8.6 ပဇ္ဇောတရာဇဝတ္ထု
တေန ခေါ ပန သမယေန ရညော ပဇ္ဇောတဿ ပဏ္ဍုရောဂါဗာဓော ဟောတိ. ဗဟူ မဟန္တာ မဟန္တာ ဒိသာပါမောက္ခာ ဝေဇ္ဇာ အာဂန္တွာ နာသက္ခိံသု အရောဂံ ကာတုံ. ဗဟုံ ဟိရညံ အာဒါယ အဂမံသု. အထ ခေါ ရာဇာ ပဇ္ဇောတော ရညော မာဂဓဿ သေနိယဿ ဗိမ္ဗိသာရဿ သန္တိကေ ဒူတံ ပါဟေသိ— “မယှံ ခေါ တာဒိသော အာဗာဓော, သာဓု ဒေဝေါ ဇီဝကံ ဝေဇ္ဇံ အာဏာပေတု, သော မံ တိကိစ္ဆိဿတီ”တိ. အထ ခေါ ရာဇာ မာဂဓော သေနိယော ဗိမ္ဗိသာရော ဇီဝကံ ကောမာရဘစ္စံ အာဏာပေသိ— “ဂစ္ဆ, ဘဏေ ဇီဝက; ဥဇ္ဇေနိံ ဂန္တွာ ရာဇာနံ ပဇ္ဇောတံ တိကိစ္ဆာဟီ”တိ. “ဧဝံ, ဒေဝါ”တိ ခေါ ဇီဝကော ကောမာရဘစ္စော ရညော မာဂဓဿ သေနိယဿ ဗိမ္ဗိသာရဿ ပဋိဿုတွာ ဥဇ္ဇေနိံ ဂန္တွာ ယေန ရာဇာ ပဇ္ဇောတော တေနုပသင်္ကမိ; ဥပသင်္ကမိတွာ ရညော ပဇ္ဇောတဿ ဝိကာရံ သလ္လက္ခေတွာ ရာဇာနံ ပဇ္ဇောတံ ဧတဒဝေါစ— “သပ္ပိံ ဒေဟိ, သပ္ပိံ, ဒေဝ, နိပ္ပစိဿာမိ. တံ ဒေဝေါ ပိဝိဿတီ”တိ. “အလံ, ဘဏေ ဇီဝက, ယံ တေ သက္ကာ ဝိနာ သပ္ပိနာ အရောဂံ ကာတုံ တံ ကရောဟိ. ဇေဂုစ္ဆံ မေ သပ္ပိ, ပဋိကူလန်”တိ. အထ ခေါ ဇီဝကဿ ကောမာရဘစ္စဿ ဧတဒဟောသိ— “ဣမဿ ခေါ ရညော တာဒိသော အာဗာဓော, န သက္ကာ ဝိနာ သပ္ပိနာ အရောဂံ ကာတုံ. ယန္နူနာဟံ သပ္ပိံ နိပ္ပစေယျံ ကသာဝဝဏ္ဏံ ကသာဝဂန္ဓံ ကသာဝရသန်”တိ. အထ ခေါ ဇီဝကော ကောမာရဘစ္စော နာနာဘေသဇ္ဇေဟိ သပ္ပိံ နိပ္ပစိ ကသာဝဝဏ္ဏံ ကသာဝဂန္ဓံ ကသာဝရသံ. အထ ခေါ ဇီဝကဿ ကောမာရဘစ္စဿ ဧတဒဟောသိ— “ဣမဿ ခေါ ရညော သပ္ပိ ပီတံ ပရိဏာမေန္တံ ဥဒ္ဒေကံ ဒဿတိ. စဏ္ဍောယံ ရာဇာ ဃာတာပေယျာပိ မံ. ယန္နူနာဟံ ပဋိကစ္စေဝ အာပုစ္ဆေယျန်”တိ. အထ ခေါ ဇီဝကော ကောမာရဘစ္စော ယေန ရာဇာ ပဇ္ဇောတော တေနုပသင်္ကမိ, ဥပသင်္ကမိတွာ ရာဇာနံ ပဇ္ဇောတံ ဧတဒဝေါစ— “မယံ ခေါ, ဒေဝ, ဝေဇ္ဇာ နာမ တာဒိသေန မုဟုတ္တေန မူလာနိ ဥဒ္ဓရာမ ဘေသဇ္ဇာနိ သံဟရာမ. သာဓု ဒေဝေါ ဝါဟနာဂါရေသု စ ဒွါရေသု စ အာဏာပေတု— ယေန ဝါဟနေန ဇီဝကော ဣစ္ဆတိ တေန ဝါဟနေန ဂစ္ဆတု, ယေန ဒွါရေန ဣစ္ဆတိ တေန ဒွါရေန ဂစ္ဆတု, ယံ ကာလံ ဣစ္ဆတိ တံ ကာလံ ဂစ္ဆတု, ယံ ကာလံ ဣစ္ဆတိ တံ ကာလံ ပဝိသတူ”တိ. အထ ခေါ ရာဇာ ပဇ္ဇောတော ဝါဟနာဂါရေသု စ ဒွါရေသု စ အာဏာပေသိ— “ယေန ဝါဟနေန ဇီဝကော ဣစ္ဆတိ တေန ဝါဟနေန ဂစ္ဆတု, ယေန ဒွါရေန ဣစ္ဆတိ တေန ဒွါရေန ဂစ္ဆတု, ယံ ကာလံ ဣစ္ဆတိ တံ ကာလံ ဂစ္ဆတု, ယံ ကာလံ ဣစ္ဆတိ တံ ကာလံ ပဝိသတူ”တိ.
တေန ခေါ ပန သမယေန ရညော ပဇ္ဇောတဿ ဘဒ္ဒဝတိကာ နာမ ဟတ္ထိနိကာ ပညာသယောဇနိကာ ဟောတိ. အထ ခေါ ဇီဝကော ကောမာရဘစ္စော ရညော ပဇ္ဇောတဿ သပ္ပိံ ဥပနာမေသိ— “ကသာဝံ ဒေဝေါ ပိဝတူ”တိ. အထ ခေါ ဇီဝကော ကောမာရဘစ္စော ရာဇာနံ ပဇ္ဇောတံ သပ္ပိံ ပါယေတွာ ဟတ္ထိသာလံ ဂန္တွာ ဘဒ္ဒဝတိကာယ ဟတ္ထိနိကာယ နဂရမှာ နိပ္ပတိ.
အထ ခေါ ရညော ပဇ္ဇောတဿ တံ သပ္ပိ ပီတံ ပရိဏာမေန္တံ ဥဒ္ဒေကံ အဒါသိ. အထ ခေါ ရာဇာ ပဇ္ဇောတော မနုဿေ ဧတဒဝေါစ— “ဒုဋ္ဌေန, ဘဏေ, ဇီဝကေန သပ္ပိံ ပါယိတောမှိ. တေန ဟိ, ဘဏေ, ဇီဝကံ ဝေဇ္ဇံ ဝိစိနထာ”တိ. “ဘဒ္ဒဝတိကာယ, ဒေဝ, ဟတ္ထိနိကာယ နဂရမှာ နိပ္ပတိတော”တိ. တေန ခေါ ပန သမယေန ရညော ပဇ္ဇောတဿ ကာကော နာမ ဒါသော သဋ္ဌိယောဇနိကော ဟောတိ, အမနုဿေန ပဋိစ္စ ဇာတော. အထ ခေါ ရာဇာ ပဇ္ဇောတော ကာကံ ဒါသံ အာဏာပေသိ— “ဂစ္ဆ, ဘဏေ ကာက, ဇီဝကံ ဝေဇ္ဇံ နိဝတ္တေဟိ— ရာဇာ တံ, အာစရိယ, နိဝတ္တာပေတီတိ. ဧတေ ခေါ, ဘဏေ ကာက, ဝေဇ္ဇာ နာမ ဗဟုမာယာ. မာ စဿ ကိဉ္စိ ပဋိဂ္ဂဟေသီ”တိ.
