6.9 မနုဿမံသပဋိက္ခေပကထာ
အထ ခေါ ဘဂဝါ ရာဇဂဟေ ယထာဘိရန္တံ ဝိဟရိတွာ ယေန ဗာရာဏသီ တေန စာရိကံ ပက္ကာမိ. အနုပုဗ္ဗေန စာရိကံ စရမာနော ယေန ဗာရာဏသီ တဒဝသရိ. တတြ သုဒံ ဘဂဝါ ဗာရာဏသိယံ ဝိဟရတိ ဣသိပတနေ မိဂဒါယေ. တေန ခေါ ပန သမယေန ဗာရာဏသိယံ သုပ္ပိယော စ ဥပါသကော သုပ္ပိယာ စ ဥပါသိကာ ဥဘတောပသန္နာ ဟောန္တိ, ဒါယကာ, ကာရကာ, သံဃုပဋ္ဌာကာ. အထ ခေါ သုပ္ပိယာ ဥပါသိကာ အာရာမံ ဂန္တွာ ဝိဟာရေန ဝိဟာရံ ပရိဝေဏေန ပရိဝေဏံ ဥပသင်္ကမိတွာ ဘိက္ခူ ပုစ္ဆတိ— “ကော, ဘန္တေ, ဂိလာနော, ကဿ ကိံ အာဟရိယတူ”တိ? တေန ခေါ ပန သမယေန အညတရေန ဘိက္ခုနာ ဝိရေစနံ ပီတံ ဟောတိ. အထ ခေါ သော ဘိက္ခု သုပ္ပိယံ ဥပါသိကံ ဧတဒဝေါစ— “မယာ ခေါ, ဘဂိနိ, ဝိရေစနံ ပီတံ. အတ္ထော မေ ပဋိစ္ဆာဒနီယေနာ”တိ. “သုဋ္ဌု, အယျ, အာဟရိယိဿတီ”တိ ဃရံ ဂန္တွာ အန္တေဝါသိံ အာဏာပေသိ— “ဂစ္ဆ, ဘဏေ, ပဝတ္တမံသံ ဇာနာဟီ”တိ. “ဧဝံ, အယျေ”တိ ခေါ သော ပုရိသော သုပ္ပိယာယ ဥပါသိကာယ ပဋိဿုဏိတွာ ကေဝလကပ္ပံ ဗာရာဏသိံ အာဟိဏ္ဍန္တော န အဒ္ဒသ ပဝတ္တမံသံ.
အထ ခေါ သော ပုရိသော ယေန သုပ္ပိယာ ဥပါသိကာ တေနုပသင်္ကမိ, ဥပသင်္ကမိတွာ သုပ္ပိယံ ဥပါသိကံ ဧတဒဝေါစ— “နတ္ထယျေ ပဝတ္တမံသံ. မာဃာတော အဇ္ဇာ”တိ. အထ ခေါ သုပ္ပိယာယ ဥပါသိကာယ ဧတဒဟောသိ— “တဿ ခေါ ဂိလာနဿ ဘိက္ခုနော ပဋိစ္ဆာဒနီယံ အလဘန္တဿ အာဗာဓော ဝါ အဘိဝဍ္ဎိဿတိ, ကာလံကိရိယာ ဝါ ဘဝိဿတိ. န ခေါ မေတံ ပတိရူပံ ယာဟံ ပဋိဿုဏိတွာ န ဟရာပေယျန်”တိ. ပေါတ္ထနိကံ ဂဟေတွာ ဦရုမံသံ ဥက္ကန္တိတွာ ဒါသိယာ အဒါသိ— “ဟန္ဒ, ဇေ, ဣမံ မံသံ သမ္ပာဒေတွာ အမုကသ္မိံ ဝိဟာရေ ဘိက္ခု ဂိလာနော, တဿ ဒဇ္ဇာဟိ. ယော စ မံ ပုစ္ဆတိ, ‘ဂိလာနာ’တိ ပဋိဝေဒေဟီ”တိ ဥတ္တရာသင်္ဂေန ဦရုံ ဝေဌေတွာ ဩဝရကံ ပဝိသိတွာ မဉ္စကေ နိပဇ္ဇိ. အထ ခေါ သုပ္ပိယော ဥပါသကော ဃရံ ဂန္တွာ ဒါသိံ ပုစ္ဆိ— “ကဟံ သုပ္ပိယာ”တိ? “ဧသာယျ, ဩဝရကေ နိပန္နာ”တိ.
အထ ခေါ သုပ္ပိယော ဥပါသကော ယေန သုပ္ပိယာ ဥပါသိကာ တေနုပသင်္ကမိ, ဥပသင်္ကမိတွာ သုပ္ပိယံ ဥပါသိကံ ဧတဒဝေါစ— “ကိဿ နိပန္နာသီ”တိ? “ဂိလာနာမှီ”တိ. “ကိံ တေ အာဗာဓော”တိ? အထ ခေါ သုပ္ပိယာ ဥပါသိကာ သုပ္ပိယဿ ဥပါသကဿ ဧတမတ္ထံ အာရောစေသိ. အထ ခေါ သုပ္ပိယော ဥပါသကော— “အစ္ဆရိယံ ဝတ ဘော, အဗ္ဘုတံ ဝတ ဘော. ယာဝ သဒ္ဓါယံ သုပ္ပိယာ ပသန္နာ, ယတြ ဟိ နာမ အတ္တနောပိ မံသာနိ ပရိစ္စတ္တာနိ. ကိမ္ပိမာယ အညံ ကိဉ္စိ အဒေယျံ ဘဝိဿတီ”တိ— ဟဋ္ဌော ဥဒဂ္ဂေါ ယေန ဘဂဝါ တေနုပသင်္ကမိ, ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ သုပ္ပိယော ဥပါသကော ဘဂဝန္တံ ဧတဒဝေါစ— “အဓိဝါသေတု မေ, ဘန္တေ, ဘဂဝါ သွာတနာယ ဘတ္တံ, သဒ္ဓိံ ဘိက္ခုသံဃေနာ”တိ. အဓိဝါသေသိ ဘဂဝါ တုဏှီဘာဝေန. အထ ခေါ သုပ္ပိယော ဥပါသကော ဘဂဝတော အဓိဝါသနံ ဝိဒိတွာ ဥဋ္ဌာယာသနာ ဘဂဝန္တံ အဘိဝါဒေတွာ ပဒက္ခိဏံ ကတွာ ပက္ကာမိ. အထ ခေါ သုပ္ပိယော ဥပါသကော တဿာ ရတ္တိယာ အစ္စယေန ပဏီတံ ခါဒနီယံ ဘောဇနီယံ ပဋိယာဒါပေတွာ ဘဂဝတော ကာလံ အာရောစာပေသိ— “ကာလော, ဘန္တေ, နိဋ္ဌိတံ ဘတ္တန်”တိ.
အထ ခေါ ဘဂဝါ ပုဗ္ဗဏှသမယံ နိဝါသေတွာ ပတ္တစီဝရမာဒါယ ယေန သုပ္ပိယဿ ဥပါသကဿ နိဝေသနံ တေနုပသင်္ကမိ, ဥပသင်္ကမိတွာ ပညတ္တေ အာသနေ နိသီဒိ, သဒ္ဓိံ ဘိက္ခုသံဃေန. အထ ခေါ သုပ္ပိယော ဥပါသကော ယေန ဘဂဝါ တေနုပသင်္ကမိ, ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ အဋ္ဌာသိ. ဧကမန္တံ ဌိတံ ခေါ သုပ္ပိယံ ဥပါသကံ ဘဂဝါ ဧတဒဝေါစ— “ကဟံ, သုပ္ပိယာ”တိ? “ဂိလာနာ, ဘဂဝါ”တိ. “တေန ဟိ အာဂစ္ဆတူ”တိ. “န, ဘဂဝါ, ဥဿဟတီ”တိ. “တေန ဟိ ပရိဂ္ဂဟေတွာပိ အာနေထာ”တိ. အထ ခေါ သုပ္ပိယော ဥပါသကော သုပ္ပိယံ ဥပါသိကံ ပရိဂ္ဂဟေတွာ အာနေသိ. တဿာ သဟ ဒဿနေန ဘဂဝတော တာဝ မဟာဝဏော ရုဠှော အဟောသိ သုစ္ဆဝိလောမဇာတော. အထ ခေါ သုပ္ပိယော စ ဥပါသကော သုပ္ပိယာ စ ဥပါသိကာ— “အစ္ဆရိယံ ဝတ ဘော, အဗ္ဘုတံ ဝတ ဘော. တထာဂတဿ မဟိဒ္ဓိကတာ မဟာနုဘာဝတာ, ယတြ ဟိ နာမ သဟ ဒဿနေန ဘဂဝတော တာဝ မဟာဝဏော ရုဠှော ဘဝိဿတိ သုစ္ဆဝိလောမဇာတော”တိ— ဟဋ္ဌာ ဥဒဂ္ဂါ ဗုဒ္ဓပ္ပမုခံ ဘိက္ခုသံဃံ ပဏီတေန ခါဒနီယေန ဘောဇနီယေန သဟတ္ထာ သန္တပ္ပေတွာ သမ္ပဝါရေတွာ ဘဂဝန္တံ ဘုတ္တာဝိံ ဩနီတပတ္တပါဏိံ ဧကမန္တံ နိသီဒိံသု. အထ ခေါ ဘဂဝါ သုပ္ပိယဉ္စ ဥပါသကံ သုပ္ပိယဉ္စ ဥပါသိကံ ဓမ္မိယာ ကထာယ သန္ဒဿေတွာ သမာဒပေတွာ သမုတ္တေဇေတွာ သမ္ပဟံသေတွာ ဥဋ္ဌာယာသနာ ပက္ကာမိ.
အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ ဘိက္ခူ ပဋိပုစ္ဆိ— “ကော, ဘိက္ခဝေ, သုပ္ပိယံ ဥပါသိကံ မံသံ ဝိညာပေသီ”တိ? ဧဝံ ဝုတ္တေ, သော ဘိက္ခု ဘဂဝန္တံ ဧတဒဝေါစ— “အဟံ ခေါ, ဘန္တေ, သုပ္ပိယံ ဥပါသိကံ မံသံ ဝိညာပေသိန်”တိ. “အာဟရိယိတ္ထ, ဘိက္ခူ”တိ? “အာဟရိယိတ္ထ, ဘဂဝါ”တိ. “ပရိဘုဉ္ဇိ တွံ, ဘိက္ခူ”တိ? “ပရိဘုဉ္ဇာမဟံ, ဘဂဝါ”တိ. “ပဋိဝေက္ခိ တွံ, ဘိက္ခူ”တိ? “နာဟံ, ဘဂဝါ, ပဋိဝေက္ခိန်”တိ. ဝိဂရဟိ ဗုဒ္ဓေါ ဘဂဝါ …ပေ… ကထဉှိ နာမ တွံ, မောဃပုရိသ, အပ္ပဋိဝေက္ခိတွာ မံသံ ပရိဘုဉ္ဇိဿသိ. မနုဿမံသံ ခေါ တယာ, မောဃပုရိသ, ပရိဘုတ္တံ. နေတံ, မောဃပုရိသ, အပ္ပသန္နာနံ ဝါ ပသာဒါယ …ပေ… ဝိဂရဟိတွာ ဓမ္မိံ ကထံ ကတွာ ဘိက္ခူ အာမန္တေသိ— “သန္တိ, ဘိက္ခဝေ, မနုဿာ သဒ္ဓါ ပသန္နာ, တေဟိ အတ္တနောပိ မံသာနိ ပရိစ္စတ္တာနိ. န, ဘိက္ခဝေ, မနုဿမံသံ ပရိဘုဉ္ဇိတဗ္ဗံ. ယော ပရိဘုဉ္ဇေယျ, အာပတ္တိ ထုလ္လစ္စယဿ. န စ, ဘိက္ခဝေ, အပ္ပဋိဝေက္ခိတွာ မံသံ ပရိဘုဉ္ဇိတဗ္ဗံ. ယော ပရိဘုဉ္ဇေယျ, အာပတ္တိ ဒုက္ကဋဿာ”တိ.