8.31 အဋ္ဌစီဝရမာတိကာ
အဋ္ဌိမာ, ဘိက္ခဝေ, မာတိကာ စီဝရဿ ဥပ္ပါဒါယ— သီမာယ ဒေတိ, ကတိကာယ ဒေတိ, ဘိက္ခာပညတ္တိယာ ဒေတိ, သံဃဿ ဒေတိ, ဥဘတောသံဃဿ ဒေတိ, ဝဿံဝုဋ္ဌသံဃဿ ဒေတိ, အာဒိဿ ဒေတိ, ပုဂ္ဂလဿ ဒေတိ.
သီမာယ ဒေတိ— ယာဝတိကာ ဘိက္ခူ အန္တောသီမဂတာ တေဟိ ဘာဇေတဗ္ဗံ. ကတိကာယ ဒေတိ— သမ္ဗဟုလာ အာဝါသာ သမာနလာဘာ ဟောန္တိ ဧကသ္မိံ အာဝါသေ ဒိန္နေ သဗ္ဗတ္ထ ဒိန္နံ ဟောတိ. ဘိက္ခာပညတ္တိယာ ဒေတိ, ယတ္ထ သံဃဿ ဓုဝကာရာ ကရိယျန္တိ, တတ္ထ ဒေတိ. သံဃဿ ဒေတိ, သမ္မုခီဘူတေန သံဃေန ဘာဇေတဗ္ဗံ. ဥဘတောသံဃဿ ဒေတိ, ဗဟုကာပိ ဘိက္ခူ ဟောန္တိ, ဧကာ ဘိက္ခုနီ ဟောတိ, ဥပဍ္ဎံ ဒါတဗ္ဗံ, ဗဟုကာပိ ဘိက္ခုနိယော ဟောန္တိ, ဧကော ဘိက္ခု ဟောတိ, ဥပဍ္ဎံ ဒါတဗ္ဗံ. ဝဿံဝုဋ္ဌသံဃဿ ဒေတိ, ယာဝတိကာ ဘိက္ခူ တသ္မိံ အာဝါသေ ဝဿံဝုဋ္ဌာ, တေဟိ ဘာဇေတဗ္ဗံ. အာဒိဿ ဒေတိ, ယာဂုယာ ဝါ ဘတ္တေ ဝါ ခါဒနီယေ ဝါ စီဝရေ ဝါ သေနာသနေ ဝါ ဘေသဇ္ဇေ ဝါ. ပုဂ္ဂလဿ ဒေတိ— ‘ဣမံ စီဝရံ ဣတ္ထန္နာမဿ ဒမ္မီ’”တိ.
စီဝရက္ခန္ဓကော အဋ္ဌမော.
တဿုဒ္ဒါနံ
ရာဇဂဟကော နေဂမော,
ဒိသွာ ဝေသာလိယံ ဂဏိံ;
ပုန ရာဇဂဟံ ဂန္တွာ,
ရညော တံ ပဋိဝေဒယိ.
ပုတ္တော သာလဝတိကာယ,
အဘယဿ ဟိ အတြဇော;
ဇီဝတီတိ ကုမာရေန,
သင်္ခါတော ဇီဝကော ဣတိ.
သော ဟိ တက္ကသီလံ ဂန္တွာ,
ဥဂ္ဂဟေတွာ မဟာဘိသော;_
သတ္တဝဿိကအာဗာဓံ,
နတ္ထုကမ္မေန နာသယိ.
ရညော ဘဂန္ဒလာဗာဓံ,
အာလေပေန အပါကဍ္ဎိ;
မမဉ္စ ဣတ္ထာဂါရဉ္စ,
ဗုဒ္ဓသံဃံ စုပဋ္ဌဟိ.
ရာဇဂဟကော စ သေဋ္ဌိ,
အန္တဂဏ္ဌိ တိကိစ္ဆိတံ;
ပဇ္ဇောတဿ မဟာရောဂံ,
ဃတပါနေန နာသယိ.
အဓိကာရဉ္စ သိဝေယျံ,
အဘိသန္နံ သိနေဟတိ;
တီဟိ ဥပ္ပလဟတ္ထေဟိ,
သမတ္တိံသဝိရေစနံ.
