8.14 စီဝရရဇနကထာ
တေန ခေါ ပန သမယေန ဘိက္ခူ ဆကဏေနပိ ပဏ္ဍုမတ္တိကာယပိ စီဝရံ ရဇန္တိ. စီဝရံ ဒုဗ္ဗဏ္ဏံ ဟောတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ဆ ရဇနာနိ— မူလရဇနံ, ခန္ဓရဇနံ, တစရဇနံ, ပတ္တရဇနံ, ပုပ္ဖရဇနံ, ဖလရဇနန်”တိ.
တေန ခေါ ပန သမယေန ဘိက္ခူ သီတုဒကာယ စီဝရံ ရဇန္တိ. စီဝရံ ဒုဂ္ဂန္ဓံ ဟောတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ရဇနံ ပစိတုံ စုလ္လံ ရဇနကုမ္ဘိန်”တိ. ရဇနံ ဥတ္တရိယတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ဥတ္တရာဠုမ္ပံ ဗန္ဓိတုန်”တိ.
တေန ခေါ ပန သမယေန ဘိက္ခူ န ဇာနန္တိ ရဇနံ ပက္ကံ ဝါ အပက္ကံ ဝါ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ဥဒကေ ဝါ နခပိဋ္ဌိကာယ ဝါ ထေဝကံ ဒါတုန်”တိ.
တေန ခေါ ပန သမယေန ဘိက္ခူ ရဇနံ ဩရောပေန္တာ ကုမ္ဘိံ အာဝိဉ္ဆန္တိ. ကုမ္ဘီ ဘိဇ္ဇတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ရဇနုဠုင်္ကံ ဒဏ္ဍကထာလကန်”တိ.
တေန ခေါ ပန သမယေန ဘိက္ခူနံ ရဇနဘာဇနံ န သံဝိဇ္ဇတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ရဇနကောလမ္ဗံ ရဇနဃဋန်”တိ.
တေန ခေါ ပန သမယေန ဘိက္ခူ ပါတိယာပိ ပတ္တေပိ စီဝရံ ဩမဒ္ဒန္တိ. စီဝရံ ပရိဘိဇ္ဇတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ရဇနဒေါဏိကန်”တိ.
တေန ခေါ ပန သမယေန ဘိက္ခူ ဆမာယ စီဝရံ ပတ္ထရန္တိ. စီဝရံ ပံသုကိတံ ဟောတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, တိဏသန္ထာရကန်”တိ.
တိဏသန္ထာရကော ဥပစိကာဟိ ခဇ္ဇတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, စီဝရဝံသံ စီဝရရဇ္ဇုန်”တိ.
မဇ္ဈေန လဂ္ဂေန္တိ. ရဇနံ ဥဘတော ဂလတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ကဏ္ဏေ ဗန္ဓိတုန်”တိ.
ကဏ္ဏော ဇီရတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ကဏ္ဏသုတ္တကန်”တိ.
ရဇနံ ဧကတော ဂလတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, သမ္ပရိဝတ္တကံ သမ္ပရိဝတ္တကံ ရဇေတုံ, န စ အစ္ဆိန္နေ ထေဝေ ပက္ကမိတုန်”တိ.
တေန ခေါ ပန သမယေန စီဝရံ ပတ္ထိန္နံ ဟောတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ဥဒကေ ဩသာရေတုန်”တိ.
တေန ခေါ ပန သမယေန စီဝရံ ဖရုသံ ဟောတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ပါဏိနာ အာကောဋေတုန်”တိ.
တေန ခေါ ပန သမယေန ဘိက္ခူ အစ္ဆိန္နကာနိ စီဝရာနိ ဓာရေန္တိ ဒန္တကာသာဝါနိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ— “သေယျထာပိ နာမ ဂိဟီ ကာမဘောဂိနော”တိ. ဘဂဝတော ဧတမတ္ထံ အာရောစေသုံ. “န, ဘိက္ခဝေ, အစ္ဆိန္နကာနိ စီဝရာနိ ဓာရေတဗ္ဗာနိ. ယော ဓာရေယျ, အာပတ္တိ ဒုက္ကဋဿာ”တိ.