6.22 ပဉ္စဂေါရသာဒိအနုဇာနန
အထ ခေါ ဘဂဝါ ဘဒ္ဒိယေ ယထာဘိရန္တံ ဝိဟရိတွာ မေဏ္ဍကံ ဂဟပတိံ အနာပုစ္ဆာ ယေန အင်္ဂုတ္တရာပေါ တေန စာရိကံ ပက္ကာမိ မဟတာ ဘိက္ခုသံဃေန သဒ္ဓိံ အဍ္ဎတေလသေဟိ ဘိက္ခုသတေဟိ. အဿောသိ ခေါ မေဏ္ဍကော ဂဟပတိ— “ဘဂဝါ ကိရ ယေန အင်္ဂုတ္တရာပေါ တေန စာရိကံ ပက္ကန္တော မဟတာ ဘိက္ခုသံဃေန သဒ္ဓိံ အဍ္ဎတေလသေဟိ ဘိက္ခုသတေဟီ”တိ. အထ ခေါ မေဏ္ဍကော ဂဟပတိ ဒါသေ စ ကမ္မကရေ စ အာဏာပေသိ— “တေန ဟိ, ဘဏေ, ဗဟုံ လောဏမ္ပိ, တေလမ္ပိ, တဏ္ဍုလမ္ပိ, ခါဒနီယမ္ပိ သကဋေသု အာရောပေတွာ အာဂစ္ဆထ, အဍ္ဎတေလသာနိ စ ဂေါပါလကသတာနိ အဍ္ဎတေလသာနိ စ ဓေနုသတာနိ အာဒါယ အာဂစ္ဆန္တု, ယတ္ထ ဘဂဝန္တံ ပဿိဿာမ တတ္ထ တရုဏေန ခီရေန ဘောဇေဿာမာ”တိ. အထ ခေါ မေဏ္ဍကော ဂဟပတိ ဘဂဝန္တံ အန္တရာမဂ္ဂေ ကန္တာရေ သမ္ဘာဝေသိ. အထ ခေါ မေဏ္ဍကော ဂဟပတိ ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ အဋ္ဌာသိ. ဧကမန္တံ ဌိတော ခေါ မေဏ္ဍကော ဂဟပတိ ဘဂဝန္တံ ဧတဒဝေါစ— “အဓိဝါသေတု မေ, ဘန္တေ, ဘဂဝါ သွာတနာယ ဘတ္တံ သဒ္ဓိံ ဘိက္ခုသံဃေနာ”တိ. အဓိဝါသေသိ ဘဂဝါ တုဏှီဘာဝေန. အထ ခေါ မေဏ္ဍကော ဂဟပတိ ဘဂဝတော အဓိဝါသနံ ဝိဒိတွာ ဘဂဝန္တံ အဘိဝါဒေတွာ ပဒက္ခိဏံ ကတွာ ပက္ကာမိ.
