3.11 အဓမ္မိကကတိကာ
တေန ခေါ ပန သမယေန သာဝတ္ထိယာ သံဃေန ဧဝရူပါ ကတိကာ ကတာ ဟောတိ— “အန္တရာဝဿံ န ပဗ္ဗာဇေတဗ္ဗန်”တိ. ဝိသာခါယ မိဂါရမာတုယာ နတ္တာ ဘိက္ခူ ဥပသင်္ကမိတွာ ပဗ္ဗဇ္ဇံ ယာစိ. ဘိက္ခူ ဧဝမာဟံသု— “သံဃေန ခေါ, အာဝုသော, ဧဝရူပါ ကတိကာ ကတာ ‘အန္တရာဝဿံ န ပဗ္ဗာဇေတဗ္ဗန်’တိ. အာဂမေဟိ, အာဝုသော, ယာဝ ဘိက္ခူ ဝဿံ ဝသန္တိ. ဝဿံဝုဋ္ဌာ ပဗ္ဗာဇေဿန္တီ”တိ. အထ ခေါ တေ ဘိက္ခူ ဝဿံဝုဋ္ဌာ ဝိသာခါယ မိဂါရမာတုယာ နတ္တာရံ ဧတဒဝေါစုံ— “ဧဟိ ဒါနိ, အာဝုသော, ပဗ္ဗဇာဟီ”တိ. သော ဧဝမာဟ— “သစာဟံ, ဘန္တေ, ပဗ္ဗဇိတော အဿံ, အဘိရမေယျာမဟံ. န ဒါနာဟံ, ဘန္တေ, ပဗ္ဗဇိဿာမီ”တိ. ဝိသာခါ မိဂါရမာတာ ဥဇ္ဈာယတိ ခိယျတိ ဝိပါစေတိ— “ကထဉှိ နာမ အယျာ ဧဝရူပံ ကတိကံ ကရိဿန္တိ— ‘န အန္တရာဝဿံ ပဗ္ဗာဇေတဗ္ဗန်’တိ. ကံ ကာလံ ဓမ္မော န စရိတဗ္ဗော”တိ?
အဿောသုံ ခေါ ဘိက္ခူ ဝိသာခါယ မိဂါရမာတုယာ ဥဇ္ဈာယန္တိယာ ခိယျန္တိယာ ဝိပါစေန္တိယာ. အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ. “န, ဘိက္ခဝေ, ဧဝရူပါ ကတိကာ ကာတဗ္ဗာ— ‘န အန္တရာဝဿံ ပဗ္ဗာဇေတဗ္ဗန်’တိ. ယော ကရေယျ, အာပတ္တိ ဒုက္ကဋဿာ”တိ.