8.5 သေဋ္ဌိပုတ္တဝတ္ထု
တေန ခေါ ပန သမယေန ဗာရာဏသေယျကဿ သေဋ္ဌိပုတ္တဿ မောက္ခစိကာယ ကီဠန္တဿ အန္တဂဏ္ဌာဗာဓော ဟောတိ, ယေန ယာဂုပိ ပီတာ န သမ္မာ ပရိဏာမံ ဂစ္ဆတိ, ဘတ္တမ္ပိ ဘုတ္တံ န သမ္မာ ပရိဏာမံ ဂစ္ဆတိ, ဥစ္စာရောပိ ပဿာဝေါပိ န ပဂုဏော. သော တေန ကိသော ဟောတိ လူခေါ ဒုဗ္ဗဏ္ဏော ဥပ္ပဏ္ဍုပ္ပဏ္ဍုကဇာတော ဓမနိသန္ထတဂတ္တော. အထ ခေါ ဗာရာဏသေယျကဿ သေဋ္ဌိဿ ဧတဒဟောသိ— “မယှံ ခေါ ပုတ္တဿ တာဒိသော အာဗာဓော, ယေန ယာဂုပိ ပီတာ န သမ္မာ ပရိဏာမံ ဂစ္ဆတိ, ဘတ္တမ္ပိ ဘုတ္တံ န သမ္မာ ပရိဏာမံ ဂစ္ဆတိ, ဥစ္စာရောပိ ပဿာဝေါပိ န ပဂုဏော. သော တေန ကိသော လူခေါ ဒုဗ္ဗဏ္ဏော ဥပ္ပဏ္ဍုပ္ပဏ္ဍုကဇာတော ဓမနိသန္ထတဂတ္တော. ယန္နူနာဟံ ရာဇဂဟံ ဂန္တွာ ရာဇာနံ ဇီဝကံ ဝေဇ္ဇံ ယာစေယျံ ပုတ္တံ မေ တိကိစ္ဆိတုန်”တိ. အထ ခေါ ဗာရာဏသေယျကော သေဋ္ဌိ ရာဇဂဟံ ဂန္တွာ ယေန ရာဇာ မာဂဓော သေနိယော ဗိမ္ဗိသာရော တေနုပသင်္ကမိ, ဥပသင်္ကမိတွာ ရာဇာနံ မာဂဓံ သေနိယံ ဗိမ္ဗိသာရံ ဧတဒဝေါစ— “မယှံ ခေါ, ဒေဝ, ပုတ္တဿ တာဒိသော အာဗာဓော, ယေန ယာဂုပိ ပီတာ န သမ္မာ ပရိဏာမံ ဂစ္ဆတိ, ဘတ္တမ္ပိ ဘုတ္တံ န သမ္မာ ပရိဏာမံ ဂစ္ဆတိ, ဥစ္စာရောပိ ပဿာဝေါပိ န ပဂုဏော. သော တေန ကိသော လူခေါ ဒုဗ္ဗဏ္ဏော ဥပ္ပဏ္ဍုပ္ပဏ္ဍုကဇာတော ဓမနိသန္ထတဂတ္တော. သာဓု ဒေဝေါ ဇီဝကံ ဝေဇ္ဇံ အာဏာပေတု ပုတ္တံ မေ တိကိစ္ဆိတုန်”တိ.
အထ ခေါ ရာဇာ မာဂဓော သေနိယော ဗိမ္ဗိသာရော ဇီဝကံ ကောမာရဘစ္စံ အာဏာပေသိ— “ဂစ္ဆ, ဘဏေ ဇီဝက, ဗာရာဏသိံ ဂန္တွာ ဗာရာဏသေယျကံ သေဋ္ဌိပုတ္တံ တိကိစ္ဆာဟီ”တိ. “ဧဝံ, ဒေဝါ”တိ ခေါ ဇီဝကော ကောမာရဘစ္စော ရညော မာဂဓဿ သေနိယဿ ဗိမ္ဗိသာရဿ ပဋိဿုတွာ ဗာရာဏသိံ ဂန္တွာ ယေန ဗာရာဏသေယျကော သေဋ္ဌိပုတ္တော တေနုပသင်္ကမိ, ဥပသင်္ကမိတွာ ဗာရာဏသေယျကဿ သေဋ္ဌိပုတ္တဿ ဝိကာရံ သလ္လက္ခေတွာ ဇနံ ဥဿာရေတွာ တိရောကရဏိယံ ပရိက္ခိပိတွာ ထမ္ဘေ ဥဗ္ဗန္ဓိတွာ ဘရိယံ ပုရတော ဌပေတွာ ဥဒရစ္ဆဝိံ ဥပ္ပါဋေတွာ အန္တဂဏ္ဌိံ နီဟရိတွာ ဘရိယာယ ဒဿေသိ— “ပဿ တေ သာမိကဿ အာဗာဓံ, ဣမိနာ ယာဂုပိ ပီတာ န သမ္မာ ပရိဏာမံ ဂစ္ဆတိ, ဘတ္တမ္ပိ ဘုတ္တံ န သမ္မာ ပရိဏာမံ ဂစ္ဆတိ, ဥစ္စာရောပိ ပဿာဝေါပိ န ပဂုဏော; ဣမိနာယံ ကိသော လူခေါ ဒုဗ္ဗဏ္ဏော ဥပ္ပဏ္ဍုပ္ပဏ္ဍုကဇာတော ဓမနိသန္ထတဂတ္တော”တိ. အန္တဂဏ္ဌိံ ဝိနိဝေဌေတွာ အန္တာနိ ပဋိပဝေသေတွာ ဥဒရစ္ဆဝိံ သိဗ္ဗိတွာ အာလေပံ အဒါသိ. အထ ခေါ ဗာရာဏသေယျကော သေဋ္ဌိပုတ္တော နစိရဿေဝ အရောဂေါ အဟောသိ. အထ ခေါ ဗာရာဏသေယျကော သေဋ္ဌိ— “ပုတ္တော မေ အရောဂေါ ဌိတော”တိ ဇီဝကဿ ကောမာရဘစ္စဿ သောဠသသဟဿာနိ ပါဒါသိ. အထ ခေါ ဇီဝကော ကောမာရဘစ္စော တာနိ သောဠသသဟဿာနိ အာဒါယ ပုနဒေဝ ရာဇဂဟံ ပစ္စာဂဉ္ဆိ.