2.2 ပါတိမောက္ခုဒ္ဒေသာနုဇာနန
အထ ခေါ ဘဂဝတော ရဟောဂတဿ ပဋိသလ္လီနဿ ဧဝံ စေတသော ပရိဝိတက္ကော ဥဒပါဒိ— “ယန္နူနာဟံ ယာနိ မယာ ဘိက္ခူနံ ပညတ္တာနိ သိက္ခာပဒါနိ, တာနိ နေသံ ပါတိမောက္ခုဒ္ဒေသံ အနုဇာနေယျံ. သော နေသံ ဘဝိဿတိ ဥပေါသထကမ္မန်”တိ. အထ ခေါ ဘဂဝါ သာယနှသမယံ ပဋိသလ္လာနာ ဝုဋ္ဌိတော ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ— “ဣဓ မယှံ, ဘိက္ခဝေ, ရဟောဂတဿ ပဋိသလ္လီနဿ ဧဝံ စေတသော ပရိဝိတက္ကော ဥဒပါဒိ ‘ယန္နူနာဟံ ယာနိ မယာ ဘိက္ခူနံ ပညတ္တာနိ သိက္ခာပဒါနိ, တာနိ နေသံ ပါတိမောက္ခုဒ္ဒေသံ အနုဇာနေယျံ. သော နေသံ ဘဝိဿတိ ဥပေါသထကမ္မန်’တိ. အနုဇာနာမိ, ဘိက္ခဝေ, ပါတိမောက္ခံ ဥဒ္ဒိသိတုံ. ဧဝဉ္စ ပန, ဘိက္ခဝေ, ဥဒ္ဒိသိတဗ္ဗံ. ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော—
‘သုဏာတု မေ, ဘန္တေ, သံဃော. ယဒိ သံဃဿ ပတ္တကလ္လံ, သံဃော ဥပေါသထံ ကရေယျ, ပါတိမောက္ခံ ဥဒ္ဒိသေယျ. ကိံ သံဃဿ ပုဗ္ဗကိစ္စံ? ပါရိသုဒ္ဓိံ အာယသ္မန္တော အာရောစေထ. ပါတိမောက္ခံ ဥဒ္ဒိသိဿာမိ. တံ သဗ္ဗေဝ သန္တာ သာဓုကံ သုဏောမ မနသိ ကရောမ. ယဿ သိယာ အာပတ္တိ, သော အာဝိကရေယျ. အသန္တိယာ အာပတ္တိယာ တုဏှီ ဘဝိတဗ္ဗံ. တုဏှီဘာဝေန ခေါ ပနာယသ္မန္တေ ပရိသုဒ္ဓါတိ ဝေဒိဿာမိ. ယထာ ခေါ ပန ပစ္စေကပုဋ္ဌဿ ဝေယျာကရဏံ ဟောတိ, ဧဝမေဝံ ဧဝရူပါယ ပရိသာယ ယာဝတတိယံ အနုဿာဝိတံ ဟောတိ. ယော ပန ဘိက္ခု ယာဝတတိယံ အနုဿာဝိယမာနေ သရမာနော သန္တိံ အာပတ္တိံ နာဝိကရေယျ, သမ္ပဇာနမုသာဝါဒဿ ဟောတိ. သမ္ပဇာနမုသာဝါဒေါ ခေါ ပနာယသ္မန္တော အန္တရာယိကော ဓမ္မော ဝုတ္တော ဘဂဝတာ. တသ္မာ, သရမာနေန ဘိက္ခုနာ အာပန္နေန ဝိသုဒ္ဓါပေက္ခေန သန္တီ အာပတ္တိ အာဝိကာတဗ္ဗာ; အာဝိကတာ ဟိဿ ဖာသု ဟောတီ’”တိ.
