7.12 အပဝိလာယနနဝက
ဘိက္ခု အတ္ထတကထိနော ဒိသင်္ဂမိကော ပက္ကမတိ စီဝရပဋိဝီသံ အပဝိလာယမာနော. တမေနံ ဒိသံဂတံ ဘိက္ခူ ပုစ္ဆန္တိ— “ကဟံ တွံ, အာဝုသော, ဝဿံဝုဋ္ဌော, ကတ္ထ စ တေ စီဝရပဋိဝီသော”တိ? သော ဧဝံ ဝဒေတိ— “အမုကသ္မိံ အာဝါသေ ဝဿံဝုဋ္ဌောမှိ. တတ္ထ စ မေ စီဝရပဋိဝီသော”တိ. တေ ဧဝံ ဝဒန္တိ— “ဂစ္ဆာဝုသော, တံ စီဝရံ အာဟရ, မယံ တေ ဣဓ စီဝရံ ကရိဿာမာ”တိ. သော တံ အာဝါသံ ဂန္တွာ ဘိက္ခူ ပုစ္ဆတိ— “ကဟံ မေ, အာဝုသော, စီဝရပဋိဝီသော”တိ? တေ ဧဝံ ဝဒန္တိ— “အယံ တေ, အာဝုသော, စီဝရပဋိဝီသော; ကဟံ ဂမိဿသီ”တိ? သော ဧဝံ ဝဒေတိ— “အမုကံ နာမ အာဝါသံ ဂမိဿာမိ, တတ္ထ မေ ဘိက္ခူ စီဝရံ ကရိဿန္တီ”တိ. တေ ဧဝံ ဝဒန္တိ— “အလံ, အာဝုသော, မာ အဂမာသိ. မယံ တေ ဣဓ စီဝရံ ကရိဿာမာ”တိ. တဿ ဧဝံ ဟောတိ— “ဣဓေဝိမံ စီဝရံ ကာရေဿံ, န ပစ္စေဿန်”တိ. သော တံ စီဝရံ ကာရေတိ. တဿ ဘိက္ခုနော နိဋ္ဌာနန္တိကော ကထိနုဒ္ဓါရော. (1)
ဘိက္ခု အတ္ထတကထိနော ဒိသင်္ဂမိကော ပက္ကမတိ …ပေ… “နေဝိမံ စီဝရံ ကာရေဿံ, န ပစ္စေဿန်”တိ. တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော. (2)
ဘိက္ခု အတ္ထတကထိနော ဒိသင်္ဂမိကော ပက္ကမတိ …ပေ… “ဣဓေဝိမံ စီဝရံ ကာရေဿံ, န ပစ္စေဿန်”တိ. သော တံ စီဝရံ ကာရေတိ. တဿ တံ စီဝရံ ကယိရမာနံ နဿတိ. တဿ ဘိက္ခုနော နာသနန္တိကော ကထိနုဒ္ဓါရော. (3)
ဘိက္ခု အတ္ထတကထိနော ဒိသင်္ဂမိကော ပက္ကမတိ စီဝရပဋိဝီသံ အပဝိလာယမာနော. တမေနံ ဒိသံဂတံ ဘိက္ခူ ပုစ္ဆန္တိ— “ကဟံ တွံ, အာဝုသော, ဝဿံဝုဋ္ဌော, ကတ္ထ စ တေ စီဝရပဋိဝီသော”တိ? သော ဧဝံ ဝဒေတိ— “အမုကသ္မိံ အာဝါသေ ဝဿံဝုဋ္ဌောမှိ, တတ္ထ စ မေ စီဝရပဋိဝီသော”တိ. တေ ဧဝံ ဝဒန္တိ— “ဂစ္ဆာဝုသော, တံ စီဝရံ အာဟရ, မယံ တေ ဣဓ စီဝရံ ကရိဿာမာ”တိ. သော တံ အာဝါသံ ဂန္တွာ ဘိက္ခူ ပုစ္ဆတိ— “ကဟံ မေ, အာဝုသော, စီဝရပဋိဝီသော”တိ? တေ ဧဝံ ဝဒန္တိ— “အယံ တေ, အာဝုသော, စီဝရပဋိဝီသော”တိ. သော တံ စီဝရံ အာဒါယ တံ အာဝါသံ ဂစ္ဆတိ. တမေနံ အန္တရာမဂ္ဂေ ဘိက္ခူ ပုစ္ဆန္တိ— “အာဝုသော, ကဟံ ဂမိဿသီ”တိ? သော ဧဝံ ဝဒေတိ— “အမုကံ နာမ အာဝါသံ ဂမိဿာမိ, တတ္ထ မေ ဘိက္ခူ စီဝရံ ကရိဿန္တီ”တိ. တေ ဧဝံ ဝဒန္တိ— “အလံ, အာဝုသော, မာ အဂမာသိ, မယံ တေ ဣဓ စီဝရံ ကရိဿာမာ”တိ. တဿ ဧဝံ ဟောတိ— “ဣဓေဝိမံ စီဝရံ ကာရေဿံ န ပစ္စေဿန်”တိ. သော တံ စီဝရံ ကာရေတိ. တဿ ဘိက္ခုနော နိဋ္ဌာနန္တိကော ကထိနုဒ္ဓါရော. (4)