အထ ခေါ မေဏ္ဍကော ဂဟပတိ တဿာ ရတ္တိယာ အစ္စယေန ပဏီတံ ခါဒနီယံ ဘောဇနီယံ ပဋိယာဒါပေတွာ ဘဂဝတော ကာလံ အာရောစာပေသိ— “ကာလော, ဘန္တေ, နိဋ္ဌိတံ ဘတ္တန်”တိ. အထ ခေါ ဘဂဝါ ပုဗ္ဗဏှသမယံ နိဝါသေတွာ ပတ္တစီဝရမာဒါယ ယေန မေဏ္ဍကဿ ဂဟပတိဿ ပရိဝေသနာ တေနုပသင်္ကမိ; ဥပသင်္ကမိတွာ ပညတ္တေ အာသနေ နိသီဒိ သဒ္ဓိံ ဘိက္ခုသံဃေန. အထ ခေါ မေဏ္ဍကော ဂဟပတိ အဍ္ဎတေလသာနိ ဂေါပါလကသတာနိ အာဏာပေသိ— “တေန ဟိ, ဘဏေ, ဧကမေကံ ဓေနုံ ဂဟေတွာ ဧကမေကဿ ဘိက္ခုနော ဥပတိဋ္ဌထ တရုဏေန ခီရေန ဘောဇေဿာမာ”တိ. အထ ခေါ မေဏ္ဍကော ဂဟပတိ ဗုဒ္ဓပ္ပမုခံ ဘိက္ခုသံဃံ ပဏီတေန ခါဒနီယေန ဘောဇနီယေန သဟတ္ထာ သန္တပ္ပေသိ သမ္ပဝါရေသိ, တရုဏေန စ ခီရေန. ဘိက္ခူ ကုက္ကုစ္စာယန္တာ ခီရံ န ပဋိဂ္ဂဏှန္တိ. “ပဋိဂ္ဂဏှထ, ဘိက္ခဝေ, ပရိဘုဉ္ဇထာ”တိ. အထ ခေါ မေဏ္ဍကော ဂဟပတိ ဗုဒ္ဓပ္ပမုခံ ဘိက္ခုသံဃံ ပဏီတေန ခါဒနီယေန ဘောဇနီယေန သဟတ္ထာ သန္တပ္ပေတွာ သမ္ပဝါရေတွာ တရုဏေန စ ခီရေန ဘဂဝန္တံ ဘုတ္တာဝိံ ဩနီတပတ္တပါဏိံ ဧကမန္တံ နိသီဒိ. ဧကမန္တံ နိသိန္နော ခေါ မေဏ္ဍကော ဂဟပတိ ဘဂဝန္တံ ဧတဒဝေါစ— “သန္တိ, ဘန္တေ, မဂ္ဂါ ကန္တာရာ, အပ္ပေါဒကာ အပ္ပဘက္ခာ, န သုကရာ အပါထေယျေန ဂန္တုံ. သာဓု, ဘန္တေ, ဘဂဝါ ဘိက္ခူနံ ပါထေယျံ အနုဇာနာတူ”တိ. အထ ခေါ ဘဂဝါ မေဏ္ဍကံ ဂဟပတိံ ဓမ္မိယာ ကထာယ သန္ဒဿေတွာ သမာဒပေတွာ သမုတ္တေဇေတွာ သမ္ပဟံသေတွာ ဥဋ္ဌာယာသနာ ပက္ကာမိ.
အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ— “အနုဇာနာမိ, ဘိက္ခဝေ, ပဉ္စ ဂေါရသေ— ခီရံ, ဒဓိံ, တက္ကံ, နဝနီတံ, သပ္ပိံ. သန္တိ, ဘိက္ခဝေ, မဂ္ဂါ ကန္တာရာ အပ္ပေါဒကာ အပ္ပဘက္ခာ, န သုကရာ အပါထေယျေန ဂန္တုံ. အနုဇာနာမိ, ဘိက္ခဝေ, ပါထေယျံ ပရိယေသိတုံ တဏ္ဍုလော တဏ္ဍုလတ္ထိကေန, မုဂ္ဂေါ မုဂ္ဂတ္ထိကေန, မာသော မာသတ္ထိကေန, လောဏံ လောဏတ္ထိကေန, ဂုဠော ဂုဠတ္ထိကေန, တေလံ တေလတ္ထိကေန, သပ္ပိ သပ္ပိတ္ထိကေန. သန္တိ, ဘိက္ခဝေ, မနုဿာ, သဒ္ဓါ ပသန္နာ, တေ ကပ္ပိယကာရကာနံ ဟတ္ထေ ဟိရညံ ဥပနိက္ခိပန္တိ— ‘ဣမိနာ အယျဿ ယံ ကပ္ပိယံ တံ ဒေထာ’တိ. အနုဇာနာမိ, ဘိက္ခဝေ, ယံ တတော ကပ္ပိယံ တံ သာဒိတုံ; န တွေဝါဟံ, ဘိက္ခဝေ, ကေနစိ ပရိယာယေန ဇာတရူပရဇတံ သာဒိတဗ္ဗံ ပရိယေသိတဗ္ဗန္တိ ဝဒါမီ”တိ.