8.17 အတိရေကစီဝရကထာ
တေန ခေါ ပန သမယေန ဆဗ္ဗဂ္ဂိယာ ဘိက္ခူ— “ဘဂဝတာ တိစီဝရံ အနုညာတန်”တိ— အညေနေဝ တိစီဝရေန ဂါမံ ပဝိသန္တိ, အညေန တိစီဝရေန အာရာမေ အစ္ဆန္တိ, အညေန တိစီဝရေန နဟာနံ ဩတရန္တိ. ယေ တေ ဘိက္ခူ အပ္ပိစ္ဆာ တေ ဥဇ္ဈာယန္တိ ခိယျန္တိ ဝိပါစေန္တိ— “ကထဉှိ နာမ ဆဗ္ဗဂ္ဂိယာ ဘိက္ခူ အတိရေကစီဝရံ ဓာရေဿန္တီ”တိ. အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ— “န, ဘိက္ခဝေ, အတိရေကစီဝရံ ဓာရေတဗ္ဗံ. ယော ဓာရေယျ, ယထာဓမ္မော ကာရေတဗ္ဗော”တိ.
တေန ခေါ ပန သမယေန အာယသ္မတော အာနန္ဒဿ အတိရေကစီဝရံ ဥပ္ပန္နံ ဟောတိ. အာယသ္မာ စ အာနန္ဒော တံ စီဝရံ အာယသ္မတော သာရိပုတ္တဿ ဒါတုကာမော ဟောတိ. အာယသ္မာ စ သာရိပုတ္တော သာကေတေ ဝိဟရတိ. အထ ခေါ အာယသ္မတော အာနန္ဒဿ ဧတဒဟောသိ— “ဘဂဝတာ သိက္ခာပဒံ ပညတ္တံ— ‘န အတိရေကစီဝရံ ဓာရေတဗ္ဗန်’တိ. ဣဒဉ္စ မေ အတိရေကစီဝရံ ဥပ္ပန္နံ. အဟဉ္စိမံ စီဝရံ အာယသ္မတော သာရိပုတ္တဿ ဒါတုကာမော. အာယသ္မာ စ သာရိပုတ္တော သာကေတေ ဝိဟရတိ. ကထံ နု ခေါ မယာ ပဋိပဇ္ဇိတဗ္ဗန်”တိ? ဘဂဝတော ဧတမတ္ထံ အာရောစေသိ. “ကီဝစိရံ ပနာနန္ဒ, သာရိပုတ္တော အာဂစ္ဆိဿတီ”တိ? “နဝမံ ဝါ, ဘဂဝါ, ဒိဝသံ, ဒသမံ ဝါ”တိ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ— “အနုဇာနာမိ, ဘိက္ခဝေ, ဒသာဟပရမံ အတိရေကစီဝရံ ဓာရေတုန်”တိ.
တေန ခေါ ပန သမယေန ဘိက္ခူနံ အတိရေကစီဝရံ ဥပ္ပန္နံ ဟောတိ. အထ ခေါ ဘိက္ခူနံ ဧတဒဟောသိ— “ကထံ နု ခေါ အမှေဟိ အတိရေကစီဝရေ ပဋိပဇ္ဇိတဗ္ဗန်”တိ? ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, အတိရေကစီဝရံ ဝိကပ္ပေတုန်”တိ.
အထ ခေါ ဘဂဝါ ဝေသာလိယံ ယထာဘိရန္တံ ဝိဟရိတွာ ယေန ဗာရာဏသီ တေန စာရိကံ ပက္ကာမိ. အနုပုဗ္ဗေန စာရိကံ စရမာနော ယေန ဗာရာဏသီ တဒဝသရိ. တတြ သုဒံ ဘဂဝါ ဗာရာဏသိယံ ဝိဟရတိ ဣသိပတနေ မိဂဒါယေ. တေန ခေါ ပန သမယေန အညတရဿ ဘိက္ခုနော အန္တရဝါသကော ဆိဒ္ဒေါ ဟောတိ. အထ ခေါ တဿ ဘိက္ခုနော ဧတဒဟောသိ— “ဘဂဝတာ တိစီဝရံ အနုညာတံ— ဒိဂုဏာ သင်္ဃာဋိ, ဧကစ္စိယော ဥတ္တရာသင်္ဂေါ, ဧကစ္စိယော အန္တရဝါသကော. အယဉ္စ မေ အန္တရဝါသကော ဆိဒ္ဒေါ. ယန္နူနာဟံ အဂ္ဂဠံ အစ္ဆုပေယျံ, သမန္တတော ဒုပဋ္ဋံ ဘဝိဿတိ, မဇ္ဈေ ဧကစ္စိယန်”တိ. အထ ခေါ သော ဘိက္ခု အဂ္ဂဠံ အစ္ဆုပေသိ. အဒ္ဒသာ ခေါ ဘဂဝါ သေနာသနစာရိကံ အာဟိဏ္ဍန္တော တံ ဘိက္ခုံ အဂ္ဂဠံ အစ္ဆုပေန္တံ, ဒိသွာန ယေန သော ဘိက္ခု တေနုပသင်္ကမိ, ဥပသင်္ကမိတွာ တံ ဘိက္ခုံ ဧတဒဝေါစ— “ကိံ တွံ, ဘိက္ခု, ကရောသီ”တိ? “အဂ္ဂဠံ, ဘဂဝါ, အစ္ဆုပေမီ”တိ. “သာဓု သာဓု, ဘိက္ခု; သာဓု ခေါ တွံ, ဘိက္ခု, အဂ္ဂဠံ အစ္ဆုပေသီ”တိ.
အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ— “အနုဇာနာမိ, ဘိက္ခဝေ, အဟတာနံ ဒုဿာနံ အဟတကပ္ပါနံ ဒိဂုဏံ သင်္ဃာဋိံ, ဧကစ္စိယံ ဥတ္တရာသင်္ဂံ, ဧကစ္စိယံ အန္တရဝါသကံ; ဥတုဒ္ဓဋာနံ ဒုဿာနံ စတုဂ္ဂုဏံ သင်္ဃာဋိံ, ဒိဂုဏံ ဥတ္တရာသင်္ဂံ, ဒိဂုဏံ အန္တရဝါသကံ; ပံသုကူလေ ယာဝဒတ္ထံ; ပါပဏိကေ ဥဿာဟော ကရဏီယော. အနုဇာနာမိ, ဘိက္ခဝေ, အဂ္ဂဠံ တုန္နံ ဩဝဋ္ဋိကံ ကဏ္ဍုသကံ ဒဠှီကမ္မန်”တိ.