2.38 ဝဇ္ဇနီယပုဂ္ဂလသန္ဒဿန
န, ဘိက္ခဝေ, ဘိက္ခုနိယာ နိသိန္နပရိသာယ ပါတိမောက္ခံ ဥဒ္ဒိသိတဗ္ဗံ. ယော ဥဒ္ဒိသေယျ, အာပတ္တိ ဒုက္ကဋဿ. န သိက္ခမာနာယ …ပေ… န သာမဏေရဿ …ပေ… န သာမဏေရိယာ …ပေ… န သိက္ခာပစ္စက္ခာတကဿ …ပေ… န အန္တိမဝတ္ထုံ အဇ္ဈာပန္နကဿ နိသိန္နပရိသာယ ပါတိမောက္ခံ ဥဒ္ဒိသိတဗ္ဗံ. ယော ဥဒ္ဒိသေယျ, အာပတ္တိ ဒုက္ကဋဿ.
န အာပတ္တိယာ အဒဿနေ ဥက္ခိတ္တကဿ နိသိန္နပရိသာယ ပါတိမောက္ခံ ဥဒ္ဒိသိတဗ္ဗံ. ယော ဥဒ္ဒိသေယျ, ယထာဓမ္မော ကာရေတဗ္ဗော. န အာပတ္တိယာ အပ္ပဋိကမ္မေ ဥက္ခိတ္တကဿ နိသိန္နပရိသာယ …ပေ… န ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခိတ္တကဿ နိသိန္နပရိသာယ ပါတိမောက္ခံ ဥဒ္ဒိသိတဗ္ဗံ. ယော ဥဒ္ဒိသေယျ, ယထာဓမ္မော ကာရေတဗ္ဗော.
န ပဏ္ဍကဿ နိသိန္နပရိသာယ ပါတိမောက္ခံ ဥဒ္ဒိသိတဗ္ဗံ. ယော ဥဒ္ဒိသေယျ, အာပတ္တိ ဒုက္ကဋဿ. န ထေယျသံဝါသကဿ …ပေ… န တိတ္ထိယပက္ကန္တကဿ …ပေ… န တိရစ္ဆာနဂတဿ …ပေ… န မာတုဃာတကဿ …ပေ… န ပိတုဃာတကဿ …ပေ… န အရဟန္တဃာတကဿ …ပေ… န ဘိက္ခုနိဒူသကဿ …ပေ… န သံဃဘေဒကဿ …ပေ… န လောဟိတုပ္ပါဒကဿ …ပေ… န ဥဘတောဗျဉ္ဇနကဿ နိသိန္နပရိသာယ ပါတိမောက္ခံ ဥဒ္ဒိသိတဗ္ဗံ. ယော ဥဒ္ဒိသေယျ, အာပတ္တိ ဒုက္ကဋဿ.
န, ဘိက္ခဝေ, ပါရိဝါသိကပါရိသုဒ္ဓိဒါနေန ဥပေါသထော ကာတဗ္ဗော, အညတြ အဝုဋ္ဌိတာယ ပရိသာယ. န စ, ဘိက္ခဝေ, အနုပေါသထေ ဥပေါသထော ကာတဗ္ဗော, အညတြ သံဃသာမဂ္ဂိယာ”တိ.
တတိယဘာဏဝါရော နိဋ္ဌိတော.
ဥပေါသထက္ခန္ဓကော ဒုတိယော.
တဿုဒ္ဒါနံ
တိတ္ထိယာ ဗိမ္ဗိသာရော စ,
သန္နိပတိတုံ တုဏှိကာ;
ဓမ္မံ ရဟော ပါတိမောက္ခံ,
ဒေဝသိကံ တဒါ သကိံ.
ယထာပရိသာ သမဂ္ဂံ,
သာမဂ္ဂီ မဒ္ဒကုစ္ဆိ စ;
သီမာ မဟတီ နဒိယာ,
အနု ဒွေ ခုဒ္ဒကာနိ စ.
နဝါ ရာဇဂဟေ စေဝ,
သီမာ အဝိပ္ပဝါသနာ;
သမ္မန္နေ ပဌမံ သီမံ,
ပစ္ဆာ သီမံ သမူဟနေ.
အသမ္မတာ ဂါမသီမာ,
နဒိယာ သမုဒ္ဒေ သရေ;
ဥဒကုက္ခေပေါ ဘိန္ဒန္တိ,_
တထေဝဇ္ဈောတ္ထရန္တိ စ.
ကတိ ကမ္မာနိ ဥဒ္ဒေသော,
သဝရာ အသတီပိ စ;
ဓမ္မံ ဝိနယံ တဇ္ဇေန္တိ,
ပုန ဝိနယတဇ္ဇနာ.
စောဒနာ ကတေ ဩကာသေ,
အဓမ္မပ္ပဋိက္ကောသနာ;
စတုပဉ္စပရာ အာဝိ,
သဉ္စိစ္စ စေပိ ဝါယမေ.
သဂဟဋ္ဌာ အနဇ္ဈိဋ္ဌာ,
စောဒနမှိ န ဇာနတိ;
သမ္ဗဟုလာ န ဇာနန္တိ,
သဇ္ဇုကံ န စ ဂစ္ဆရေ.
ကတိမီ ကီဝတိကာ ဒူရေ,
အာရောစေတုဉ္စ နဿရိ;
ဥက္လာပံ အာသနံ ဒီပေါ,_
ဒိသာ အညော ဗဟုဿုတော.
သဇ္ဇုကံ ဝဿုပေါသထော,
သုဒ္ဓိကမ္မဉ္စ ဉာတကာ;
ဂဂ္ဂေါ စတုတယော ဒွေကော,
အာပတ္တိသဘာဂါ သရိ.
သဗ္ဗော သံဃော ဝေမတိကော,
န ဇာနန္တိ ဗဟုဿုတော;
ဗဟူ သမသမာ ထောကာ,
ပရိသာ အဝုဋ္ဌိတာယ စ.
ဧကစ္စာ ဝုဋ္ဌိတာ သဗ္ဗာ,
ဇာနန္တိ စ ဝေမတိကာ;
ကပ္ပတေဝါတိ ကုက္ကုစ္စာ,
ဇာနံ ပဿံ သုဏန္တိ စ.
အာဝါသိကေန အာဂန္တု,
စာတုပန္နရသော ပုန;
ပါဋိပဒေါ ပန္နရသော,
လိင်္ဂသံဝါသကာ ဥဘော.
ပါရိဝါသာနုပေါသထော,
အညတြ သံဃသာမဂ္ဂိယာ;
ဧတေ ဝိဘတ္တာ ဥဒ္ဒါနာ,
ဝတ္ထုဝိဘူတကာရဏာတိ.
ဣမသ္မိံ ခန္ဓကေ ဝတ္ထူနိ ဆအသီတိ.
ဥပေါသထက္ခန္ဓကော နိဋ္ဌိတော.