7.14 ပလိဗောဓာပလိဗောဓကထာ
ဒွေမေ, ဘိက္ခဝေ, ကထိနဿ ပလိဗောဓာ, ဒွေ အပလိဗောဓာ. ကတမေ စ, ဘိက္ခဝေ, ဒွေ ကထိနဿ ပလိဗောဓာ? အာဝါသပလိဗောဓော စ စီဝရပလိဗောဓော စ. ကထဉ္စ, ဘိက္ခဝေ, အာဝါသပလိဗောဓော ဟောတိ? ဣဓ, ဘိက္ခဝေ, ဘိက္ခု ဝသတိ ဝါ တသ္မိံ အာဝါသေ, သာပေက္ခော ဝါ ပက္ကမတိ “ပစ္စေဿန်”တိ. ဧဝံ ခေါ, ဘိက္ခဝေ, အာဝါသပလိဗောဓော ဟောတိ. ကထဉ္စ, ဘိက္ခဝေ, စီဝရပလိဗောဓော ဟောတိ? ဣဓ, ဘိက္ခဝေ, ဘိက္ခုနော စီဝရံ အကတံ ဝါ ဟောတိ ဝိပ္ပကတံ ဝါ, စီဝရာသာ ဝါ အနုပစ္ဆိန္နာ. ဧဝံ ခေါ, ဘိက္ခဝေ, စီဝရပလိဗောဓော ဟောတိ. ဣမေ ခေါ, ဘိက္ခဝေ, ဒွေ ကထိနဿ ပလိဗောဓာ.
ကတမေ စ, ဘိက္ခဝေ, ဒွေ ကထိနဿ အပလိဗောဓာ? အာဝါသအပလိဗောဓော စ စီဝရအပလိဗောဓော စ. ကထဉ္စ, ဘိက္ခဝေ, အာဝါသအပလိဗောဓော ဟောတိ? ဣဓ, ဘိက္ခဝေ, ဘိက္ခု ပက္ကမတိ တမှာ အာဝါသာ စတ္တေန ဝန္တေန မုတ္တေန အနပေက္ခော “န ပစ္စေဿန်”တိ. ဧဝံ ခေါ, ဘိက္ခဝေ, အာဝါသအပလိဗောဓော ဟောတိ. ကထဉ္စ, ဘိက္ခဝေ, စီဝရအပလိဗောဓော ဟောတိ? ဣဓ, ဘိက္ခဝေ, ဘိက္ခုနော စီဝရံ ကတံ ဝါ ဟောတိ, နဋ္ဌံ ဝါ ဝိနဋ္ဌံ ဝါ ဒဍ္ဎံ ဝါ, စီဝရာသာ ဝါ ဥပစ္ဆိန္နာ. ဧဝံ ခေါ, ဘိက္ခဝေ, စီဝရအပလိဗောဓော ဟောတိ. ဣမေ ခေါ, ဘိက္ခဝေ, ဒွေ ကထိနဿ အပလိဗောဓာ”တိ.
ကထိနက္ခန္ဓကော နိဋ္ဌိတော သတ္တမော.
တဿုဒ္ဒါနံ
တိံသ ပါဝေယျကာ ဘိက္ခူ,
သာကေတုက္ကဏ္ဌိတာ ဝသုံ;
ဝဿံဝုဋ္ဌောကပုဏ္ဏေဟိ,
အဂမုံ ဇိနဒဿနံ.
ဣဒံ ဝတ္ထု ကထိနဿ,_
ကပ္ပိဿန္တိ စ ပဉ္စကာ;
အနာမန္တာ အသမာစာရာ,
တထေဝ ဂဏဘောဇနံ.
ယာဝဒတ္ထဉ္စ ဥပ္ပါဒေါ,
အတ္ထတာနံ ဘဝိဿတိ;
ဉတ္တိ ဧဝတ္ထတဉ္စေဝ,
ဧဝဉ္စေဝ အနတ္ထတံ.
ဥလ္လိခိ ဓောဝနာ စေဝ,_
ဝိစာရဏဉ္စ ဆေဒနံ;
ဗန္ဓနော ဝဋ္ဋိ ကဏ္ဍုသ,
ဒဠှီကမ္မာနုဝါတိကာ.
ပရိဘဏ္ဍံ ဩဝဒ္ဓေယျံ,
မဒ္ဒနာ နိမိတ္တံ ကထာ;
ကုက္ကု သန္နိဓိ နိဿဂ္ဂိ,
န ကပ္ပညတြ တေ တယော.
အညတြ ပဉ္စာတိရေကေ,
သဉ္ဆိန္နေန သမဏ္ဍလီ;
နာညတြ ပုဂ္ဂလာ သမ္မာ,
နိဿီမဋ္ဌောနုမောဒတိ.
ကထိနာနတ္ထတံ ဟောတိ,
ဧဝံ ဗုဒ္ဓေန ဒေသိတံ;
အဟတာကပ္ပပိလောတိ,
ပံသု ပါပဏိကာယ စ.
အနိမိတ္တာပရိကထာ,
အကုက္ကု စ အသန္နိဓိ;
အနိဿဂ္ဂိ ကပ္ပကတေ,
တထာ တိစီဝရေန စ.
