6.21 မေဏ္ဍကဂဟပတိဝတ္ထု
တေန ခေါ ပန သမယေန ဘဒ္ဒိယနဂရေ မေဏ္ဍကော ဂဟပတိ ပဋိဝသတိ. တဿ ဧဝရူပေါ ဣဒ္ဓါနုဘာဝေါ ဟောတိ— သီသံ နဟာယိတွာ ဓညာဂါရံ သမ္မဇ္ဇာပေတွာ ဗဟိဒွါရေ နိသီဒတိ, အန္တလိက္ခာ ဓညဿ ဓာရာ ဩပတိတွာ ဓညာဂါရံ ပူရေတိ. ဘရိယာယ ဧဝရူပေါ ဣဒ္ဓါနုဘာဝေါ ဟောတိ— ဧကံယေဝ အာဠှကထာလိကံ ဥပနိသီဒိတွာ ဧကဉ္စ သူပဘိဉ္ဇနကံ ဒါသကမ္မကရပေါရိသံ ဘတ္တေန ပရိဝိသတိ, န တာဝ တံ ခိယျတိ ယာဝ သာ န ဝုဋ္ဌာတိ. ပုတ္တဿ ဧဝရူပေါ ဣဒ္ဓါနုဘာဝေါ ဟောတိ— ဧကံယေဝ သဟဿထဝိကံ ဂဟေတွာ ဒါသကမ္မကရပေါရိသဿ ဆမာသိကံ ဝေတနံ ဒေတိ, န တာဝ တံ ခိယျတိ ယာဝဿ ဟတ္ထဂတာ. သုဏိသာယ ဧဝရူပေါ ဣဒ္ဓါနုဘာဝေါ ဟောတိ— ဧကံယေဝ စတုဒေါဏိကံ ပိဋကံ ဥပနိသီဒိတွာ ဒါသကမ္မကရပေါရိသဿ ဆမာသိကံ ဘတ္တံ ဒေတိ, န တာဝ တံ ခိယျတိ ယာဝ သာ န ဝုဋ္ဌာတိ. ဒါသဿ ဧဝရူပေါ ဣဒ္ဓါနုဘာဝေါ ဟောတိ— ဧကေန နင်္ဂလေန ကသန္တဿ သတ္တ သီတာယော ဂစ္ဆန္တိ.
အဿောသိ ခေါ ရာဇာ မာဂဓော သေနိယော ဗိမ္ဗိသာရော— “အမှာကံ ကိရ ဝိဇိတေ ဘဒ္ဒိယနဂရေ မေဏ္ဍကော ဂဟပတိ ပဋိဝသတိ. တဿ ဧဝရူပေါ ဣဒ္ဓါနုဘာဝေါ— သီသံ နဟာယိတွာ ဓညာဂါရံ သမ္မဇ္ဇာပေတွာ ဗဟိဒွါရေ နိသီဒတိ, အန္တလိက္ခာ ဓညဿ ဓာရာ ဩပတိတွာ ဓညာဂါရံ ပူရေတိ. ဘရိယာယ ဧဝရူပေါ ဣဒ္ဓါနုဘာဝေါ— ဧကံယေဝ အာဠှကထာလိကံ ဥပနိသီဒိတွာ ဧကဉ္စ သူပဘိဉ္ဇနကံ ဒါသကမ္မကရပေါရိသံ ဘတ္တေန ပရိဝိသတိ, န တာဝ တံ ခိယျတိ ယာဝ သာ န ဝုဋ္ဌာတိ. ပုတ္တဿ ဧဝရူပေါ ဣဒ္ဓါနုဘာဝေါ— ဧကံယေဝ သဟဿထဝိကံ ဂဟေတွာ ဒါသကမ္မကရပေါရိသဿ ဆမာသိကံ ဝေတနံ ဒေတိ, န တာဝ တံ ခိယျတိ ယာဝဿ ဟတ္ထဂတာ. သုဏိသာယ ဧဝရူပေါ ဣဒ္ဓါနုဘာဝေါ— ဧကံယေဝ စတုဒေါဏိကံ ပိဋကံ ဥပနိသီဒိတွာ ဒါသကမ္မကရပေါရိသဿ ဆမာသိကံ ဘတ္တံ ဒေတိ, န တာဝ တံ ခိယျတိ ယာဝ သာ န ဝုဋ္ဌာတိ. ဒါသဿ ဧဝရူပေါ ဣဒ္ဓါနုဘာဝေါ— ဧကေန နင်္ဂလေန ကသန္တဿ သတ္တ သီတာယော ဂစ္ဆန္တီ”တိ. အထ ခေါ ရာဇာ မာဂဓော သေနိယော ဗိမ္ဗိသာရော အညတရံ သဗ္ဗတ္ထကံ မဟာမတ္တံ အာမန္တေသိ— “အမှာကံ ကိရ, ဘဏေ, ဝိဇိတေ ဘဒ္ဒိယနဂရေ မေဏ္ဍကော ဂဟပတိ ပဋိဝသတိ. တဿ ဧဝရူပေါ ဣဒ္ဓါနုဘာဝေါ— သီသံ နဟာယိတွာ ဓညာဂါရံ သမ္မဇ္ဇာပေတွာ ဗဟိဒွါရေ နိသီဒတိ, အန္တလိက္ခာ ဓညဿ ဓာရာ ဩပတိတွာ ဓညာဂါရံ ပူရေတိ. ဘရိယာယ …ပေ… ပုတ္တဿ… သုဏိသာယ… ဒါသဿ ဧဝရူပေါ ဣဒ္ဓါနုဘာဝေါ, ဧကေန နင်္ဂလေန ကသန္တဿ သတ္တ သီတာယော ဂစ္ဆန္တီတိ. ဂစ္ဆ, ဘဏေ, ဇာနာဟိ. ယထာ မယာ သာမံ ဒိဋ္ဌော, ဧဝံ တဝ ဒိဋ္ဌော ဘဝိဿတီ”တိ.
“ဧဝံ, ဒေဝါ”တိ ခေါ သော မဟာမတ္တော ရညော မာဂဓဿ သေနိယဿ ဗိမ္ဗိသာရဿ ပဋိဿုဏိတွာ စတုရင်္ဂိနိယာ သေနာယ ယေန ဘဒ္ဒိယံ တေန ပါယာသိ. အနုပုဗ္ဗေန ယေန ဘဒ္ဒိယံ ယေန မေဏ္ဍကော ဂဟပတိ တေနုပသင်္ကမိ; ဥပသင်္ကမိတွာ မေဏ္ဍကံ ဂဟပတိံ ဧတဒဝေါစ— “အဟဉှိ, ဂဟပတိ, ရညာ အာဏတ္တော— ‘အမှာကံ ကိရ, ဘဏေ, ဝိဇိတေ ဘဒ္ဒိယနဂရေ မေဏ္ဍကော ဂဟပတိ ပဋိဝသတိ, တဿ ဧဝရူပေါ ဣဒ္ဓါနုဘာဝေါ, သီသံ နဟာယိတွာ …ပေ… ဘရိယာယ… ပုတ္တဿ… သုဏိသာယ… ဒါသဿ ဧဝရူပေါ ဣဒ္ဓါနုဘာဝေါ, ဧကေန နင်္ဂလေန ကသန္တဿ သတ္တ သီတာယော ဂစ္ဆန္တီတိ, ဂစ္ဆ, ဘဏေ, ဇာနာဟိ. ယထာ မယာ သာမံ ဒိဋ္ဌော, ဧဝံ တဝ ဒိဋ္ဌော ဘဝိဿတီ’တိ. ပဿာမ တေ, ဂဟပတိ, ဣဒ္ဓါနုဘာဝန်”တိ. အထ ခေါ မေဏ္ဍကော ဂဟပတိ သီသံ နဟာယိတွာ ဓညာဂါရံ သမ္မဇ္ဇာပေတွာ ဗဟိဒွါရေ နိသီဒိ, အန္တလိက္ခာ ဓညဿ ဓာရာ ဩပတိတွာ ဓညာဂါရံ ပူရေသိ. “ဒိဋ္ဌော တေ, ဂဟပတိ, ဣဒ္ဓါနုဘာဝေါ. ဘရိယာယ တေ ဣဒ္ဓါနုဘာဝံ ပဿိဿာမာ”တိ.
