4.11 ဝေမတိကပန္နရသက
ဣဓ ပန, ဘိက္ခဝေ, အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ, ပဉ္စ ဝါ အတိရေကာ ဝါ. တေ ဇာနန္တိ— ‘အတ္ထညေ အာဝါသိကာ ဘိက္ခူ အနာဂတာ’တိ. တေ ‘ကပ္ပတိ နု ခေါ အမှာကံ ပဝါရေတုံ, န နု ခေါ ကပ္ပတီ’တိ ဝေမတိကာ ပဝါရေန္တိ. တေဟိ ပဝါရိယမာနေ အထညေ အာဝါသိကာ ဘိက္ခူ အာဂစ္ဆန္တိ ဗဟုတရာ. တေဟိ, ဘိက္ခဝေ, ဘိက္ခူဟိ ပုန ပဝါရေတဗ္ဗံ. ပဝါရိတာနံ အာပတ္တိ ဒုက္ကဋဿ. (1)
ဣဓ ပန, ဘိက္ခဝေ, အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ, ပဉ္စ ဝါ အတိရေကာ ဝါ. တေ ဇာနန္တိ— ‘အတ္ထညေ အာဝါသိကာ ဘိက္ခူ အနာဂတာ’တိ. တေ ‘ကပ္ပတိ နု ခေါ အမှာကံ ပဝါရေတုံ, န နု ခေါ ကပ္ပတီ’တိ ဝေမတိကာ ပဝါရေန္တိ. တေဟိ ပဝါရိယမာနေ အထညေ အာဝါသိကာ ဘိက္ခူ အာဂစ္ဆန္တိ သမသမာ. ပဝါရိတာ သုပ္ပဝါရိတာ, အဝသေသေဟိ ပဝါရေတဗ္ဗံ. ပဝါရိတာနံ အာပတ္တိ ဒုက္ကဋဿ. (2)
ဣဓ ပန, ဘိက္ခဝေ, အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ, ပဉ္စ ဝါ အတိရေကာ ဝါ. တေ ဇာနန္တိ— ‘အတ္ထညေ အာဝါသိကာ ဘိက္ခူ အနာဂတာ’တိ. တေ ‘ကပ္ပတိ နု ခေါ အမှာကံ ပဝါရေတုံ, န နု ခေါ ကပ္ပတီ’တိ ဝေမတိကာ ပဝါရေန္တိ. တေဟိ ပဝါရိယမာနေ အထညေ အာဝါသိကာ ဘိက္ခူ အာဂစ္ဆန္တိ ထောကတရာ. ပဝါရိတာ သုပ္ပဝါရိတာ, အဝသေသေဟိ ပဝါရေတဗ္ဗံ. ပဝါရိတာနံ အာပတ္တိ ဒုက္ကဋဿ. (3)
ဣဓ ပန, ဘိက္ခဝေ, အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ, ပဉ္စ ဝါ အတိရေကာ ဝါ. တေ ဇာနန္တိ— ‘အတ္ထညေ အာဝါသိကာ ဘိက္ခူ အနာဂတာ’တိ. တေ ‘ကပ္ပတိ နု ခေါ အမှာကံ ပဝါရေတုံ, န နု ခေါ ကပ္ပတီ’တိ ဝေမတိကာ ပဝါရေန္တိ. တေဟိ ပဝါရိတမတ္တေ …ပေ… အဝုဋ္ဌိတာယ ပရိသာယ …ပေ… ဧကစ္စာယ ဝုဋ္ဌိတာယ ပရိသာယ …ပေ… သဗ္ဗာယ ဝုဋ္ဌိတာယ ပရိသာယ, အထညေ အာဝါသိကာ ဘိက္ခူ အာဂစ္ဆန္တိ ဗဟုတရာ …ပေ… သမသမာ …ပေ… ထောကတရာ. ပဝါရိတာ သုပ္ပဝါရိတာ, တေသံ သန္တိကေ ပဝါရေတဗ္ဗံ. ပဝါရိတာနံ အာပတ္တိ ဒုက္ကဋဿ. (4–15)
ဝေမတိကပန္နရသကံ နိဋ္ဌိတံ.