အထ ခေါ ကာကော ဒါသော ဇီဝကံ ကောမာရဘစ္စံ အန္တရာမဂ္ဂေ ကောသမ္ဗိယံ သမ္ဘာဝေသိ ပါတရာသံ ကရောန္တံ. အထ ခေါ ကာကော ဒါသော ဇီဝကံ ကောမာရဘစ္စံ ဧတဒဝေါစ— “ရာဇာ တံ, အာစရိယ, နိဝတ္တာပေတီ”တိ. “အာဂမေဟိ, ဘဏေ ကာက, ယာဝ ဘုဉ္ဇာမ. ဟန္ဒ, ဘဏေ ကာက, ဘုဉ္ဇဿူ”တိ. “အလံ, အာစရိယ, ရညာမှိ အာဏတ္တော— ဧတေ ခေါ, ဘဏေ ကာက, ဝေဇ္ဇာ နာမ ဗဟုမာယာ, မာ စဿ ကိဉ္စိ ပဋိဂ္ဂဟေသီ”တိ. တေန ခေါ ပန သမယေန ဇီဝကော ကောမာရဘစ္စော နခေန ဘေသဇ္ဇံ ဩလုမ္ပေတွာ အာမလကဉ္စ ခါဒတိ ပါနီယဉ္စ ပိဝတိ. အထ ခေါ ဇီဝကော ကောမာရဘစ္စော ကာကံ ဒါသံ ဧတဒဝေါစ— “ဟန္ဒ, ဘဏေ ကာက, အာမလကဉ္စ ခါဒ ပါနီယဉ္စ ပိဝဿူ”တိ. အထ ခေါ ကာကော ဒါသော— “အယံ ခေါ ဝေဇ္ဇော အာမလကဉ္စ ခါဒတိ ပါနီယဉ္စ ပိဝတိ, န အရဟတိ ကိဉ္စိ ပါပကံ ဟောတုန်”တိ— ဥပဍ္ဎာမလကဉ္စ ခါဒိ ပါနီယဉ္စ အပါယိ. တဿ တံ ဥပဍ္ဎာမလကံ ခါဒိတံ တတ္ထေဝ နိစ္ဆာရေသိ. အထ ခေါ ကာကော ဒါသော ဇီဝကံ ကောမာရဘစ္စံ ဧတဒဝေါစ— “အတ္ထိ မေ, အာစရိယ, ဇီဝိတန်”တိ? “မာ, ဘဏေ ကာက, ဘာယိ, တွဉ္စေဝ အရောဂေါ ဘဝိဿသိ ရာဇာ စ. စဏ္ဍော သော ရာဇာ ဃာတာပေယျာပိ မံ, တေနာဟံ န နိဝတ္တာမီ”တိ ဘဒ္ဒဝတိကံ ဟတ္ထိနိကံ ကာကဿ နိယျာဒေတွာ ယေန ရာဇဂဟံ တေန ပက္ကာမိ. အနုပုဗ္ဗေန ယေန ရာဇာ မာဂဓော သေနိယော ဗိမ္ဗိသာရော တေနုပသင်္ကမိ; ဥပသင်္ကမိတွာ ရညော မာဂဓဿ သေနိယဿ ဗိမ္ဗိသာရဿ ဧတမတ္ထံ အာရောစေသိ. “သုဋ္ဌု, ဘဏေ ဇီဝက, အကာသိ ယမ္ပိ န နိဝတ္တော, စဏ္ဍော သော ရာဇာ ဃာတာပေယျာပိ တန်”တိ. အထ ခေါ ရာဇာ ပဇ္ဇောတော အရောဂေါ သမာနော ဇီဝကဿ ကောမာရဘစ္စဿ သန္တိကေ ဒူတံ ပါဟေသိ— “အာဂစ္ဆတု ဇီဝကော, ဝရံ ဒဿာမီ”တိ. “အလံ, အယျော, အဓိကာရံ မေ ဒေဝေါ သရတူ”တိ.