အထ ခေါ မေဏ္ဍကော ဂဟပတိ ဘရိယံ အာဏာပေသိ— “တေန ဟိ စတုရင်္ဂိနိံ သေနံ ဘတ္တေန ပရိဝိသာ”တိ. အထ ခေါ မေဏ္ဍကဿ ဂဟပတိဿ ဘရိယာ ဧကံယေဝ အာဠှကထာလိကံ ဥပနိသီဒိတွာ ဧကဉ္စ သူပဘိဉ္ဇနကံ စတုရင်္ဂိနိံ သေနံ ဘတ္တေန ပရိဝိသိ, န တာဝ တံ ခိယျတိ, ယာဝ သာ န ဝုဋ္ဌာတိ. “ဒိဋ္ဌော တေ, ဂဟပတိ, ဘရိယာယပိ ဣဒ္ဓါနုဘာဝေါ. ပုတ္တဿ တေ ဣဒ္ဓါနုဘာဝံ ပဿိဿာမာ”တိ. အထ ခေါ မေဏ္ဍကော ဂဟပတိ ပုတ္တံ အာဏာပေသိ— “တေန ဟိ စတုရင်္ဂိနိယာ သေနာယ ဆမာသိကံ ဝေတနံ ဒေဟီ”တိ. အထ ခေါ မေဏ္ဍကဿ ဂဟပတိဿ ပုတ္တော ဧကံယေဝ သဟဿထဝိကံ ဂဟေတွာ စတုရင်္ဂိနိယာ သေနာယ ဆမာသိကံ ဝေတနံ အဒါသိ, န တာဝ တံ ခိယျတိ, ယာဝဿ ဟတ္ထဂတာ. “ဒိဋ္ဌော တေ, ဂဟပတိ, ပုတ္တဿပိ ဣဒ္ဓါနုဘာဝေါ. သုဏိသာယ တေ ဣဒ္ဓါနုဘာဝံ ပဿိဿာမာ”တိ. အထ ခေါ မေဏ္ဍကော ဂဟပတိ သုဏိသံ အာဏာပေသိ— “တေန ဟိ စတုရင်္ဂိနိယာ သေနာယ ဆမာသိကံ ဘတ္တံ ဒေဟီ”တိ. အထ ခေါ မေဏ္ဍကဿ ဂဟပတိဿ သုဏိသာ ဧကံယေဝ စတုဒေါဏိကံ ပိဋကံ ဥပနိသီဒိတွာ စတုရင်္ဂိနိယာ သေနာယ ဆမာသိကံ ဘတ္တံ အဒါသိ, န တာဝ တံ ခိယျတိ ယာဝ သာ န ဝုဋ္ဌာတိ. “ဒိဋ္ဌော တေ, ဂဟပတိ, သုဏိသာယပိ ဣဒ္ဓါနုဘာဝေါ. ဒါသဿ တေ ဣဒ္ဓါနုဘာဝံ ပဿိဿာမာ”တိ. “မယှံ ခေါ, သာမိ, ဒါသဿ ဣဒ္ဓါနုဘာဝေါ ခေတ္တေ ပဿိတဗ္ဗော”တိ. “အလံ, ဂဟပတိ, ဒိဋ္ဌော တေ ဒါသဿပိ ဣဒ္ဓါနုဘာဝေါ”တိ. အထ ခေါ သော မဟာမတ္တော စတုရင်္ဂိနိယာ သေနာယ ပုနဒေဝ ရာဇဂဟံ ပစ္စာဂဉ္ဆိ. ယေန ရာဇာ မာဂဓော သေနိယော ဗိမ္ဗိသာရော တေနုပသင်္ကမိ; ဥပသင်္ကမိတွာ ရညော မာဂဓဿ သေနိယဿ ဗိမ္ဗိသာရဿ ဧတမတ္ထံ အာရောစေသိ.