ဘိက္ခု အတ္ထတကထိနော ဒိသင်္ဂမိကော ပက္ကမတိ စီဝရပဋိဝီသံ အပဝိလာယမာနော. တမေနံ ဒိသံဂတံ ဘိက္ခူ ပုစ္ဆန္တိ— “ကဟံ တွံ, အာဝုသော, ဝဿံဝုဋ္ဌော, ကတ္ထ စ တေ စီဝရပဋိဝီသော”တိ? သော ဧဝံ ဝဒေတိ— “အမုကသ္မိံ အာဝါသေ ဝဿံဝုဋ္ဌောမှိ, တတ္ထ စ မေ စီဝရပဋိဝီသော”တိ. တေ ဧဝံ ဝဒန္တိ— “ဂစ္ဆာဝုသော, တံ စီဝရံ အာဟရ, မယံ တေ ဣဓ စီဝရံ ကရိဿာမာ”တိ. သော တံ အာဝါသံ ဂန္တွာ ဘိက္ခူ ပုစ္ဆတိ— “ကဟံ မေ, အာဝုသော, စီဝရပဋိဝီသော”တိ? တေ ဧဝံ ဝဒန္တိ— “အယံ တေ, အာဝုသော, စီဝရပဋိဝီသော”တိ. သော တံ စီဝရံ အာဒါယ တံ အာဝါသံ ဂစ္ဆတိ. တမေနံ အန္တရာမဂ္ဂေ ဘိက္ခူ ပုစ္ဆန္တိ— “အာဝုသော, ကဟံ ဂမိဿသီ”တိ? သော ဧဝံ ဝဒေတိ— “အမုကံ နာမ အာဝါသံ ဂမိဿာမိ, တတ္ထ မေ ဘိက္ခူ စီဝရံ ကရိဿန္တီ”တိ. တေ ဧဝံ ဝဒန္တိ— “အလံ, အာဝုသော, မာ အဂမာသိ, မယံ တေ ဣဓ စီဝရံ ကရိဿာမာ”တိ. တဿ ဧဝံ ဟောတိ— “နေဝိမံ စီဝရံ ကာရေဿံ, န ပစ္စေဿန်”တိ. တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော. (5)
ဘိက္ခု အတ္ထတကထိနော ဒိသင်္ဂမိကော ပက္ကမတိ …ပေ… “ဣဓေဝိမံ စီဝရံ ကာရေဿံ, န ပစ္စေဿန်”တိ. သော တံ စီဝရံ ကာရေတိ. တဿ တံ စီဝရံ ကယိရမာနံ နဿတိ. တဿ ဘိက္ခုနော နာသနန္တိကော ကထိနုဒ္ဓါရော. (6)
ဘိက္ခု အတ္ထတကထိနော ဒိသင်္ဂမိကော ပက္ကမတိ စီဝရပဋိဝီသံ အပဝိလာယမာနော. တမေနံ ဒိသံဂတံ ဘိက္ခူ ပုစ္ဆန္တိ— “ကဟံ တွံ, အာဝုသော, ဝဿံဝုဋ္ဌော, ကတ္ထ စ တေ စီဝရပဋိဝီသော”တိ? သော ဧဝံ ဝဒေတိ— “အမုကသ္မိံ အာဝါသေ ဝဿံဝုဋ္ဌောမှိ, တတ္ထ စ မေ စီဝရပဋိဝီသော”တိ. တေ ဧဝံ ဝဒန္တိ— “ဂစ္ဆာဝုသော, တံ စီဝရံ အာဟရ, မယံ တေ ဣဓ စီဝရံ ကရိဿာမာ”တိ. သော တံ အာဝါသံ ဂန္တွာ ဘိက္ခူ ပုစ္ဆတိ— “ကဟံ မေ, အာဝုသော, စီဝရပဋိဝီသော”တိ? တေ ဧဝံ ဝဒန္တိ— “အယံ တေ, အာဝုသော, စီဝရပဋိဝီသော”တိ. သော တံ စီဝရံ အာဒါယ တံ အာဝါသံ ဂစ္ဆတိ. တဿ တံ အာဝါသံ ဂတဿ ဧဝံ ဟောတိ— “ဣဓေဝိမံ စီဝရံ ကာရေဿံ, န ပစ္စေဿန်”တိ. သော တံ စီဝရံ ကာရေတိ. တဿ ဘိက္ခုနော နိဋ္ဌာနန္တိကော ကထိနုဒ္ဓါရော. (7)
ဘိက္ခု အတ္ထတကထိနော ဒိသင်္ဂမိကော ပက္ကမတိ …ပေ… “နေဝိမံ စီဝရံ ကာရေဿံ, န ပစ္စေဿန်”တိ. တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော. (8)
ဘိက္ခု အတ္ထတကထိနော ဒိသင်္ဂမိကော ပက္ကမတိ …ပေ… “ဣဓေဝိမံ စီဝရံ ကာရေဿံ, န ပစ္စေဿန်”တိ. သော တံ စီဝရံ ကာရေတိ. တဿ တံ စီဝရံ ကယိရမာနံ နဿတိ. တဿ ဘိက္ခုနော နာသနန္တိကော ကထိနုဒ္ဓါရော. (9)
အပဝိလာယနနဝကံ နိဋ္ဌိတံ.