ပကတတ္တံ ဝရံ ယာစိ,
သိဝေယျဉ္စ ပဋိဂ္ဂဟိ;
စီဝရဉ္စ ဂိဟိဒါနံ,
အနုညာသိ တထာဂတော.
ရာဇဂဟေ ဇနပဒေ,
ဗဟုံ ဥပ္ပဇ္ဇိ စီဝရံ;
ပါဝါရော ကောသိယဉ္စေဝ,
ကောဇဝေါ အဍ္ဎကာသိကံ.
ဥစ္စာဝစာ စ သန္တုဋ္ဌိ,_
နာဂမေသာဂမေသုံ စ;
ပဌမံ ပစ္ဆာ သဒိသာ,
ကတိကာ စ ပဋိဟရုံ.
ဘဏ္ဍာဂါရံ အဂုတ္တဉ္စ,
ဝုဋ္ဌာပေန္တိ တထေဝ စ;
ဥဿန္နံ ကောလာဟလဉ္စ,_
ကထံ ဘာဇေ ကထံ ဒဒေ.
သကာတိရေကဘာဂေန,
ပဋိဝီသော ကထံ ဒဒေ;
ဆကဏေန သီတုဒကာ,
ဥတ္တရိတု န ဇာနရေ._
ဩရောပေန္တာ ဘာဇနဉ္စ,
ပါတိယာ စ ဆမာယ စ;
ဥပစိကာ မဇ္ဈေ ဇီရန္တိ,_
ဧကတော ပတ္ထိန္နေန စ.
ဖရုသာစ္ဆိန္နစ္ဆိဗန္ဓာ,
အဒ္ဒသာသိ ဥဗ္ဘဏ္ဍိတေ;
ဝီမံသိတွာ သကျမုနိ,
အနုညာသိ တိစီဝရံ.
အညေန အတိရေကေန,
ဥပ္ပဇ္ဇိ ဆိဒ္ဒမေဝ စ;_
စာတုဒ္ဒီပေါ ဝရံ ယာစိ,
ဒါတုံ ဝဿိကသာဋိကံ.
အာဂန္တုဂမိဂိလာနံ,
ဥပဋ္ဌာကဉ္စ ဘေသဇ္ဇံ;_
ဓုဝံ ဥဒကသာဋိဉ္စ,
ပဏီတံ အတိခုဒ္ဒကံ.
ထုလ္လကစ္ဆုမုခံ ခေါမံ,
ပရိပုဏ္ဏံ အဓိဋ္ဌာနံ;
ပစ္ဆိမံ ကတော ဂရုကော,
ဝိကဏ္ဏော သုတ္တမောကိရိ.
လုဇ္ဇန္တိ နပ္ပဟောန္တိ,
စ အနွာဓိကံ ဗဟူနိ စ;
အန္ဓဝနေ အဿတိယာ,
ဧကော ဝဿံ ဥတုမှိ စ.
ဒွေ ဘာတုကာ ရာဇဂဟေ,
ဥပနန္ဒော ပုန ဒွိသု;_
ကုစ္ဆိဝိကာရော ဂိလာနော,
ဥဘော စေဝ ဂိလာနကာ._
နဂ္ဂါ ကုသာ ဝါကစီရံ,
ဖလကော ကေသကမ္ဗလံ;
ဝါဠော်လူကပက္ခဉ္စ,
အဇိနံ အက္ကနာဠကံ.
ပေါတ္ထကံ နီလပီတဉ္စ,
လောဟိတံ မဉ္ဇိဋ္ဌေန စ;
ကဏှာ မဟာရင်္ဂနာမ,
အစ္ဆိန္နဒသိကာ တထာ.
ဒီဃပုပ္ဖဖဏဒသာ,
ကဉ္စုတိရီဋဝေဌနံ;
အနုပ္ပန္နေ ပက္ကမတိ,
သံဃော ဘိဇ္ဇတိ တာဝဒေ.
ပက္ခေ ဒဒန္တိ သံဃဿ,
အာယသ္မာ ရေဝတော ပဟိ;
ဝိဿာသဂါဟာဓိဋ္ဌာတိ,
အဋ္ဌ စီဝရမာတိကာတိ.
ဣမမှိ ခန္ဓကေ ဝတ္ထူ ဆန္နဝုတိ.
စီဝရက္ခန္ဓကော နိဋ္ဌိတော.