5.5 အဇ္ဈာရာမေဥပါဟနပဋိက္ခေပ
တေန ခေါ ပန သမယေန ဘဂဝါ အဇ္ဈောကာသေ အနုပါဟနော စင်္ကမတိ. “သတ္ထာ အနုပါဟနော စင်္ကမတီ”တိ— ထေရာပိ ဘိက္ခူ အနုပါဟနာ စင်္ကမန္တိ. ဆဗ္ဗဂ္ဂိယာ ဘိက္ခူ, သတ္ထရိ အနုပါဟနေ စင်္ကမမာနေ, ထေရေသုပိ ဘိက္ခူသု အနုပါဟနေသု စင်္ကမမာနေသု, သော်ပါဟနာ စင်္ကမန္တိ. ယေ တေ ဘိက္ခူ အပ္ပိစ္ဆာ …ပေ… တေ ဥဇ္ဈာယန္တိ ခိယျန္တိ ဝိပါစေန္တိ— “ကထဉှိ နာမ ဆဗ္ဗဂ္ဂိယာ ဘိက္ခူ, သတ္ထရိ အနုပါဟနေ စင်္ကမမာနေ, ထေရေသုပိ ဘိက္ခူသု အနုပါဟနေသု စင်္ကမမာနေသု, သော်ပါဟနာ စင်္ကမိဿန္တီ”တိ. အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ …ပေ… “သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခူ, သတ္ထရိ အနုပါဟနေ စင်္ကမမာနေ, ထေရေသုပိ ဘိက္ခူသု အနုပါဟနေသု စင်္ကမမာနေသု, သော်ပါဟနာ စင်္ကမန္တီ”တိ? “သစ္စံ, ဘဂဝါ”တိ. ဝိဂရဟိ ဗုဒ္ဓေါ ဘဂဝါ …ပေ… ကထဉှိ နာမ တေ, ဘိက္ခဝေ, မောဃပုရိသာ, သတ္ထရိ အနုပါဟနေ စင်္ကမမာနေ, ထေရေသုပိ ဘိက္ခူသု အနုပါဟနေသု စင်္ကမမာနေသု, သော်ပါဟနာ စင်္ကမိဿန္တိ. ဣမေ ဟိ နာမ, ဘိက္ခဝေ, ဂိဟီ ဩဒါတဝတ္ထဝသနကာ အဘိဇီဝနိကဿ သိပ္ပဿ ကာရဏာ အာစရိယေသု သဂါရဝါ သပ္ပတိဿာ သဘာဂဝုတ္တိကာ ဝိဟရိဿန္တိ. ဣဓ ခေါ တံ, ဘိက္ခဝေ, သောဘေထ, ယံ တုမှေ ဧဝံ သွာက္ခာတေ ဓမ္မဝိနယေ ပဗ္ဗဇိတာ သမာနာ အာစရိယေသု အာစရိယမတ္တေသု ဥပဇ္ဈာယေသု ဥပဇ္ဈာယမတ္တေသု အဂါရဝါ အပ္ပတိဿာ အသဘာဂဝုတ္တိကာ ဝိဟရေယျာထ. နေတံ, ဘိက္ခဝေ, အပ္ပသန္နာနံ ဝါ ပသာဒါယ …ပေ… ဝိဂရဟိတွာ …ပေ… ဓမ္မိံ ကထံ ကတွာ ဘိက္ခူ အာမန္တေသိ— “န, ဘိက္ခဝေ, အာစရိယေသု အာစရိယမတ္တေသု ဥပဇ္ဈာယေသု ဥပဇ္ဈာယမတ္တေသု အနုပါဟနေသု စင်္ကမမာနေသု သော်ပါဟနေန စင်္ကမိတဗ္ဗံ. ယော စင်္ကမေယျ, အာပတ္တိ ဒုက္ကဋဿ. န စ, ဘိက္ခဝေ, အဇ္ဈာရာမေ ဥပါဟနာ ဓာရေတဗ္ဗာ. ယော ဓာရေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန အညတရဿ ဘိက္ခုနော ပါဒခိလာဗာဓော ဟောတိ. တံ ဘိက္ခူ ပရိဂ္ဂဟေတွာ ဥစ္စာရမ္ပိ ပဿာဝမ္ပိ နိက္ခာမေန္တိ. အဒ္ဒသာ ခေါ ဘဂဝါ သေနာသနစာရိကံ အာဟိဏ္ဍန္တော တေ ဘိက္ခူ တံ ဘိက္ခုံ ပရိဂ္ဂဟေတွာ ဥစ္စာရမ္ပိ ပဿာဝမ္ပိ နိက္ခာမေန္တေ, ဒိသွာန ယေန တေ ဘိက္ခူ တေနုပသင်္ကမိ, ဥပသင်္ကမိတွာ တေ ဘိက္ခူ ဧတဒဝေါစ— “ကိံ ဣမဿ, ဘိက္ခဝေ, ဘိက္ခုနော အာဗာဓော”တိ? “ဣမဿ, ဘန္တေ, အာယသ္မတော ပါဒခိလာဗာဓော; ဣမံ မယံ ပရိဂ္ဂဟေတွာ ဥစ္စာရမ္ပိ ပဿာဝမ္ပိ နိက္ခာမေမာ”တိ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ— “အနုဇာနာမိ, ဘိက္ခဝေ, ယဿ ပါဒါ ဝါ ဒုက္ခာ, ပါဒါ ဝါ ဖလိတာ, ပါဒခိလော ဝါ အာဗာဓော ဥပါဟနံ ဓာရေတုန်”တိ.
တေန ခေါ ပန သမယေန ဘိက္ခူ အဓောတေဟိ ပါဒေဟိ မဉ္စမ္ပိ ပီဌမ္ပိ အဘိရုဟန္တိ; စီဝရမ္ပိ သေနာသနမ္ပိ ဒုဿတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ‘ဣဒါနိ မဉ္စံ ဝါ ပီဌံ ဝါ အဘိရုဟိဿာမီ’တိ ဥပါဟနံ ဓာရေတုန်”တိ.
တေန ခေါ ပန သမယေန ဘိက္ခူ ရတ္တိယာ ဥပေါသထဂ္ဂမ္ပိ သန္နိသဇ္ဇမ္ပိ ဂစ္ဆန္တာ အန္ဓကာရေ ခါဏုမ္ပိ ကဏ္ဋကမ္ပိ အက္ကမန္တိ; ပါဒါ ဒုက္ခာ ဟောန္တိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, အဇ္ဈာရာမေ ဥပါဟနံ ဓာရေတုံ, ဥက္ကံ, ပဒီပံ, ကတ္တရဒဏ္ဍန်”တိ.