5.10 ဂိဟိဝိကတာနုညာတာဒိ
တေန ခေါ ပန သမယေန မနုဿာနံ မဉ္စမ္ပိ ပီဌမ္ပိ စမ္မောနဒ္ဓါနိ ဟောန္တိ, စမ္မဝိနဒ္ဓါနိ. ဘိက္ခူ ကုက္ကုစ္စာယန္တာ နာဘိနိသီဒန္တိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ဂိဟိဝိကတံ အဘိနိသီဒိတုံ, န တွေဝ အဘိနိပဇ္ဇိတုန်”တိ.
တေန ခေါ ပန သမယေန ဝိဟာရာ စမ္မဝဒ္ဓေဟိ ဩဂုမ္ဖိယန္တိ. ဘိက္ခူ ကုက္ကုစ္စာယန္တာ နာဘိနိသီဒန္တိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ဗန္ဓနမတ္တံ အဘိနိသီဒိတုန်”တိ.
တေန ခေါ ပန သမယေန ဆဗ္ဗဂ္ဂိယာ ဘိက္ခူ သော်ပါဟနာ ဂါမံ ပဝိသန္တိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ— “သေယျထာပိ ဂိဟီ ကာမဘောဂိနော”တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, သော်ပါဟနေန ဂါမော ပဝိသိတဗ္ဗော. ယော ပဝိသေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန အညတရော ဘိက္ခု ဂိလာနော ဟောတိ, န သက္ကောတိ ဝိနာ ဥပါဟနေန ဂါမံ ပဝိသိတုံ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ဂိလာနေန ဘိက္ခုနာ သော်ပါဟနေန ဂါမံ ပဝိသိတုန်”တိ.