2.15 အဓမ္မကမ္မပဋိက္ကောသနာဒိ
တေန ခေါ ပန သမယေန ဆဗ္ဗဂ္ဂိယာ ဘိက္ခူ သံဃမဇ္ဈေ အဓမ္မကမ္မံ ကရောန္တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, အဓမ္မကမ္မံ ကာတဗ္ဗံ. ယော ကရေယျ, အာပတ္တိ ဒုက္ကဋဿာတိ. ကရောန္တိယေဝ အဓမ္မကမ္မံ. ဘဂဝတော ဧတမတ္ထံ အာရောစေသုံ. အနုဇာနာမိ, ဘိက္ခဝေ, အဓမ္မကမ္မေ ကယိရမာနေ ပဋိက္ကောသိတုန်”တိ.
တေန ခေါ ပန သမယေန ပေသလာ ဘိက္ခူ ဆဗ္ဗဂ္ဂိယေဟိ ဘိက္ခူဟိ အဓမ္မကမ္မေ ကယိရမာနေ ပဋိက္ကောသန္တိ. ဆဗ္ဗဂ္ဂိယာ ဘိက္ခူ လဘန္တိ အာဃာတံ, လဘန္တိ အပ္ပစ္စယံ, ဝဓေန တဇ္ဇေန္တိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ဒိဋ္ဌိမ္ပိ အာဝိကာတုန္တိ. တေသံယေဝ သန္တိကေ ဒိဋ္ဌိံ အာဝိကရောန္တိ. ဆဗ္ဗဂ္ဂိယာ ဘိက္ခူ လဘန္တိ အာဃာတံ, လဘန္တိ အပ္ပစ္စယံ, ဝဓေန တဇ္ဇေန္တိ. ဘဂဝတော ဧတမတ္ထံ အာရောစေသုံ. အနုဇာနာမိ, ဘိက္ခဝေ, စတူဟိ ပဉ္စဟိ ပဋိက္ကောသိတုံ, ဒွီဟိ တီဟိ ဒိဋ္ဌိံ အာဝိကာတုံ, ဧကေန အဓိဋ္ဌာတုံ— ‘န မေတံ ခမတီ’”တိ.
တေန ခေါ ပန သမယေန ဆဗ္ဗဂ္ဂိယာ ဘိက္ခူ သံဃမဇ္ဈေ ပါတိမောက္ခံ ဥဒ္ဒိသမာနာ သဉ္စိစ္စ န သာဝေန္တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ပါတိမောက္ခုဒ္ဒေသကေန သဉ္စိစ္စ န သာဝေတဗ္ဗံ. ယော န သာဝေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန အာယသ္မာ ဥဒါယီ သံဃဿ ပါတိမောက္ခုဒ္ဒေသကော ဟောတိ ကာကဿရကော. အထ ခေါ အာယသ္မတော ဥဒါယိဿ ဧတဒဟောသိ— “ဘဂဝတာ ပညတ္တံ— ‘ပါတိမောက္ခုဒ္ဒေသကေန သာဝေတဗ္ဗန်’တိ, အဟဉ္စမှိ ကာကဿရကော, ကထံ နု ခေါ မယာ ပဋိပဇ္ဇိတဗ္ဗန်”တိ? ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ပါတိမောက္ခုဒ္ဒေသကေန ဝါယမိတုံ— ‘ကထံ သာဝေယျန်’တိ. ဝါယမန္တဿ အနာပတ္တီ”တိ.
တေန ခေါ ပန သမယေန ဒေဝဒတ္တော သဂဟဋ္ဌာယ ပရိသာယ ပါတိမောက္ခံ ဥဒ္ဒိသတိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, သဂဟဋ္ဌာယ ပရိသာယ ပါတိမောက္ခံ ဥဒ္ဒိသိတဗ္ဗံ. ယော ဥဒ္ဒိသေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန ဆဗ္ဗဂ္ဂိယာ ဘိက္ခူ သံဃမဇ္ဈေ အနဇ္ဈိဋ္ဌာ ပါတိမောက္ခံ ဥဒ္ဒိသန္တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, သံဃမဇ္ဈေ အနဇ္ဈိဋ္ဌေန ပါတိမောက္ခံ ဥဒ္ဒိသိတဗ္ဗံ. ယော ဥဒ္ဒိသေယျ, အာပတ္တိ ဒုက္ကဋဿ. အနုဇာနာမိ, ဘိက္ခဝေ, ထေရာဓိကံ ပါတိမောက္ခန်”တိ.
အညတိတ္ထိယဘာဏဝါရော နိဋ္ဌိတော ပဌမော.