8.9 ဝရယာစနာကထာ
အထ ခေါ ဘဂဝတော ကာယော နစိရဿေဝ ပကတတ္တော အဟောသိ. အထ ခေါ ဇီဝကော ကောမာရဘစ္စော တံ သိဝေယျကံ ဒုဿယုဂံ အာဒါယ ယေန ဘဂဝါ တေနုပသင်္ကမိ, ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ ဇီဝကော ကောမာရဘစ္စော ဘဂဝန္တံ ဧတဒဝေါစ— “ဧကာဟံ, ဘန္တေ, ဘဂဝန္တံ ဝရံ ယာစာမီ”တိ. “အတိက္ကန္တဝရာ ခေါ, ဇီဝက, တထာဂတာ”တိ. “ယဉ္စ, ဘန္တေ, ကပ္ပတိ ယဉ္စ အနဝဇ္ဇန်”တိ. “ဝဒေဟိ, ဇီဝကာ”တိ. “ဘဂဝါ, ဘန္တေ, ပံသုကူလိကော, ဘိက္ခုသံဃော စ. ဣဒံ မေ, ဘန္တေ, သိဝေယျကံ ဒုဿယုဂံ ရညာ ပဇ္ဇောတေန ပဟိတံ— ဗဟူနံ ဒုဿာနံ ဗဟူနံ ဒုဿယုဂါနံ ဗဟူနံ ဒုဿယုဂသတာနံ ဗဟူနံ ဒုဿယုဂသဟဿာနံ ဗဟူနံ ဒုဿယုဂသတသဟဿာနံ အဂ္ဂဉ္စ သေဋ္ဌဉ္စ မောက္ခဉ္စ ဥတ္တမဉ္စ ပဝရဉ္စ. ပဋိဂ္ဂဏှာတု မေ, ဘန္တေ, ဘဂဝါ သိဝေယျကံ ဒုဿယုဂံ; ဘိက္ခုသံဃဿ စ ဂဟပတိစီဝရံ အနုဇာနာတူ”တိ. ပဋိဂ္ဂဟေသိ ဘဂဝါ သိဝေယျကံ ဒုဿယုဂံ. အထ ခေါ ဘဂဝါ ဇီဝကံ ကောမာရဘစ္စံ ဓမ္မိယာ ကထာယ သန္ဒဿေသိ သမာဒပေသိ သမုတ္တေဇေသိ သမ္ပဟံသေသိ. အထ ခေါ ဇီဝကော ကောမာရဘစ္စော ဘဂဝတာ ဓမ္မိယာ ကထာယ သန္ဒဿိတော သမာဒပိတော သမုတ္တေဇိတော သမ္ပဟံသိတော ဥဋ္ဌာယာသနာ ဘဂဝန္တံ အဘိဝါဒေတွာ ပဒက္ခိဏံ ကတွာ ပက္ကာမိ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ— “အနုဇာနာမိ, ဘိက္ခဝေ, ဂဟပတိစီဝရံ. ယော ဣစ္ဆတိ, ပံသုကူလိကော ဟောတု. ယော ဣစ္ဆတိ, ဂဟပတိစီဝရံ သာဒိယတု. ဣတရီတရေနပါဟံ, ဘိက္ခဝေ, သန္တုဋ္ဌိံ ဝဏ္ဏေမီ”တိ.
အဿောသုံ ခေါ ရာဇဂဟေ မနုဿာ— “ဘဂဝတာ ကိရ ဘိက္ခူနံ ဂဟပတိစီဝရံ အနုညာတန်”တိ. တေ စ မနုဿာ ဟဋ္ဌာ အဟေသုံ ဥဒဂ္ဂါ— “ဣဒါနိ ခေါ မယံ ဒါနာနိ ဒဿာမ ပုညာနိ ကရိဿာမ, ယတော ဘဂဝတာ ဘိက္ခူနံ ဂဟပတိစီဝရံ အနုညာတန်”တိ. ဧကာဟေနေဝ ရာဇဂဟေ ဗဟူနိ စီဝရသဟဿာနိ ဥပ္ပဇ္ဇိံသု.
အဿောသုံ ခေါ ဇာနပဒါ မနုဿာ— “ဘဂဝတာ ကိရ ဘိက္ခူနံ ဂဟပတိစီဝရံ အနုညာတန်”တိ. တေ စ မနုဿာ ဟဋ္ဌာ အဟေသုံ ဥဒဂ္ဂါ— “ဣဒါနိ ခေါ မယံ ဒါနာနိ ဒဿာမ ပုညာနိ ကရိဿာမ, ယတော ဘဂဝတာ ဘိက္ခူနံ ဂဟပတိစီဝရံ အနုညာတန်”တိ. ဇနပဒေပိ ဧကာဟေနေဝ ဗဟူနိ စီဝရသဟဿာနိ ဥပ္ပဇ္ဇိံသု.
တေန ခေါ ပန သမယေန သံဃဿ ပါဝါရော ဥပ္ပန္နော ဟောတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ပါဝါရန်”တိ.
ကောသေယျပါဝါရော ဥပ္ပန္နော ဟောတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ကောသေယျပါဝါရန်”တိ.
ကောဇဝံ ဥပ္ပန္နံ ဟောတိ. ဘဂဝတော ဧတမတ္ထံ အာရောစေသုံ. “အနုဇာနာမိ, ဘိက္ခဝေ, ကောဇဝန်”တိ.
ပဌမဘာဏဝါရော နိဋ္ဌိတော.