ပဉ္စကေ ဝါတိရေကေ ဝါ,
ဆိန္နေ သမဏ္ဍလီကတေ;
ပုဂ္ဂလဿတ္ထာရာ သမ္မာ,
သီမဋ္ဌော အနုမောဒတိ.
ဧဝံ ကထိနတ္ထရဏံ,
ဥဗ္ဘာရဿဋ္ဌမာတိကာ;_
ပက္ကမနန္တိ နိဋ္ဌာနံ,
သန္နိဋ္ဌာနဉ္စ နာသနံ.
သဝနံ အာသာဝစ္ဆေဒိ,
သီမာ သဟုဗ္ဘာရဋ္ဌမီ;
ကတစီဝရမာဒါယ,
“န ပစ္စေဿန်”တိ ဂစ္ဆတိ.
တဿ တံ ကထိနုဒ္ဓါရော,
ဟောတိ ပက္ကမနန္တိကော;
အာဒါယ စီဝရံ ယာတိ,
နိဿီမေ ဣဒံ စိန္တယိ.
“ကာရေဿံ န ပစ္စေဿန်”တိ,
နိဋ္ဌာနေ ကထိနုဒ္ဓါရော;
အာဒါယ နိဿီမံ နေဝ,
“န ပစ္စေဿန်”တိ မာနသော.
တဿ တံ ကထိနုဒ္ဓါရော,
သန္နိဋ္ဌာနန္တိကော ဘဝေ;
အာဒါယ စီဝရံ ယာတိ,
နိဿီမေ ဣဒံ စိန္တယိ.
“ကာရေဿံ န ပစ္စေဿန်”တိ,
ကယိရံ တဿ နဿတိ;
တဿ တံ ကထိနုဒ္ဓါရော,
ဘဝတိ နာသနန္တိကော.
အာဒါယ ယာတိ “ပစ္စေဿံ”,
ဗဟိ ကာရေတိ စီဝရံ;
ကတစီဝရော သုဏာတိ,
ဥဗ္ဘတံ ကထိနံ တဟိံ._
တဿ တံ ကထိနုဒ္ဓါရော,
ဘဝတိ သဝနန္တိကော;
အာဒါယ ယာတိ “ပစ္စေဿံ”,
ဗဟိ ကာရေတိ စီဝရံ.
ကတစီဝရော ဗဟိဒ္ဓါ,
နာမေတိ ကထိနုဒ္ဓါရံ;
တဿ တံ ကထိနုဒ္ဓါရော,
သီမာတိက္ကန္တိကော ဘဝေ.
အာဒါယ ယာတိ “ပစ္စေဿံ”,
ဗဟိ ကာရေတိ စီဝရံ;
ကတစီဝရော ပစ္စေဿံ,
သမ္ဘောတိ ကထိနုဒ္ဓါရံ.
တဿ တံ ကထိနုဒ္ဓါရော,
သဟ ဘိက္ခူဟိ ဇာယတိ;
အာဒါယ စ သမာဒါယ,
သတ္တသတ္တဝိဓာ ဂတိ.
ပက္ကမနန္တိကာ နတ္ထိ,
ဆက္ကေ ဝိပ္ပကတေ ဂတိ;
အာဒါယ နိဿီမဂတံ,
ကာရေဿံ ဣတိ ဇာယတိ.
နိဋ္ဌာနံ သန္နိဋ္ဌာနဉ္စ,
နာသနဉ္စ ဣမေ တယော;
အာဒါယ “န ပစ္စေဿန်”တိ,
ဗဟိသီမေ ကရောမိတိ.
နိဋ္ဌာနံ သန္နိဋ္ဌာနမ္ပိ,
နာသနမ္ပိ ဣဒံ တယော;
အနဓိဋ္ဌိတေန နေဝဿ,
ဟေဋ္ဌာ တီဏိ နယာဝိဓိ.
အာဒါယ ယာတိ ပစ္စေဿံ,
ဗဟိသီမေ ကရောမိတိ;
“န ပစ္စေဿန်”တိ ကာရေတိ,
နိဋ္ဌာနေ ကထိနုဒ္ဓါရော.
သန္နိဋ္ဌာနံ နာသနဉ္စ,
သဝနသီမာတိက္ကမာ;
သဟ ဘိက္ခူဟိ ဇာယေထ,
ဧဝံ ပန္နရသံ ဂတိ.
သမာဒါယ ဝိပ္ပကတာ,
သမာဒါယ ပုနာ တထာ;
ဣမေ တေ စတုရော ဝါရာ,_
သဗ္ဗေ ပန္နရသဝိဓိ.
အနာသာယ စ အာသာယ,
ကရဏီယော စ တေ တယော;
နယတော တံ ဝိဇာနေယျ,
တယော ဒွါဒသ ဒွါဒသ.
အပဝိလာနာ နဝေတ္ထ,
ဖာသု ပဉ္စဝိဓာ တဟိံ;
ပလိဗောဓာပလိဗောဓာ,
ဥဒ္ဒါနံ နယတော ကတန္တိ._
ဣမမှိ ခန္ဓကေ ဝတ္ထူ ဒေါဠသကပေယျာလမုခါနိ ဧကသတံ အဋ္ဌာရသ.
ကထိနက္ခန္ဓကော နိဋ္ဌိတော.