အထ ခေါ ဘဂဝါ ဝေသာလိယံ ယထာဘိရန္တံ ဝိဟရိတွာ ယေန ဘဒ္ဒိယံ တေန စာရိကံ ပက္ကာမိ မဟတာ ဘိက္ခုသံဃေန သဒ္ဓိံ အဍ္ဎတေလသေဟိ ဘိက္ခုသတေဟိ. အထ ခေါ ဘဂဝါ အနုပုဗ္ဗေန စာရိကံ စရမာနော ယေန ဘဒ္ဒိယံ တဒဝသရိ. တတြ သုဒံ ဘဂဝါ ဘဒ္ဒိယေ ဝိဟရတိ ဇာတိယာ ဝနေ. အဿောသိ ခေါ မေဏ္ဍကော ဂဟပတိ— “သမဏော ခလု ဘော ဂေါတမော သကျပုတ္တော သကျကုလာ ပဗ္ဗဇိတော ဘဒ္ဒိယံ အနုပ္ပတ္တော ဘဒ္ဒိယေ ဝိဟရတိ ဇာတိယာ ဝနေ. တံ ခေါ ပန ဘဂဝန္တံ ဂေါတမံ ဧဝံ ကလျာဏော ကိတ္တိသဒ္ဒေါ အဗ္ဘုဂ္ဂတော— ‘ဣတိပိ သော ဘဂဝါ အရဟံ သမ္မာသမ္ဗုဒ္ဓေါ ဝိဇ္ဇာစရဏသမ္ပန္နော သုဂတော လောကဝိဒူ အနုတ္တရော ပုရိသဒမ္မသာရထိ သတ္ထာ ဒေဝမနုဿာနံ ဗုဒ္ဓေါ ဘဂဝါ’. သော ဣမံ လောကံ သဒေဝကံ သမာရကံ သဗြဟ္မကံ သဿမဏဗြာဟ္မဏိံ ပဇံ သဒေဝမနုဿံ သယံ အဘိညာ သစ္ဆိကတွာ ပဝေဒေတိ. သော ဓမ္မံ ဒေသေတိ အာဒိကလျာဏံ မဇ္ဈေကလျာဏံ ပရိယောသာနကလျာဏံ သာတ္ထံ သဗျဉ္ဇနံ ကေဝလပရိပုဏ္ဏံ ပရိသုဒ္ဓံ ဗြဟ္မစရိယံ ပကာသေတိ. သာဓု ခေါ ပန တထာရူပါနံ အရဟတံ ဒဿနံ ဟောတီ”တိ.
အထ ခေါ မေဏ္ဍကော ဂဟပတိ ဘဒြာနိ ဘဒြာနိ ယာနာနိ ယောဇာပေတွာ ဘဒြံ ဘဒြံ ယာနံ အဘိရုဟိတွာ ဘဒြေဟိ ဘဒြေဟိ ယာနေဟိ ဘဒ္ဒိယာ နိယျာသိ ဘဂဝန္တံ ဒဿနာယ. အဒ္ဒသံသု ခေါ သမ္ဗဟုလာ တိတ္ထိယာ မေဏ္ဍကံ ဂဟပတိံ ဒူရတောဝ အာဂစ္ဆန္တံ, ဒိသွာန မေဏ္ဍကံ ဂဟပတိံ ဧတဒဝေါစုံ— “ကဟံ တွံ, ဂဟပတိ, ဂစ္ဆသီ”တိ? “ဂစ္ဆာမဟံ, ဘန္တေ, ဘဂဝန္တံ သမဏံ ဂေါတမံ ဒဿနာယာ”တိ. “ကိံ ပန တွံ, ဂဟပတိ, ကိရိယဝါဒေါ သမာနော အကိရိယဝါဒံ သမဏံ ဂေါတမံ ဒဿနာယ ဥပသင်္ကမိဿသိ? သမဏော ဟိ, ဂဟပတိ, ဂေါတမော အကိရိယဝါဒေါ အကိရိယာယ ဓမ္မံ ဒေသေတိ, တေန စ သာဝကေ ဝိနေတီ”တိ. အထ ခေါ မေဏ္ဍကဿ ဂဟပတိဿ ဧတဒဟောသိ— “နိဿံသယံ ခေါ သော ဘဂဝါ အရဟံ သမ္မာသမ္ဗုဒ္ဓေါ ဘဝိဿတိ, ယထယိမေ တိတ္ထိယာ ဥသူယန္တီ”တိ. ယာဝတိကာ ယာနဿ ဘူမိ, ယာနေန ဂန္တွာ ယာနာ ပစ္စောရောဟိတွာ ပတ္တိကောဝ ယေန ဘဂဝါ တေနုပသင်္ကမိ, ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နဿ ခေါ မေဏ္ဍကဿ ဂဟပတိဿ ဘဂဝါ အနုပုဗ္ဗိံ ကထံ ကထေသိ, သေယျထိဒံ— ဒါနကထံ …ပေ… အပရပ္ပစ္စယော သတ္ထုသာသနေ ဘဂဝန္တံ ဧတဒဝေါစ— “အဘိက္ကန္တံ, ဘန္တေ …ပေ… ဥပါသကံ မံ ဘဂဝါ ဓာရေတု အဇ္ဇတဂ္ဂေ ပါဏုပေတံ သရဏံ ဂတံ. အဓိဝါသေတု စ မေ, ဘန္တေ, ဘဂဝါ သွာတနာယ ဘတ္တံ သဒ္ဓိံ ဘိက္ခုသံဃေနာ”တိ. အဓိဝါသေသိ ဘဂဝါ တုဏှီဘာဝေန. အထ ခေါ မေဏ္ဍကော ဂဟပတိ ဘဂဝတော အဓိဝါသနံ ဝိဒိတွာ ဥဋ္ဌာယာသနာ ဘဂဝန္တံ အဘိဝါဒေတွာ ပဒက္ခိဏံ ကတွာ ပက္ကာမိ.
