2.29 ဝဂ္ဂါဝဂ္ဂသညိပန္နရသက
ဣဓ ပန, ဘိက္ခဝေ, အညတရသ္မိံ အာဝါသေ တဒဟုပေါသထေ သမ္ဗဟုလာ အာဝါသိကာ ဘိက္ခူ သန္နိပတန္တိ စတ္တာရော ဝါ အတိရေကာ ဝါ. တေ ဇာနန္တိ— ‘အတ္ထညေ အာဝါသိကာ ဘိက္ခူ အနာဂတာ’တိ. တေ ဓမ္မသညိနော ဝိနယသညိနော ဝဂ္ဂါ ဝဂ္ဂသညိနော ဥပေါသထံ ကရောန္တိ, ပါတိမောက္ခံ ဥဒ္ဒိသန္တိ. တေဟိ ဥဒ္ဒိဿမာနေ ပါတိမောက္ခေ, အထညေ အာဝါသိကာ ဘိက္ခူ အာဂစ္ဆန္တိ ဗဟုတရာ. တေဟိ, ဘိက္ခဝေ, ဘိက္ခူဟိ ပုန ပါတိမောက္ခံ ဥဒ္ဒိသိတဗ္ဗံ. ဥဒ္ဒေသကာနံ အာပတ္တိ ဒုက္ကဋဿ. (1)
ဣဓ ပန, ဘိက္ခဝေ, အညတရသ္မိံ အာဝါသေ တဒဟုပေါသထေ သမ္ဗဟုလာ အာဝါသိကာ ဘိက္ခူ သန္နိပတန္တိ စတ္တာရော ဝါ အတိရေကာ ဝါ. တေ ဇာနန္တိ— ‘အတ္ထညေ အာဝါသိကာ ဘိက္ခူ အနာဂတာ’တိ. တေ ဓမ္မသညိနော ဝိနယသညိနော ဝဂ္ဂါ ဝဂ္ဂသညိနော ဥပေါသထံ ကရောန္တိ ပါတိမောက္ခံ ဥဒ္ဒိသန္တိ. တေဟိ ဥဒ္ဒိဿမာနေ ပါတိမောက္ခေ, အထညေ အာဝါသိကာ ဘိက္ခူ အာဂစ္ဆန္တိ သမသမာ. ဥဒ္ဒိဋ္ဌံ သုဥဒ္ဒိဋ္ဌံ, အဝသေသံ သောတဗ္ဗံ. ဥဒ္ဒေသကာနံ အာပတ္တိ ဒုက္ကဋဿ. (2)
ဣဓ ပန, ဘိက္ခဝေ, အညတရသ္မိံ အာဝါသေ တဒဟုပေါသထေ သမ္ဗဟုလာ အာဝါသိကာ ဘိက္ခူ သန္နိပတန္တိ စတ္တာရော ဝါ အတိရေကာ ဝါ. တေ ဇာနန္တိ— ‘အတ္ထညေ အာဝါသိကာ ဘိက္ခူ အနာဂတာ’တိ. တေ ဓမ္မသညိနော ဝိနယသညိနော ဝဂ္ဂါ ဝဂ္ဂသညိနော ဥပေါသထံ ကရောန္တိ ပါတိမောက္ခံ ဥဒ္ဒိသန္တိ. တေဟိ ဥဒ္ဒိဿမာနေ ပါတိမောက္ခေ, အထညေ အာဝါသိကာ ဘိက္ခူ အာဂစ္ဆန္တိ ထောကတရာ. ဥဒ္ဒိဋ္ဌံ သုဥဒ္ဒိဋ္ဌံ, အဝသေသံ သောတဗ္ဗံ. ဥဒ္ဒေသကာနံ အာပတ္တိ ဒုက္ကဋဿ. (3)
ဣဓ ပန, ဘိက္ခဝေ, အညတရသ္မိံ အာဝါသေ တဒဟုပေါသထေ သမ္ဗဟုလာ အာဝါသိကာ ဘိက္ခူ သန္နိပတန္တိ စတ္တာရော ဝါ အတိရေကာ ဝါ. တေ ဇာနန္တိ— ‘အတ္ထညေ အာဝါသိကာ ဘိက္ခူ အနာဂတာ’တိ. တေ ဓမ္မသညိနော ဝိနယသညိနော ဝဂ္ဂါ ဝဂ္ဂသညိနော ဥပေါသထံ ကရောန္တိ, ပါတိမောက္ခံ ဥဒ္ဒိသန္တိ. တေဟိ ဥဒ္ဒိဋ္ဌမတ္တေ ပါတိမောက္ခေ …ပေ… အဝုဋ္ဌိတာယ ပရိသာယ …ပေ… ဧကစ္စာယ ဝုဋ္ဌိတာယ ပရိသာယ …ပေ… သဗ္ဗာယ ဝုဋ္ဌိတာယ ပရိသာယ အထညေ အာဝါသိကာ ဘိက္ခူ အာဂစ္ဆန္တိ ဗဟုတရာ …ပေ… သမသမာ …ပေ… ထောကတရာ. ဥဒ္ဒိဋ္ဌံ သုဥဒ္ဒိဋ္ဌံ, တေသံ သန္တိကေ ပါရိသုဒ္ဓိ အာရောစေတဗ္ဗာ. ဥဒ္ဒေသကာနံ အာပတ္တိ ဒုက္ကဋဿ. (4–15)
ဝဂ္ဂါဝဂ္ဂသညိပန္နရသကံ နိဋ္ဌိတံ.