2.27 သဘာဂါပတ္တိပဋိကမ္မဝိဓိ
တေန ခေါ ပန သမယေန အညတရသ္မိံ အာဝါသေ တဒဟုပေါသထေ သဗ္ဗော သံဃော သဘာဂံ အာပတ္တိံ အာပန္နော ဟောတိ. အထ ခေါ တေသံ ဘိက္ခူနံ ဧတဒဟောသိ— “ဘဂဝတာ ပညတ္တံ— ‘န သဘာဂါ အာပတ္တိ ဒေသေတဗ္ဗာ, န သဘာဂါ အာပတ္တိ ပဋိဂ္ဂဟေတဗ္ဗာ’တိ. အယဉ္စ သဗ္ဗော သံဃော သဘာဂံ အာပတ္တိံ အာပန္နော. ကထံ နု ခေါ အမှေဟိ ပဋိပဇ္ဇိတဗ္ဗန်”တိ? ဘဂဝတော ဧတမတ္ထံ အာရောစေသုံ.
“ဣဓ ပန, ဘိက္ခဝေ, အညတရသ္မိံ အာဝါသေ တဒဟုပေါသထေ သဗ္ဗော သံဃော သဘာဂံ အာပတ္တိံ အာပန္နော ဟောတိ. တေဟိ, ဘိက္ခဝေ, ဘိက္ခူဟိ ဧကော ဘိက္ခု သာမန္တာ အာဝါသာ သဇ္ဇုကံ ပါဟေတဗ္ဗော— ဂစ္ဆာဝုသော, တံ အာပတ္တိံ ပဋိကရိတွာ အာဂစ္ဆ; မယံ တေ သန္တိကေ အာပတ္တိံ ပဋိကရိဿာမာတိ. ဧဝဉ္စေတံ လဘေထ, ဣစ္စေတံ ကုသလံ. နော စေ လဘေထ, ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော—
‘သုဏာတု မေ, ဘန္တေ, သံဃော. အယံ သဗ္ဗော သံဃော သဘာဂံ အာပတ္တိံ အာပန္နော. ယဒါ အညံ ဘိက္ခုံ သုဒ္ဓံ အနာပတ္တိကံ ပဿိဿတိ, တဒါ တဿ သန္တိကေ တံ အာပတ္တိံ ပဋိကရိဿတီ’တိ ဝတွာ ဥပေါသထော ကာတဗ္ဗော, ပါတိမောက္ခံ ဥဒ္ဒိသိတဗ္ဗံ, န တွေဝ တပ္ပစ္စယာ ဥပေါသထဿ အန္တရာယော ကာတဗ္ဗော.
ဣဓ ပန, ဘိက္ခဝေ, အညတရသ္မိံ အာဝါသေ တဒဟုပေါသထေ သဗ္ဗော သံဃော သဘာဂါယ အာပတ္တိယာ ဝေမတိကော ဟောတိ. ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော—
‘သုဏာတု မေ, ဘန္တေ, သံဃော. အယံ သဗ္ဗော သံဃော သဘာဂါယ အာပတ္တိယာ ဝေမတိကော. ယဒါ နိဗ္ဗေမတိကော ဘဝိဿတိ, တဒါ တံ အာပတ္တိံ ပဋိကရိဿတီ’တိ ဝတွာ ဥပေါသထော ကာတဗ္ဗော, ပါတိမောက္ခံ ဥဒ္ဒိသိတဗ္ဗံ; န တွေဝ တပ္ပစ္စယာ ဥပေါသထဿ အန္တရာယော ကာတဗ္ဗော.
ဣဓ ပန, ဘိက္ခဝေ, အညတရသ္မိံ အာဝါသေ ဝဿူပဂတော သံဃော သဘာဂံ အာပတ္တိံ အာပန္နော ဟောတိ. တေဟိ, ဘိက္ခဝေ, ဘိက္ခူဟိ ဧကော ဘိက္ခု သာမန္တာ အာဝါသာ သဇ္ဇုကံ ပါဟေတဗ္ဗော— ဂစ္ဆာဝုသော, တံ အာပတ္တိံ ပဋိကရိတွာ အာဂစ္ဆ; မယံ တေ သန္တိကေ တံ အာပတ္တိံ ပဋိကရိဿာမာတိ. ဧဝဉ္စေတံ လဘေထ, ဣစ္စေတံ ကုသလံ. နော စေ လဘေထ, ဧကော ဘိက္ခု သတ္တာဟကာလိကံ ပါဟေတဗ္ဗော— ဂစ္ဆာဝုသော, တံ အာပတ္တိံ ပဋိကရိတွာ အာဂစ္ဆ; မယံ တေ သန္တိကေ တံ အာပတ္တိံ ပဋိကရိဿာမာ”တိ.