အထ ခေါ မေဏ္ဍကော ဂဟပတိ တဿာ ရတ္တိယာ အစ္စယေန ပဏီတံ ခါဒနီယံ ဘောဇနီယံ ပဋိယာဒါပေတွာ ဘဂဝတော ကာလံ အာရောစာပေသိ— “ကာလော, ဘန္တေ, နိဋ္ဌိတံ ဘတ္တန်”တိ. အထ ခေါ ဘဂဝါ ပုဗ္ဗဏှသမယံ နိဝါသေတွာ ပတ္တစီဝရမာဒါယ ယေန မေဏ္ဍကဿ ဂဟပတိဿ နိဝေသနံ တေနုပသင်္ကမိ; ဥပသင်္ကမိတွာ ပညတ္တေ အာသနေ နိသီဒိ သဒ္ဓိံ ဘိက္ခုသံဃေန. အထ ခေါ မေဏ္ဍကဿ ဂဟပတိဿ ဘရိယာ စ ပုတ္တော စ သုဏိသာ စ ဒါသော စ ယေန ဘဂဝါ တေနုပသင်္ကမိံသု, ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိံသု. တေသံ ဘဂဝါ အနုပုဗ္ဗိံ ကထံ ကထေသိ, သေယျထိဒံ— ဒါနကထံ …ပေ… အပရပ္ပစ္စယာ သတ္ထုသာသနေ ဘဂဝန္တံ ဧတဒဝေါစုံ— “အဘိက္ကန္တံ, ဘန္တေ …ပေ… ဧတေ မယံ, ဘန္တေ, ဘဂဝန္တံ သရဏံ ဂစ္ဆာမ ဓမ္မဉ္စ ဘိက္ခုသံဃဉ္စ. ဥပါသကေ နော ဘဂဝါ ဓာရေတု အဇ္ဇတဂ္ဂေ ပါဏုပေတေ သရဏံ ဂတေ”တိ. အထ ခေါ မေဏ္ဍကော ဂဟပတိ ဗုဒ္ဓပ္ပမုခံ ဘိက္ခုသံဃံ ပဏီတေန ခါဒနီယေန ဘောဇနီယေန သဟတ္ထာ သန္တပ္ပေတွာ သမ္ပဝါရေတွာ ဘဂဝန္တံ ဘုတ္တာဝိံ ဩနီတပတ္တပါဏိံ ဧကမန္တံ နိသီဒိ. ဧကမန္တံ နိသိန္နော ခေါ မေဏ္ဍကော ဂဟပတိ ဘဂဝန္တံ ဧတဒဝေါစ— “ယာဝ, ဘန္တေ, ဘဂဝါ ဘဒ္ဒိယေ ဝိဟရတိ တာဝ အဟံ ဗုဒ္ဓပ္ပမုခဿ ဘိက္ခုသံဃဿ ဓုဝဘတ္တေနာ”တိ. အထ ခေါ ဘဂဝါ မေဏ္ဍကံ ဂဟပတိံ ဓမ္မိယာ ကထာယ သန္ဒဿေတွာ သမာဒပေတွာ သမုတ္တေဇေတွာ သမ္ပဟံသေတွာ ဥဋ္ဌာယာသနာ ပက္ကာမိ.