8.16 တိစီဝရာနုဇာနန
အထ ခေါ ဘဂဝါ ရာဇဂဟေ ယထာဘိရန္တံ ဝိဟရိတွာ ယေန ဝေသာလီ တေန စာရိကံ ပက္ကာမိ. အဒ္ဒသ ဘဂဝါ အန္တရာ စ ရာဇဂဟံ အန္တရာ စ ဝေသာလိံ အဒ္ဓါနမဂ္ဂပ္ပဋိပန္နော သမ္ဗဟုလေ ဘိက္ခူ စီဝရေဟိ ဥဗ္ဘဏ္ဍိတေ သီသေပိ စီဝရဘိသိံ ကရိတွာ ခန္ဓေပိ စီဝရဘိသိံ ကရိတွာ ကဋိယာပိ စီဝရဘိသိံ ကရိတွာ အာဂစ္ဆန္တေ, ဒိသွာန ဘဂဝတော ဧတဒဟောသိ— “အတိလဟုံ ခေါ ဣမေ မောဃပုရိသာ စီဝရေ ဗာဟုလ္လာယ အာဝတ္တာ. ယန္နူနာဟံ ဘိက္ခူနံ စီဝရေ သီမံ ဗန္ဓေယျံ, မရိယာဒံ ဌပေယျန်”တိ. အထ ခေါ ဘဂဝါ အနုပုဗ္ဗေန စာရိကံ စရမာနော ယေန ဝေသာလီ တဒဝသရိ. တတြ သုဒံ ဘဂဝါ ဝေသာလိယံ ဝိဟရတိ ဂေါတမကေ စေတိယေ. တေန ခေါ ပန သမယေန ဘဂဝါ သီတာသု ဟေမန္တိကာသု ရတ္တီသု အန္တရဋ္ဌကာသု ဟိမပါတသမယေ ရတ္တိံ အဇ္ဈောကာသေ ဧကစီဝရော နိသီဒိ. န ဘဂဝန္တံ သီတံ အဟောသိ. နိက္ခန္တေ ပဌမေ ယာမေ သီတံ ဘဂဝန္တံ အဟောသိ. ဒုတိယံ ဘဂဝါ စီဝရံ ပါရုပိ. န ဘဂဝန္တံ သီတံ အဟောသိ. နိက္ခန္တေ မဇ္ဈိမေ ယာမေ သီတံ ဘဂဝန္တံ အဟောသိ. တတိယံ ဘဂဝါ စီဝရံ ပါရုပိ. န ဘဂဝန္တံ သီတံ အဟောသိ. နိက္ခန္တေ ပစ္ဆိမေ ယာမေ ဥဒ္ဓသ္တေ အရုဏေ နန္ဒိမုခိယာ ရတ္တိယာ သီတံ ဘဂဝန္တံ အဟောသိ. စတုတ္ထံ ဘဂဝါ စီဝရံ ပါရုပိ. န ဘဂဝန္တံ သီတံ အဟောသိ. အထ ခေါ ဘဂဝတော ဧတဒဟောသိ— “ယေပိ ခေါ တေ ကုလပုတ္တာ ဣမသ္မိံ ဓမ္မဝိနယေ သီတာလုကာ သီတဘီရုကာ တေပိ သက္ကောန္တိ တိစီဝရေန ယာပေတုံ. ယန္နူနာဟံ ဘိက္ခူနံ စီဝရေ သီမံ ဗန္ဓေယျံ, မရိယာဒံ ဌပေယျံ, တိစီဝရံ အနုဇာနေယျန်”တိ.
အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ— “ဣဓာဟံ, ဘိက္ခဝေ, အန္တရာ စ ရာဇဂဟံ အန္တရာ စ ဝေသာလိံ အဒ္ဓါနမဂ္ဂပ္ပဋိပန္နော အဒ္ဒသံ သမ္ဗဟုလေ ဘိက္ခူ စီဝရေဟိ ဥဗ္ဘဏ္ဍိတေ သီသေပိ စီဝရဘိသိံ ကရိတွာ ခန္ဓေပိ စီဝရဘိသိံ ကရိတွာ ကဋိယာပိ စီဝရဘိသိံ ကရိတွာ အာဂစ္ဆန္တေ, ဒိသွာန မေ ဧတဒဟောသိ— ‘အတိလဟုံ ခေါ ဣမေ မောဃပုရိသာ စီဝရေ ဗာဟုလ္လာယ အာဝတ္တာ. ယန္နူနာဟံ ဘိက္ခူနံ စီဝရေ သီမံ ဗန္ဓေယျံ, မရိယာဒံ ဌပေယျန်’တိ. ဣဓာဟံ, ဘိက္ခဝေ, သီတာသု ဟေမန္တိကာသု ရတ္တီသု အန္တရဋ္ဌကာသု ဟိမပါတသမယေ ရတ္တိံ အဇ္ဈောကာသေ ဧကစီဝရော နိသီဒိံ. န မံ သီတံ အဟောသိ. နိက္ခန္တေ ပဌမေ ယာမေ သီတံ မံ အဟောသိ. ဒုတိယာဟံ စီဝရံ ပါရုပိံ. န မံ သီတံ အဟောသိ. နိက္ခန္တေ မဇ္ဈိမေ ယာမေ သီတံ မံ အဟောသိ. တတိယာဟံ စီဝရံ ပါရုပိံ. န မံ သီတံ အဟောသိ. နိက္ခန္တေ ပစ္ဆိမေ ယာမေ ဥဒ္ဓသ္တေ အရုဏေ နန္ဒိမုခိယာ ရတ္တိယာ သီတံ မံ အဟောသိ. စတုတ္ထာဟံ စီဝရံ ပါရုပိံ. န မံ သီတံ အဟောသိ. တဿ မယှံ, ဘိက္ခဝေ, ဧတဒဟောသိ— ‘ယေပိ ခေါ တေ ကုလပုတ္တာ ဣမသ္မိံ ဓမ္မဝိနယေ သီတာလုကာ သီတဘီရုကာ တေပိ သက္ကောန္တိ တိစီဝရေန ယာပေတုံ. ယန္နူနာဟံ ဘိက္ခူနံ စီဝရေ သီမံ ဗန္ဓေယျံ, မရိယာဒံ ဌပေယျံ, တိစီဝရံ အနုဇာနေယျန်’တိ. အနုဇာနာမိ, ဘိက္ခဝေ, တိစီဝရံ— ဒိဂုဏံ သင်္ဃာဋိံ, ဧကစ္စိယံ ဥတ္တရာသင်္ဂံ, ဧကစ္စိယံ အန္တရဝါသကန်”တိ.