ပါတိမောက္ခန် တိ အာဒိမေတံ မုခမေတံ ပမုခမေတံ ကုသလာနံ ဓမ္မာနံ. တေန ဝုစ္စတိ ပါတိမောက္ခန္တိ. အာယသ္မန္တော တိ ပိယဝစနမေတံ ဂရုဝစနမေတံ သဂါရဝသပ္ပတိဿာဓိဝစနမေတံ အာယသ္မန္တောတိ. ဥဒ္ဒိသိဿာမီ တိ အာစိက္ခိဿာမိ ဒေသေဿာမိ ပညပေဿာမိ ပဋ္ဌပေဿာမိ ဝိဝရိဿာမိ ဝိဘဇိဿာမိ ဥတ္တာနိံ ကရိဿာမိ ပကာသေဿာမိ. တန် တိ ပါတိမောက္ခံ ဝုစ္စတိ. သဗ္ဗေဝ သန္တာ တိ ယာဝတိကာ တဿာ ပရိသာယ ထေရာ စ နဝါ စ မဇ္ဈိမာ စ, ဧတေ ဝုစ္စန္တိ သဗ္ဗေဝ သန္တာတိ. သာဓုကံ သုဏောမာ တိ အဋ္ဌိံ ကတွာ မနသိ ကတွာ သဗ္ဗစေတသာ သမန္နာဟရာမ. မနသိ ကရောမာ တိ ဧကဂ္ဂစိတ္တာ အဝိက္ခိတ္တစိတ္တာ အဝိသာဟဋစိတ္တာ နိသာမေမ. ယဿ သိယာ အာပတ္တီ တိ ထေရဿ ဝါ နဝဿ ဝါ မဇ္ဈိမဿ ဝါ, ပဉ္စန္နံ ဝါ အာပတ္တိက္ခန္ဓာနံ အညတရာ အာပတ္တိ, သတ္တန္နံ ဝါ အာပတ္တိက္ခန္ဓာနံ အညတရာ အာပတ္တိ. သော အာဝိကရေယျာ တိ သော ဒေသေယျ, သော ဝိဝရေယျ, သော ဥတ္တာနိံ ကရေယျ, သော ပကာသေယျ သံဃမဇ္ဈေ ဝါ ဂဏမဇ္ဈေ ဝါ ဧကပုဂ္ဂလေ ဝါ. အသန္တီ နာမ အာပတ္တိ အနဇ္ဈာပန္နာ ဝါ ဟောတိ, အာပဇ္ဇိတွာ ဝါ ဝုဋ္ဌိတာ. တုဏှီ ဘဝိတဗ္ဗန် တိ အဓိဝါသေတဗ္ဗံ န ဗျာဟရိတဗ္ဗံ. ပရိသုဒ္ဓါတိ ဝေဒိဿာမီ တိ ဇာနိဿာမိ ဓာရေဿာမိ. ယထာ ခေါ ပန ပစ္စေကပုဋ္ဌဿ ဝေယျာကရဏံ ဟောတီ တိ ယထာ ဧကေန ဧကော ပုဋ္ဌော ဗျာကရေယျ, ဧဝမေဝ တဿာ ပရိသာယ ဇာနိတဗ္ဗံ မံ ပုစ္ဆတီတိ. ဧဝရူပါ နာမ ပရိသာ ဘိက္ခုပရိသာ ဝုစ္စတိ. ယာဝတတိယံ အနုဿာဝိတံ ဟောတီ တိ သကိမ္ပိ အနုဿာဝိတံ ဟောတိ, ဒုတိယမ္ပိ အနုဿာဝိတံ ဟောတိ, တတိယမ္ပိ အနုဿာဝိတံ ဟောတိ. သရမာနော တိ ဇာနမာနော သဉ္ဇာနမာနော. သန္တီ နာမ အာပတ္တိ အဇ္ဈာပန္နာ ဝါ ဟောတိ, အာပဇ္ဇိတွာ ဝါ အဝုဋ္ဌိတာ. နာဝိကရေယျာ တိ န ဒေသေယျ, န ဝိဝရေယျ, န ဥတ္တာနိံ ကရေယျ, န ပကာသေယျ သံဃမဇ္ဈေ ဝါ ဂဏမဇ္ဈေ ဝါ ဧကပုဂ္ဂလေ ဝါ. သမ္ပဇာနမုသာဝါဒဿ ဟောတီ တိ သမ္ပဇာနမုသာဝါဒေ ကိံ ဟောတိ? ဒုက္ကဋံ ဟောတိ. အန္တရာယိကော ဓမ္မော ဝုတ္တော ဘဂဝတာ တိ. ကိဿ အန္တရာယိကော? ပဌမဿ ဈာနဿ အဓိဂမာယ အန္တရာယိကော, ဒုတိယဿ ဈာနဿ အဓိဂမာယ အန္တရာယိကော, တတိယဿ ဈာနဿ အဓိဂမာယ အန္တရာယိကော, စတုတ္ထဿ ဈာနဿ အဓိဂမာယ အန္တရာယိကော, ဈာနာနံ ဝိမောက္ခာနံ သမာဓီနံ သမာပတ္တီနံ နေက္ခမ္မာနံ နိဿရဏာနံ ပဝိဝေကာနံ ကုသလာနံ ဓမ္မာနံ အဓိဂမာယ အန္တရာယိကော. တသ္မာ တိ တံကာရဏာ. သရမာနေနာ တိ ဇာနမာနေန သဉ္ဇာနမာနေန. ဝိသုဒ္ဓါပေက္ခေနာ တိ ဝုဋ္ဌာတုကာမေန ဝိသုဇ္ဈိတုကာမေန. သန္တီ နာမ အာပတ္တိ အဇ္ဈာပန္နာ ဝါ ဟောတိ, အာပဇ္ဇိတွာ ဝါ အဝုဋ္ဌိတာ. အာဝိကာတဗ္ဗာ တိ အာဝိကာတဗ္ဗာ သံဃမဇ္ဈေ ဝါ ဂဏမဇ္ဈေ ဝါ ဧကပုဂ္ဂလေ ဝါ. အာဝိကတာ ဟိဿ ဖာသု ဟောတီ တိ ကိဿ ဖာသု ဟောတိ? ပဌမဿ ဈာနဿ အဓိဂမာယ ဖာသု ဟောတိ, ဒုတိယဿ ဈာနဿ အဓိဂမာယ ဖာသု ဟောတိ, တတိယဿ ဈာနဿ အဓိဂမာယ ဖာသု ဟောတိ, စတုတ္ထဿ ဈာနဿ အဓိဂမာယ ဖာသု ဟောတိ, ဈာနာနံ ဝိမောက္ခာနံ သမာဓီနံ သမာပတ္တီနံ နေက္ခမ္မာနံ နိဿရဏာနံ ပဝိဝေကာနံ ကုသလာနံ ဓမ္မာနံ အဓိဂမာယ ဖာသု ဟောတီတိ.
တေန ခေါ ပန သမယေန ဘိက္ခူ— “ဘဂဝတာ ပါတိမောက္ခုဒ္ဒေသော အနုညာတော”တိ— ဒေဝသိကံ ပါတိမောက္ခံ ဥဒ္ဒိသန္တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဒေဝသိကံ ပါတိမောက္ခံ ဥဒ္ဒိသိတဗ္ဗံ. ယော ဥဒ္ဒိသေယျ, အာပတ္တိ ဒုက္ကဋဿ. အနုဇာနာမိ, ဘိက္ခဝေ, ဥပေါသထေ ပါတိမောက္ခံ ဥဒ္ဒိသိတုန်”တိ.
တေန ခေါ ပန သမယေန ဘိက္ခူ— “ဘဂဝတာ ဥပေါသထေ ပါတိမောက္ခုဒ္ဒေသော အနုညာတော”တိ— ပက္ခဿ တိက္ခတ္တုံ ပါတိမောက္ခံ ဥဒ္ဒိသန္တိ, စာတုဒ္ဒသေ ပန္နရသေ အဋ္ဌမိယာ စ ပက္ခဿ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ပက္ခဿ တိက္ခတ္တုံ ပါတိမောက္ခံ ဥဒ္ဒိသိတဗ္ဗံ. ယော ဥဒ္ဒိသေယျ, အာပတ္တိ ဒုက္ကဋဿ. အနုဇာနာမိ, ဘိက္ခဝေ, သကိံ ပက္ခဿ စာတုဒ္ဒသေ ဝါ ပန္နရသေ ဝါ ပါတိမောက္ခံ ဥဒ္ဒိသိတုန်”တိ.
တေန ခေါ ပန သမယေန ဆဗ္ဗဂ္ဂိယာ ဘိက္ခူ ယထာပရိသာယ ပါတိမောက္ခံ ဥဒ္ဒိသန္တိ သကာယ သကာယ ပရိသာယ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, ယထာပရိသာယ ပါတိမောက္ခံ ဥဒ္ဒိသိတဗ္ဗံ သကာယ သကာယ ပရိသာယ. ယော ဥဒ္ဒိသေယျ, အာပတ္တိ ဒုက္ကဋဿ. အနုဇာနာမိ, ဘိက္ခဝေ, သမဂ္ဂါနံ ဥပေါသထကမ္မန်”တိ.
အထ ခေါ ဘိက္ခူနံ ဧတဒဟောသိ— “ဘဂဝတာ ပညတ္တံ— ‘သမဂ္ဂါနံ ဥပေါသထကမ္မန်’တိ. ကိတ္တာဝတာ နု ခေါ သာမဂ္ဂီ ဟောတိ, ယာဝတာ ဧကာဝါသော, ဥဒါဟု သဗ္ဗာ ပထဝီ”တိ? ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ဧတ္တာဝတာ သာမဂ္ဂီ ယာဝတာ ဧကာဝါသော”တိ.