဝဇန္တိ နိဂ္ဂဟံ,
မဟာဇနော သညပနဉ္စ ဂစ္ဆတိ;
သကဉ္စ အာဒါယမယံ န ရိဉ္စတိ,
ဝိယာကရံ ပဉှမနူပဃာတိကံ.
ဒူတေယျကမ္မေသု အလံ သမုဂ္ဂဟော,
သံဃဿ ကိစ္စေသု စ အာဟု နံ ယထာ;
ကရံ ဝစော ဘိက္ခုဂဏေန ပေသိတော,
အဟံ ကရောမီတိ န တေန မညတိ.
အာပဇ္ဇတိ ယာဝတကေသု ဝတ္ထုသု,
အာပတ္တိယာ ဟောတိ ယထာ စ ဝုဋ္ဌိတိ;
ဧတေ ဝိဘင်္ဂါ ဥဘယဿ သွာဂတာ,
အာပတ္တိ ဝုဋ္ဌာနပဒဿ ကောဝိဒေါ.
နိဿာရဏံ ဂစ္ဆတိ ယာနိ စာစရံ,
နိဿာရိတော ဟောတိ ယထာ စ ဝတ္တနာ;
ဩသာရဏံ တံဝုသိတဿ ဇန္တုနော,
ဧတမ္ပိ ဇာနာတိ ဝိဘင်္ဂကောဝိဒေါ.
သဂါရဝေါ ဝုဍ္ဎတရေသု ဘိက္ခုသု,
နဝေသု ထေရေသု စ မဇ္ဈိမေသု စ;
မဟာဇနဿတ္ထစရောဓ ပဏ္ဍိတော,
သော တာဒိသော ဘိက္ခု ဣဓ ပဂ္ဂဟာရဟော”တိ.
ကောသမ္ဗကက္ခန္ဓကော ဒသမော.
တဿုဒ္ဒါနံ
ကောသမ္ဗိယံ ဇိနဝရော,
ဝိဝါဒါပတ္တိဒဿနေ;
နုက္ခိပေယျ ယသ္မိံ တသ္မိံ,
သဒ္ဓါယာပတ္တိ ဒေသယေ.
အန္တောသီမာယံ တတ္ထေဝ,
ဗာလကဉ္စေဝ ဝံသဒါ;
ပါလိလေယျာ စ သာဝတ္ထိ,
သာရိပုတ္တော စ ကောလိတော.
မဟာကဿပကစ္စာနာ,
ကောဋ္ဌိကော ကပ္ပိနေန စ;
မဟာစုန္ဒော အနုရုဒ္ဓေါ,
ရေဝတော ဥပါလိ စုဘော.
အာနန္ဒော ရာဟုလော စေဝ,
ဂေါတမီနာထပိဏ္ဍိကော;
သေနာသနံ ဝိဝိတ္တဉ္စ,
အာမိသံ သမကမ္ပိ စ.
န ကေဟိ ဆန္ဒော ဒါတဗ္ဗော,
ဥပါလိပရိပုစ္ဆိတော;_
အနာနုဝဇ္ဇော သီလေန,
သာမဂ္ဂီ ဇိနသာသနေတိ.
ကောသမ္ဗကက္ခန္ဓကော နိဋ္ဌိတော.
မဟာဝဂ္ဂေါ နိဋ္ဌိတော.
မဟာဝဂ္ဂပါဠိ နိဋ္ဌိတာ.