တေန ခေါ ပန သမယေန အညတရသ္မိံ အာဝါသေ သဗ္ဗော သံဃော သဘာဂံ အာပတ္တိံ အာပန္နော ဟောတိ. သော န ဇာနာတိ တဿာ အာပတ္တိယာ နာမဂေါတ္တံ. တတ္ထ အညော ဘိက္ခု အာဂစ္ဆတိ ဗဟုဿုတော အာဂတာဂမော ဓမ္မဓရော ဝိနယဓရော မာတိကာဓရော ပဏ္ဍိတော ဗျတ္တော မေဓာဝီ လဇ္ဇီ ကုက္ကုစ္စကော သိက္ခာကာမော. တမေနံ အညတရော ဘိက္ခု ယေန သော ဘိက္ခု တေနုပသင်္ကမိ, ဥပသင်္ကမိတွာ တံ ဘိက္ခုံ ဧတဒဝေါစ— “ယော နု ခေါ, အာဝုသော, ဧဝဉ္စေဝဉ္စ ကရောတိ, ကိံ နာမ သော အာပတ္တိံ အာပဇ္ဇတီ”တိ? သော ဧဝမာဟ— “ယော ခေါ, အာဝုသော, ဧဝဉ္စေဝဉ္စ ကရောတိ, ဣမံ နာမ သော အာပတ္တိံ အာပဇ္ဇတိ. ဣမံ နာမ တွံ, အာဝုသော, အာပတ္တိံ အာပန္နော; ပဋိကရောဟိ တံ အာပတ္တိန်”တိ. သော ဧဝမာဟ— “န ခေါ အဟံ, အာဝုသော, ဧကောဝ ဣမံ အာပတ္တိံ အာပန္နော; အယံ သဗ္ဗော သံဃော ဣမံ အာပတ္တိံ အာပန္နော”တိ. သော ဧဝမာဟ— “ကိံ တေ, အာဝုသော, ကရိဿတိ ပရော အာပန္နော ဝါ အနာပန္နော ဝါ. ဣင်္ဃ တွံ, အာဝုသော, သကာယ အာပတ္တိယာ ဝုဋ္ဌာဟီ”တိ. အထ ခေါ သော ဘိက္ခု တဿ ဘိက္ခုနော ဝစနေန တံ အာပတ္တိံ ပဋိကရိတွာ ယေန တေ ဘိက္ခူ တေနုပသင်္ကမိ, ဥပသင်္ကမိတွာ တေ ဘိက္ခူ ဧတဒဝေါစ— “ယော ကိရ, အာဝုသော, ဧဝဉ္စေဝဉ္စ ကရောတိ, ဣမံ နာမ သော အာပတ္တိံ အာပဇ္ဇတိ. ဣမံ နာမ တုမှေ, အာဝုသော, အာပတ္တိံ အာပန္နာ; ပဋိကရောထ တံ အာပတ္တိန်”တိ. အထ ခေါ တေ ဘိက္ခူ န ဣစ္ဆိံသု တဿ ဘိက္ခုနော ဝစနေန တံ အာပတ္တိံ ပဋိကာတုံ. ဘဂဝတော ဧတမတ္ထံ အာရောစေသုံ.
“ဣဓ ပန, ဘိက္ခဝေ, အညတရသ္မိံ အာဝါသေ သဗ္ဗော သံဃော သဘာဂံ အာပတ္တိံ အာပန္နော ဟောတိ. သော န ဇာနာတိ တဿာ အာပတ္တိယာ နာမဂေါတ္တံ. တတ္ထ အညော ဘိက္ခု အာဂစ္ဆတိ ဗဟုဿုတော အာဂတာဂမော ဓမ္မဓရော ဝိနယဓရော မာတိကာဓရော ပဏ္ဍိတော ဗျတ္တော မေဓာဝီ လဇ္ဇီ ကုက္ကုစ္စကော သိက္ခာကာမော. တမေနံ အညတရော ဘိက္ခု ယေန သော ဘိက္ခု တေနုပသင်္ကမိ, ဥပသင်္ကမိတွာ တံ ဘိက္ခုံ ဧဝံ ဝဒေတိ— ‘ယော နု ခေါ, အာဝုသော, ဧဝဉ္စေဝဉ္စ ကရောတိ, ကိံ နာမ သော အာပတ္တိံ အာပဇ္ဇတီ’တိ? သော ဧဝံ ဝဒေတိ— ‘ယော ခေါ, အာဝုသော, ဧဝဉ္စေဝဉ္စ ကရောတိ, ဣမံ နာမ သော အာပတ္တိံ အာပဇ္ဇတိ. ဣမံ နာမ တွံ, အာဝုသော, အာပတ္တိံ အာပန္နော; ပဋိကရောဟိ တံ အာပတ္တိန်’တိ. သော ဧဝံ ဝဒေတိ— ‘န ခေါ အဟံ, အာဝုသော, ဧကောဝ ဣမံ အာပတ္တိံ အာပန္နော. အယံ သဗ္ဗော သံဃော ဣမံ အာပတ္တိံ အာပန္နော’တိ. သော ဧဝံ ဝဒေတိ— ‘ကိံ တေ, အာဝုသော, ကရိဿတိ ပရော အာပန္နော ဝါ အနာပန္နော ဝါ. ဣင်္ဃ တွံ, အာဝုသော, သကာယ အာပတ္တိယာ ဝုဋ္ဌာဟီ’တိ. သော စေ, ဘိက္ခဝေ, ဘိက္ခု တဿ ဘိက္ခုနော ဝစနေန တံ အာပတ္တိံ ပဋိကရိတွာ ယေန တေ ဘိက္ခူ တေနုပသင်္ကမိ, ဥပသင်္ကမိတွာ တေ ဘိက္ခူ ဧဝံ ဝဒေတိ— ‘ယော ကိရ, အာဝုသော, ဧဝဉ္စေဝဉ္စ ကရောတိ ဣမံ နာမ သော အာပတ္တိံ အာပဇ္ဇတိ, ဣမံ နာမ တုမှေ အာဝုသော အာပတ္တိံ အာပန္နာ, ပဋိကရောထ တံ အာပတ္တိန်’တိ. တေ စေ, ဘိက္ခဝေ, ဘိက္ခူ တဿ ဘိက္ခုနော ဝစနေန တံ အာပတ္တိံ ပဋိကရေယျုံ, ဣစ္စေတံ ကုသလံ. နော စေ ပဋိကရေယျုံ, န တေ, ဘိက္ခဝေ, ဘိက္ခူ တေန ဘိက္ခုနာ အကာမာ ဝစနီယာ”တိ.
စောဒနာဝတ္ထုဘာဏဝါရော နိဋ္ဌိတော ဒုတိယော.