5.9 သဗ္ဗစမ္မပဋိက္ခေပ
တေန ခေါ ပန သမယေန ဆဗ္ဗဂ္ဂိယာ ဘိက္ခူ— “ဘဂဝတာ ဥစ္စာသယနမဟာသယနာနိ ပဋိက္ခိတ္တာနီတိ— မဟာစမ္မာနိ ဓာရေန္တိ, သီဟစမ္မံ ဗျဂ္ဃစမ္မံ ဒီပိစမ္မံ. တာနိ မဉ္စပ္ပမာဏေနပိ ဆိန္နာနိ ဟောန္တိ, ပီဌပ္ပမာဏေနပိ ဆိန္နာနိ ဟောန္တိ, အန္တောပိ မဉ္စေ ပညတ္တာနိ ဟောန္တိ, ဗဟိပိ မဉ္စေ ပညတ္တာနိ ဟောန္တိ, အန္တောပိ ပီဌေ ပညတ္တာနိ ဟောန္တိ, ဗဟိပိ ပီဌေ ပညတ္တာနိ ဟောန္တိ. မနုဿာ ဝိဟာရစာရိကံ အာဟိဏ္ဍန္တာ ပဿိတွာ ဥဇ္ဈာယန္တိ ခိယျန္တိ ဝိပါစေန္တိ— “သေယျထာပိ ဂိဟီ ကာမဘောဂိနော”တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, မဟာစမ္မာနိ ဓာရေတဗ္ဗာနိ, သီဟစမ္မံ ဗျဂ္ဃစမ္မံ ဒီပိစမ္မံ. ယော ဓာရေယျ, အာပတ္တိ ဒုက္ကဋဿာ”တိ.
တေန ခေါ ပန သမယေန ဆဗ္ဗဂ္ဂိယာ ဘိက္ခူ— “ဘဂဝတာ မဟာစမ္မာနိ ပဋိက္ခိတ္တာနီ”တိ— ဂေါစမ္မာနိ ဓာရေန္တိ. တာနိ မဉ္စပ္ပမာဏေနပိ ဆိန္နာနိ ဟောန္တိ, ပီဌပ္ပမာဏေနပိ ဆိန္နာနိ ဟောန္တိ, အန္တောပိ မဉ္စေ ပညတ္တာနိ ဟောန္တိ, ဗဟိပိ မဉ္စေ ပညတ္တာနိ ဟောန္တိ, အန္တောပိ ပီဌေ ပညတ္တာနိ ဟောန္တိ, ဗဟိပိ ပီဌေ ပညတ္တာနိ ဟောန္တိ. အညတရောပိ ပါပဘိက္ခု အညတရဿ ပါပုပါသကဿ ကုလူပကော ဟောတိ. အထ ခေါ သော ပါပဘိက္ခု ပုဗ္ဗဏှသမယံ နိဝါသေတွာ ပတ္တစီဝရမာဒါယ ယေန တဿ ပါပုပါသကဿ နိဝေသနံ တေနုပသင်္ကမိ, ဥပသင်္ကမိတွာ ပညတ္တေ အာသနေ နိသီဒိ. အထ ခေါ သော ပါပုပါသကော ယေန သော ပါပဘိက္ခု တေနုပသင်္ကမိ, ဥပသင်္ကမိတွာ တံ ပါပဘိက္ခုံ အဘိဝါဒေတွာ ဧကမန္တံ နိသီဒိ. တေန ခေါ ပန သမယေန တဿ ပါပုပါသကဿ ဝစ္ဆကော ဟောတိ တရုဏကော အဘိရူပေါ ဒဿနီယော ပါသာဒိကော စိတြော, သေယျထာပိ ဒီပိစ္ဆာပေါ. အထ ခေါ သော ပါပဘိက္ခု တံ ဝစ္ဆကံ သက္ကစ္စံ ဥပနိဇ္ဈာယတိ. အထ ခေါ သော ပါပုပါသကော တံ ပါပဘိက္ခုံ ဧတဒဝေါစ— “ကိဿ, ဘန္တေ, အယျော ဣမံ ဝစ္ဆကံ သက္ကစ္စံ ဥပနိဇ္ဈာယတီ”တိ? “အတ္ထော မေ, အာဝုသော, ဣမဿ ဝစ္ဆကဿ စမ္မေနာ”တိ. အထ ခေါ သော ပါပုပါသကော တံ ဝစ္ဆကံ ဝဓိတွာ စမ္မံ ဝိဓုနိတွာ တဿ ပါပဘိက္ခုနော ပါဒါသိ. အထ ခေါ သော ပါပဘိက္ခု တံ စမ္မံ သင်္ဃာဋိယာ ပဋိစ္ဆာဒေတွာ အဂမာသိ. အထ ခေါ သာ ဂါဝီ ဝစ္ဆဂိဒ္ဓိနီ တံ ပါပဘိက္ခုံ ပိဋ္ဌိတော ပိဋ္ဌိတော အနုဗန္ဓိ. ဘိက္ခူ ဧဝမာဟံသု— “ကိဿ တျာယံ, အာဝုသော, ဂါဝီ ပိဋ္ဌိတော ပိဋ္ဌိတော အနုဗန္ဓီ”တိ? “အဟမ္ပိ ခေါ, အာဝုသော, န ဇာနာမိ ကေန မျာယံ ဂါဝီ ပိဋ္ဌိတော ပိဋ္ဌိတော အနုဗန္ဓီ”တိ. တေန ခေါ ပန သမယေန တဿ ပါပဘိက္ခုနော သင်္ဃာဋိ လောဟိတေန မက္ခိတာ ဟောတိ. ဘိက္ခူ ဧဝမာဟံသု— “အယံ ပန တေ, အာဝုသော, သင်္ဃာဋိ ကိံ ကတာ”တိ? အထ ခေါ သော ပါပဘိက္ခု ဘိက္ခူနံ ဧတမတ္ထံ အာရောစေသိ. “ကိံ ပန တွံ, အာဝုသော, ပါဏာတိပါတေ သမာဒပေသီ”တိ? “ဧဝမာဝုသော”တိ. ယေ တေ ဘိက္ခူ အပ္ပိစ္ဆာ တေ ဥဇ္ဈာယန္တိ ခိယျန္တိ ဝိပါစေန္တိ— “ကထဉှိ နာမ ဘိက္ခု ပါဏာတိပါတေ သမာဒပေဿတိ, နနု ဘဂဝတာ အနေကပရိယာယေန ပါဏာတိပါတော ဂရဟိတော, ပါဏာတိပါတာ ဝေရမဏီ ပသတ္ထာ”တိ. အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ.
အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ တံ ပါပဘိက္ခုံ ပဋိပုစ္ဆိ— “သစ္စံ ကိရ တွံ, ဘိက္ခု, ပါဏာတိပါတေ သမာဒပေသီ”တိ? “သစ္စံ, ဘဂဝါ”တိ …ပေ… ကထဉှိ နာမ တွံ, မောဃပုရိသ, ပါဏာတိပါတေ သမာဒပေဿသိ, နနု မယာ, မောဃပုရိသ, အနေကပရိယာယေန ပါဏာတိပါတော ဂရဟိတော, ပါဏာတိပါတာ ဝေရမဏီ ပသတ္ထာ. နေတံ, မောဃပုရိသ, အပ္ပသန္နာနံ ဝါ ပသာဒါယ …ပေ… ဝိဂရဟိတွာ ဓမ္မိံ ကထံ ကတွာ ဘိက္ခူ အာမန္တေသိ— “န, ဘိက္ခဝေ, ပါဏာတိပါတေ သမာဒပေတဗ္ဗံ. ယော သမာဒပေယျ, ယထာဓမ္မော ကာရေတဗ္ဗော. န, ဘိက္ခဝေ, ဂေါစမ္မံ ဓာရေတဗ္ဗံ. ယော ဓာရေယျ, အာပတ္တိ ဒုက္ကဋဿ. န စ, ဘိက္ခဝေ, ကိဉ္စိ စမ္မံ ဓာရေတဗ္ဗံ. ယော ဓာရေယျ, အာပတ္တိ ဒုက္ကဋဿာ”တိ.